Uthenga Wabwino Wolembewa na Maliko
6 Yesu ecoka ku malo uku noluta m’dela ya kwao ndipo ophunzila ŵake emukonkha. 2 Pa siku ya Sabata, yove eyamba kuphunzisa m’sunagoge. Ŵanthu anyinji amene ecimvwa zinthu zeenzophunzisa edabwa ngako ndipo ekamba kuti: “Kansi munthu uyu evitola kuni vinthu ivi? Ndipo ndaŵa yanji epasiwa nzelu zoteti koma soti mphamvu kuti akokwanisha kucita nchito zoteti? 3 Kansi uyu ni kalipentala lini, mwana wa Mariya, koma soti mkwake wa Yakobo, Yosefe, Yudasi na Simoni? Ndipo azilongosi ŵake ni aŵa lini ŵatili nao pano?” Tetyo, eyamba kukhumudwa cifukwa ca yove. 4 Koma Yesu eŵauzhya kuti: “Mneneli olemekezewa lini na ŵanthu a ku dela ya kwao, akwake na a m’ng’anda mwake, koma olemekezewa ku malo ayakine.” 5 Tetyo, yove aliyocite nchito zinyinji zamphamvu ku malo uku, kupatulapo tyala kuika manja ŵake pa ŵanthu atontho amene enzolwala noŵapolesha. 6 Yove edabwa ngako cifukwa cakuti ŵanthu aŵa enzeve cikhulupililo. Ndipo eyamba kuyendayenda m’minzi ya pafupi nophunzisa ŵanthu.
7 Pavuli pake, eita ophunzila ŵake 12 ndipo eyamba kuŵatumizhya aŵili-aŵili noŵapasa mphamvu kuti akokwanisha kucosa mizimu iipa. 8 Kuyangizhyila apo, eŵalamula kuti asanyamule ciliconse kupatulapo tyala ndodo. Eŵalamula kuti asanyamule buledi, cola ca vakulya va pa ulwendo olo ndalama* mu tuvyola twao. 9 Koma kuti avwale masanda* koma soti kuti asavwale vovwala viŵili. 10 Kuyangizhyila apo, eŵauzhya kuti: “Mukaloŵa m’ng’anda iliyonse, mukonkhala mu ng’anda yamene iyo mpaka nthawi yofuma ku malo amene aŵa ikwane. 11 Ndipo kulikonse kwati akaleke kukulandilani olo kumvwila mau ŵanu, mukokunkhumula lukungu ku mendo kwanu pocokako, kuti unkhale umboni kuli ove.” 12 Tetyo, eluta kuyolalikila kuti ŵanthu alape, 13 ecosa viŵanda vinyinji koma soti kuzoleka mafuta ŵanthu anyinji amene enzolwala noŵapolesha.
14 Pavuli pake, Mfumu Herode ecimvwa za vinthu ivi cifukwa zina ya Yesu yenze yechuka ngako ndipo ŵanthu enzolaŵila kuti: “Yohane M’batizi wauka kwa akufwa niye cifukwa cake ocita nchito zamphamvu.” 15 Koma ayakine enzolaŵila kuti: “Ni Eliya.” Ndipo ayakine enzolaŵila kuti: “Ni mneneli monga ni aneneli akale.” 16 Koma Herode peecimvwa izi, elaŵila kuti: “Yohane ula wenetenda mutu niye waukishiwa.” 17 Elaŵila teti cifukwa Herode enze etuma ŵanthu kuti akakate Yohane nomumanga koma soti kumuika m’jele cifukwa ca Herodiya mkazi wa mkwake Filipo wamene Herode enze emulungula. 18 Ecita izi cifukwa Yohane enzouzhya Herode kuti: “N’cosaloleka kuti mulungule mkazi wa mkwanu.” 19 Tetyo, Herodiya enze emusungila cakumkosi Yohane ndipo enzofuna kumupaya, koma aliyokwanishe kucita izi. 20 Herode enzoyopa Yohane cifukwa enzoziŵa kuti enze munthu wolungama koma soti mtuŵa, tetyo enzomuteteza. Peecimvwa zeenzolaŵila Yohane, esoŵa cocita koma epitilizhya kumumvwishila mosangalala.
