Uthenga Wabwino Wolembewa na Mateyo
6 “Samalani kuti osati mukocita zinthu zacilungamo pamenso pa ŵanthu na colinga cakuti akuoneni cifukwa mukacita tetyo, mukapasiwe lini mphoto kufumila kuli Ausuwanu a kululu. 2 Mukapeleka mphaso zacifundo,* osati mukolizhya mtolilo monga ni mwakucitila ŵanthu acinyengo m’masunagoge na m’miseu, pofuna kuti ŵanthu aŵatamande. Kulaŵila cendi, nukuuzhyani kuti ove olandililatu mphoto yao yonse. 3 Koma mweo ngati mupeleka mphaso zacifundo, kwanja yanu yamanjele osati ikoziŵa zayucita kwanja yanu yamalendi. 4 Mukocita izi kuti mphaso zanu zacifundo zinkhale zacisinsi. Ndipo Ausuwanu amene oona apo n’kuti ali kofisika, akakuwezhyeleni.
5 “Kuyangizhyila apo, ngati mupemphela, osati mukocita monga ni mwakucitila ŵanthu acinyengo cifukwa okonda kupemphela apo n’kuti apanama m’masunagoge na m’makona a m’miseu ikulu-ikulu na colinga cakuti ŵanthu aŵaone. Kulaŵila cendi, nukuuzhyani kuti ove olandililatu mphoto yao yonse. 6 Koma mweo ngati mufuna kupemphela, mukoluta mu cipinda canu novala ciseko ndipo mukopemphela kuli Ausuwanu amene ali kofisika. Mukacita izi, Ausuwanu amene oona apo n’kuti ali kofisika, akakuwezhyeleni. 7 Ngati mupemphela, osati mukolaŵila mau amozi na amozi mowelezhyawelezhya monga ni mwakucitila ŵanthu a mitundu iyakine, cifukwa oganiza kuti Mulungu aŵamvwe ngati oseŵenzesha mau anyinji. 8 Tetyo, musankhale monga ni ove cifukwa Ausuwanu oziŵa zamufunikila olo mukaliyoŵasenga.
9 “Ngati mupemphela, mukokamba kuti:
“‘Ausuwasu muli kululu, zina yanu ituŵishiwe. 10 Ufumu wanu uwele. Cifunilo canu cicitike pa calo monga ni mwacucitikila kululu. 11 Mutipase cakulya ca* siku ya lelo. 12 Mutikhululukile zolakwa zasu monga ni mwatakhululukila ŵanthu atilakwila. 13 Musalole kuti tiyesewe koma tipulumuseni kuli muipa.’
14 “Ngati mukhululukila ŵanthu ayakine zolakwa zao, namwe Ausuwanu a kululu akukhululukileni. 15 Koma ngati mukhululukila lini ŵanthu amene okulakwilani, namwe Ausuwanu akukhululukileni lini.
16 “Ngati mwaleka kulya kwa kanthawi, vinso vanu osati vikooneka vacisoni monga ni mwakucitila ŵanthu acinyengo amene oleka kusamalila vinso vao na colinga cakuti ŵanthu aŵaone kuti aleka kulya kwa kanthawi. Kulaŵila cendi, nukuuzhyani kuti ove olandililatu mphoto yao yonse. 17 Koma mweo ngati mwaleka kulya kwa kanthawi, mukozola mafuta ku mutu nosamba ku menso, 18 na colinga cakuti musaonekele kuli ŵanthu kuti mwaleka kulya kwa kanthawi, koma kuli Ausuwanu tyala amene ali kofisika. Mukacita izi, Ausuwanu amene oona apo n’kuti ali kofisika, akakuwezhyeleni.
19 “Lekani kusungila cuma canu pa calo pamene pali ajeyeye* na nguwe zamene zingaononge koma soti akawalala amene angathyole noiŵa. 20 M’malo mwake, sungilani cuma canu kululu kwamene ajeyeye na nguwe zingaononge lini koma soti akawalala angathyole lini noiŵa. 21 Cifukwa kuli cuma cako, nao mtima wako niye kwaunkhala.
22 “Laiti ya muŵili ni linso. Tetyo, ngati linso yulolesha pa cinthu cimozi, muŵili wonse unkhale wowala. 23 Koma ngati linso yako ni yansanje,* niye kuti muŵili wako wonse unkhale mu mfinzi. Ndipo ngati kuwala kwamene kuli muli weo ni mfinzi, niye kuti mfinzi yake ni ikulu ngako.
24 “Kapolo angatumikile lini ambuye aŵili, cifukwa angazonde m’mozi nokonda muyakine, kapena angankhale wokhulupilika kuli m’mozi nonyoza muyakine. Mungatumikile lini Mulungu na Cuma pa nthawi imozi.
25 “Cifukwa ca izi nukuuzhyani kuti: Lekani kucitila nkhaŵa moyo wanu kuti mulyenji olo mumwenji kapena kucitila nkhaŵa miŵili yanu kuti muvwalenji. Kansi moyo upambana lini cakulya, ndipo kansi muŵili upambana lini vovwala? 26 Loleshani tunyoni twa m’mululu. Tukomola lini mbeu olo kuwezhya kapena kusunga vakulya m’vimphaka. Olo n’tetyo, Ausuwanu a kululu otulyesha. Kansi nimwe lini ofunika kupambana tove? 27 Kansi ni ŵani wa mweo wamene angatalimphisheko moyo wake olo patontho tyala cifukwa cocita nkhaŵa? 28 Kuyangizhyila apo, ndaŵa yanji mucita nkhaŵa pa nkhani yokhuza vovwala? Phunzilani kufumila pa mwakukulila maluŵa akusanga. Ove okata lini nchito olo kusoka vovwala. 29 Koma nukuuzhyani kuti olo Solomo mu ulemelelo wake wonse, aliyovwalepo vovwala vabwino monga ni maluŵa aŵa. 30 Lomba ngati Mulungu ovwalika teti vomela vakusanga vamene vunkhalapo tyala lelo, mailo noponyewa pa mulilo, kansi angakangiwe kukuvwalikani kupambana apa, mweo a cikhulupililo citontho? 31 Tetyo, lekani kucita nkhaŵa nolaŵila kuti, ‘Kansi tilyenji?’ olo, ‘Kansi timwenji?’ kapena, ‘Kansi tivwalenji?’ 32 Cifukwa ŵanthu a mitundu iyakine osakilasakila vinthu vonse ivi. Koma Ausuwanu oziŵa kuti mufunikila vinthu vonse ivi.
33 “Tetyo, pitilizhyani kuika Ufumu pasogolo nokonkha mfundo zolungama za Mulungu ndipo akuyangizhyileni vinthu viyakine vonse ivi. 34 Lekani kucita nkhaŵa zokhuza siku yokonkhapo, cifukwa siku yokonkhapo ili na nkhaŵa zake. Mavuto a siku iliyonse ni okwanila pa siku yamene iyo.