Uthenga Wabwino Wolembewa na Maliko
7 Afarisi na alembi ayakine amene ecokela ku Yerusalemu esonkhana kuli Yesu momuzungulila. 2 Pavuli pake, ove eona ayakine mwa ophunzila ŵake akulya cakulya cosasamba ku manja.* 3 (Afarisi na Ayuda akulya lini cakulya cosasamba ku manja mpaka mu tukonyokonyo pokonkha mwambo wa makolo. 4 Ndipo akawela kucokela ku maketi, akulya lini akaliyosamba. Pali soti miyambo iyakine inyinji yamene eilandila ndipo oikonkha. Miyambo iyi yuyangizhyilapo kuvwivwika makapu, manongo na viya vakopa m’manzi.) 5 Tetyo, Afarisi na alembi emukonsha kuti: “Ndaŵa yanji ophunzila ŵanu okonkha lini miyambo ya makolo koma akulya cakulya cosasamba ku manja?” 6 Yove eŵayankha kuti: “Yesaya elosela zacendi zokhuza mweo ŵanthu acinyengo, mokatizhyana na zayolaŵila Malemba kuti, ‘Ŵanthu aŵa onilemekeza na milomo yao koma mitima yao ili kutali na neo. 7 Ŵanthu aŵa onilambila patyala cifukwa ophunzisa malamulo a ŵanthu monga kuti ni malamulo a Mulungu.’ 8 Munyalanyaza malamulo a Mulungu ndipo muyumilila miyambo ya ŵanthu.”
9 Kuyangizhyila apo, eŵauzhya kuti: “Mocenjela, munyalanyaza malamulo a Mulungu kuti musunge miyambo yanu. 10 Mwacisanzo, Mose elaŵila kuti, ‘Mukolemekeza ausuwanu na amai ŵanu,’ koma soti kuti, ‘Aliyense wamene olaŵilila ausuwake na amai ŵake mau aipa ofunika kupaiwa.’ 11 Koma mweo mulaŵila kuti, ‘Ngati munthu ouzhya ausuwake olo amai ŵake kuti: “Vilivonse vanili navo vamene vingakupindulisheni ni khobani (kutanthauza kuti ni mphaso zufunika kupelekewa kwa Mulungu),”’ 12 mumulola lini kuti acitile ausuwake kapena amai ŵake cinthu ciliconse. 13 Mwa kucita izi, mucitisha kuti mau a Mulungu ankhale atyalatyala cifukwa ca miyambo yanu yamene mweipeleka kuli ŵanthu. Ndipo mucita zinthu zinyinji monga ni zamene izi.” 14 Pavuli pake, eita soti gulu ya ŵanthu ndipo eŵauzhya kuti: “Mvwani mweo monse, ndipo mumvwishe tanthauzo yake. 15 Paliye ciliconse cofumila kunja kwa munthu noloŵa mkati mwa munthu camene cingamuipishe. Koma vinthu vamene vufuma mkati mwake niye vumuipisha.” 16 ——
17 Peciloŵa m’ng’anda iyakine yamene yenze patali na gulu ya ŵanthu aŵa, ophunzila ŵake eyamba kumukonsha tanthauzo ya fanizo ila. 18 Tetyo eŵakonsha kuti: “Kansi namwe mumvwisha lini monga ni ove? Kansi muziŵa lini kuti paliye ciliconse cocokela kunja noloŵa mkati mwa munthu camene cingamuipishe? 19 Zili teti cifukwa cakuti cupita lini mu mtima mwake koma m’mala ndipo pavuli pake cikuyofuma ku cimbuzi.” Na mau amene aŵa, Yesu egamula kuti vakulya vonse ni vituŵa. 20 Elaŵila soti kuti: “Cufuma m’muŵili mwa munthu niye cumuipisha. 21 Cifukwa mu mtima mwa munthu mufuma maganizo aipa monga: a ciwelewele,* a ukawalala, opaya ŵanthu, 22 a cigololo, a dyela, ocita viipa, a cinyengo, nkhalidwe yotailila,* linso ya nsanje, mau onyoza, kulikuzhya koma soti ocita vinthu cosaganiza bwino. 23 Vinthu vonse ivi viipa, vufumila mu mtima mwa munthu ndipo vumuipisha.”
24 Pavuli pake, ecoka ku malo aŵa noluta ku cigao ca Turo na Sidoni. Kwamene uko, eloŵa m’ng’anda ndipo aliyofune kuti ŵanthu aziŵe kuti enze ku malo uku. Koma ŵanthu eziŵa mphela. 25 Nthawi yamene iyo, mzimai muyakine wamene mwana wake munakazi enze ekatiwa na mzimu uipa, ecimvwa zokhuza yove. Ndipo eluta kuli Yesu nogwada pafupi na mendo ŵake. 26 Mzimai uyu enze Mgiriki, wacisurofoinike. Yove epitilizhya kusenga Yesu kuti acose ciŵanda cenze na mwana wake. 27 Koma yove emuyankha kuti: “Ŵana ofunika kukuta coyamba, cifukwa n’cosayenela kutola cakulya* ca ŵana noponyela tuimbwa.” 28 Koma mzimai ula emuyankha kuti: “N’cendi ambuye, koma tuimbwa tukulya vinyenye vupona pa thebo pakulyela ŵana amene ao.” 29 Yesu peecimvwa izi, euzhya mzimai ula kuti: “Cifukwa cakuti walaŵila izi, nkhoya, ciŵanda cafuma muli mwana wako.” 30 Tetyo, eluta ku ng’anda kwake ndipo epeza kuti mwana wake aliyone pa bedi apo n’kuti ciŵanda cacoka.
31 Pavuli pake, Yesu peenzowelela kufuma m’cigao ca Turo kuluta ku Nyanja ya Galileya, epitila mu dela ya Sidoni koma soti mu cigao ca Dekapoli.* 32 Kwamene uku, ŵanthu emuletela munthu wamene enze gonthi koma soti enzovutika kulaŵila. Ove emusenga kuti akate munthu uyu. 33 Koma yove emutola noluta naye pambali. Tetyo, elovya tukumo twake m’matu mwa munthu ula ndipo pavuli potila mata pa tukumo twake, ekata lilime ya munthu uyu. 34 Pavuli pake, elolesha kululu nofuza mwamphamvu ndipo euzhya munthu ula kuti: “Efata,” kutanthauza kuti, “Seguka.” 35 Pavuli pa izi, matu yake yeseguka ndipo vuto yake yosalaŵila yesililatu cakuti eyamba kulaŵila bwino-bwino. 36 Tetyo, yove eŵalamula kuti asauzhye munthu aliyense zecitika. Koma enzocita kuti akaŵalesha mwamphamvu kuti asauzhye munthu aliyense, niye peenzolengeza ngako za nkhani iyi. 37 Ove edabwa ngako ndipo elaŵila kuti: “Wacita zinthu zonse bwino-bwino. Olo ŵanthu amene enze agonthi, akumvwa ndipo ŵala amene enzolaŵila lini, olaŵila.”