21 Tetyo, siku yefwika yakuti Herodiya akwanilishe colinga cake. Siku iyi yenze kukumbukila kuvyalika kwa Herode. Pa siku iyi, Herode ekonzela nduna zake, akulu-akulu a masoja koma soti ŵanthu ochuka ngako mu Galileya cakulya ca m’cingulo. 22 Mwana munakazi wa Herodiya eloŵa noyamba kuvina ndipo ekondwelesha Herode na ŵanthu ŵeenzokulya nao cakulya. Pavuli pake, mfumu yeuzhya msimbi ula kuti: “Nisenge ciliconse caufuna ndipo nikupase.” 23 Ecitomulumbilila kuti: “Ciliconse caunganisenge nikupase, olo hafu ya ufumu wangu.” 24 Tetyo, msimbi ula eluta kuli amai ŵake noŵakonsha kuti: “Kansi nisenge kuti anipase cinji?” Amai ŵake emuuzhya kuti: “Kasenge mutu wa Yohane M’batizi.” 25 Nthawi yamene iyo, eluta kuli a mfumu nosenga kuti: “Nufuna kuti munipase mutu wa Yohane M’batizi pa mbale lomba teti.” 26 Olo kuti mfumu yecimvwa cisoni ngako, iliyofune kumukanila poganizila lumbilo yeipanga koma soti alwendo ŵake. 27 Mfumu iyi yetuma munthu enzoilondela ndipo yemulamula kuti akalete mutu wa Yohane. Yove eluta na kuyotenda mutu wa Yohane m’jele 28 nouleta pa mbale. Pavuli pake, epasa msimbi uyu mutu wa Yohane ndipo naye eupeleka kuli amai ŵake. 29 Ophunzila ŵake peecimvwa izi, ewela notola mtembo wake na kuyouika m’manda.*
30 Atumwi esonkhana kuli Yesu nomuuzhya vinthu vonse vecicita koma soti veciphunzisa. 31 Yove eŵauzhya kuti: “Tiyeni tilute kwaseka kuliye ŵanthu kuti mukapumuleko patontho.” Ecita izi cifukwa ŵanthu anyinji enzowela noluta ndipo enzeve nthawi yakuti apumule olo kulya cakulya. 32 Tetyo, ekwela boti noluta ku malo kuliye ŵanthu. 33 Koma peenzocoka, ŵanthu eŵaona ndipo eziŵa kweenzokuya. Tetyo, ŵanthu kufumila m’mizinda yonse eutuka kuluta ku malo aya, ndipo eciyoyambilila kufwika. 34 Yesu pecifwika, eona gulu ikulu ya ŵanthu ndipo eŵamvwila cifundo cifukwa enze monga ni mbelele ziliye mciŵeta. Tetyo, eyamba kuŵaphunzisa vinthu vinyinji.
35 Pekweyamba kufipa, ophunzila ŵake eluta kuli yove nomuuzhya kuti: “Ku malo kuno kuliye ŵanthu ndipo kwayamba kufipa. 36 Auzhyeni ŵanthu aŵa kuti ayambeko, alute m’madela ozungulila koma soti m’minzi yapafupi kuti akazigulile ŵeka vakulya vati alye.” 37 Koma yove eŵayankha kuti: “Mweo muŵapase vati alye.” Pavuli polaŵila izi, ove emukonsha kuti: “Kansi tufunika kuluta kuyogula mabuledi a ndalama zokwanila madinari 200 nopasa ŵanthu aŵa kuti alye?” 38 Yove eŵakonsha kuti: “Kansi muli na mabuledi angani? Nkhoyani mukaone.” Pavuli pakuti aona, emuuzhya kuti: “Alipo 5 ndipo tili soti na nsomba ziŵili.” 39 Pavuli pake, euzhya ŵanthu onse kuti ankhale pansi m’magulu. 40 Tetyo, enkhala m’magulu. Ayakine enkhala m’magulu ya ŵanthu 100, ayakine ya ŵanthu 50. 41 Pavuli potola mabuledi 5 na nsomba ziŵili, yove elolesha kululu nosenga daliso. Pavuli pake, esunasuna mabuledi nopasa ophunzila ŵake kuti agaŵile ŵanthu. Ecita soti cimozimozi na nsomba. 42 Tetyo, onse ecilya nokuta. 43 Pavuli pake, etola mabuledi yesalako ndipo yekwana mabasiketi 12 ozula, osaikilako nsomba. 44 Ŵanthu amene ecilya mabuledi enze analume okwanila 5,000.
45 Pakaliyopita nthawi itali, yove euzhya ophunzila ŵake kuti akwele boti notangula kuluta kusilya iyakine kufupi na Betisaida. Koma yove esalila kuti auzhye gulu ya ŵanthu kuti ilute kwao. 46 Pavuli polailana nao, yove eluta ku lupili kuti akapemphele. 47 Pekweyamba kufipa, boti ila yenze pakati pa nyanja, koma Yesu enze yeka ku mtunthu. 48 Yesu peciona kuti ophunzila ŵake ovutika kuyendesha boti cifukwa ca cimphepo camphamvu, eŵakonkha apo n’kuti oyenda pa nyanja. Ecita izi pa ulonda wa namba 4.* Koma yove enzoyenda monga kuti ofuna kuŵapitilila. 49 Peciona kuti oyenda pa manzi, ophunzila ŵake ekuwa nolaŵila kuti: “Aŵa ni mensomphenya!” 50 Elaŵila izi cifukwa onse emuona ndipo ecita wowa. Koma nthawi yamene iyo, yove elaŵila nao ndipo eŵauzhya kuti: “Tang’ani mtima, n’neo. Osayopa.” 51 Pavuli pake, Yesu ekwela mu boti iyi ndipo cimphepo celeka. Ove peciona izi, edabwa ngako. 52 Cifukwa cakuti ove aliyomvwishe tanthauzo ya mabuledi, enze akaluvutika kuti amvwishe zinthu zonse.
53 Pecitauka, efwika ku Genesareti nopanamika boti capafupi. 54 Koma peciseluka tyala mu boti iyi, ŵanthu emuzindikila. 55 Ŵanthu aŵa eutukila m’madela osiyanasiyana a cigao ici noyamba kunyamula ŵanthu olwala pa macila noŵapeleka ku malo kweenze Yesu. 56 Ndipo kulikonse kweenzoluta, akangoloŵa tyala m’minzi kapena mu mizinda koma soti m’madela a pafupi, ŵanthu enzonkhazika ŵanthu olwala m’mamaketi nomupapatila kuti akateko tyala kotoni wa m’mbali mwa covwala cake cakunja. Ndipo ŵanthu onse amene enzoukata, enzopola.