Uthenga Wabwino Wolembewa na Mateyo

26 Yesu pecisilizhya kulaŵila vinthu vonse ivi, euzhya ophunzila ŵake kuti: 2 “Muziŵa kuti kwasala masiku aŵili kuti Pasika icitike, ndipo Mwana wa munthu akapelekewe kuti akapacikiwe pa cimuti.”

3 Pavuli pake, ansembe akulu na akulu esonkhana pamozi mu luŵanza ya ng’anda ya mkulu wa ansembe wa zina yakuti Kayafa. 4 Ove epangana kuti akate* Yesu mocenjela nomupaya. 5 Koma enzokambilana kuti: “Tufunika lini kuyomukata pa nthawi ya cikondwelelo cifukwa pangayonkhala cipwilikiti.”

6 Yesu peenze ku Betaniya m’ng’anda ya Simoni wamene enze na khate, 7 kwewela munakazi muyakine wamene enze na mafuta odula ngako koma soti onunkhila amene enze mu botolo yopangiwa na mwala wa alabasitala, ndipo eyamba kutila m’mutu mwa Yesu apo n’kuti akulya pa thebo. 8 Ophunzila ŵake peciona izi, ekalipa ngako ndipo elaŵila kuti: Ndaŵa yanji muononga mafuta odula teti? 9 Mafuta aŵa sembe agulisiwa pa mtengo wodula ndipo ndalama zake sembe tapasa osauka.” 10 Peciziŵa zeenzolaŵila ophunzila ŵake, Yesu eŵauzhya kuti: “Ndaŵa yanji mufuna kuvutisha munakazi uyu? Yove wanicitila cinthu cabwino. 11 Cifukwa osauka muli nao nthawi zonse, koma neo munkhale lini nane nthawi zonse. 12 Munakazi uyu wanitila mafuta aŵa pokonzekela kuikiwa kwangu m’manda. 13 Kulaŵila cendi, nukuuzhyani kuti kulikonse kwati ukalalikiliwe uthenga wabwino pa calo conse, zawacita munakazi uyu zikalaŵiliwe soti pomukumbukila.”

14 Pavuli pake, m’mozi mwa ophunzila 12 wa zina yakuti Yudasi Isikariyoti, eluta kuli ansembe akulu 15 noŵakonsha kuti: “Kansi munipase cinji nikamupeleka kuli mweo?” Ove emulonjeza kuti amupase ndalama 30 zasiliva. 16 Tetyo, kuyambila nthawi yamene iyi, eyamba kusakila mpata wabwino wakuti amupelekelemo m’manja mwa adani.

17 Pa siku yoyamba ya Cikondwelelo ca Buledi Iliye Vofufumisha, ophunzila eluta kuli Yesu nomukonsha kuti: “Kansi mufuna tikakukonzeleni kuni malo kwati mulyele Pasika?” 18 Yove eŵauzhya kuti: “Nkhoyani mu mzinda kuli munthu Wakuti-wakuti ndipo mukamuuzhye kuti, ‘Mphunzisi walaŵila kuti: “Nthawi yangu yoikiwilatu ili pafupi. Neo na ophunzila ŵangu ticitile cikondwelelo ca Pasika ku ng’anda kwako.”’” 19 Tetyo, ophunzila a Yesu ekonkha malangizo yonse yeciŵapasa, ndipo ekonza vinthu vonse vofunikila pa Pasika.

20 M’cingulo siku yamene iyi, yove na ophunzila ŵake 12 eyamba kulya cakulya pa thebo. 21 Peenzokulya, yove eŵauzhya kuti: “Kulaŵila cendi, nukuuzhyani kuti m’mozi wa mweo anipeleke.” 22 Peecimvwa izi, ophunzila ŵake ecimvwa cisoni ngako ndipo aliyense eyamba kumukonsha kuti: “Ambuye, kansi n’neo?” 23 Yesu eŵayankha kuti: “Munthu wamene otoŵela m’mbale imozi na neo niye wati anipeleke. 24 N’cendi kuti Mwana wa munthu apelekewe kulingana na zelembewa zokhuza yove. Koma soka kuli munthu wati apeleke Mwana wa munthu. Ndipo sembe zenze bwino kuti munthu wamene uyo enze aliyovyalike.” 25 Yudasi wamene enze esala patontho kumupeleka emukonsha kuti: “Kansi n’neo Rabi?” Yesu emuyankha kuti: “Zawalaŵila, ni mwamene.”

26 Akaliyosilizhya kulya, Yesu etola buledi ndipo pavuli popemphela, eisunasuna nopasa ophunzila ŵake, ndipo eŵauzhya kuti: “Aneni, lyani. Buledi iyi yupanamila muŵili wangu.” 27 Etola soti kapu ya waini, ndipo pavuli popemphela eŵapasa noŵauzhya kuti: “Mweo monse mwani waini uyu. 28 Waini uyu upanamila ‘milopa yangu ya pangano’ yati itaike cifukwa ca ŵanthu anyinji kuti macimo ŵao akhululukiwe. 29 Koma nukuuzhyani kuti: Nikamwe lini soti cakumwa ciliconse cocokela ku mphesa monga ni ici mpaka pati nikamwe soti cakumwa calomba pamozi na mweo mu Ufumu wa Atata.” 30 Pavuli pake, eimba nyimbo zotamanda Mulungu* noluta ku Lupili ya Maolivi.

31 Pecifwika pa lupili, Yesu euzhya ophunzila ŵake kuti: “Monse munithaŵe nonisiya neka* usiku uno cifukwa Malemba olaŵila kuti: ‘Nikapaye mciŵeta ndipo mbelele zikamwazhyikane.’ 32 Koma nikayoukishiwa, nikatangule kuluta ku Galileya ndipo niye kwati mukanipeze.” 33 Koma Petulo eyankha kuti: “Olo kuti aŵa ayakine onse angakuthaŵeni nokusiyani mweka, neo neka ningakuthaŵeni lini.” 34 Yesu emuuzhya kuti: “Kulaŵila cendi, nukuuzhya kuti usiku wa lelo kombwe akaliyolila unikane katatu.” 35 Petulo eyankha kuti: “Olo ngati pangafunike kuti nifwile namwe pamozi, neo ningakukaneni lini.” Ophunzila ayakine onse nao elaŵila cimozimozi.

36 Pavuli pake, Yesu eluta na ophunzila ŵake ku malo oitiwa kuti Gesemani, ndipo eŵauzhya kuti: “Nkhalani pano, neo nukuya uko kuyopemphela.” 37 Pakuya, etola Petulo na ŵana aŵili a Zebedayo, ndipo yove eyamba kumvwa cisoni na kuvutika ngako mu mtima. 38 Tetyo, eŵauzhya kuti: “Neo nukumvwa cisoni cikulu ngako* cakuti ningafwe naco. Nkhalani pano ndipo pitilizhyani kunkhala menso pamozi na neo.” 39 Pecilutako pasogolo patontho, egwada noŵelama mpaka cinso cake pansi ndipo epemphela kuti: “Atata, ngati n’zokwanishika, lolani kuti kapu iyi inipitilile, osati mwa kufuna kwangu koma mwa kufuna kwanu.”

40 Pavuli pake, ewelela penze ophunzila ŵake ndipo eŵapeza kuti aliyone. Tetyo, ekonsha Petulo kuti: “Kansi nawe wakangiwa kulimbikila kunkhala menso pamozi na neo kwa awa imozi? 41 Pitilizhyani kunkhala menso ndipo osaleka kupemphela kuti musaloŵe m’mayeselo. N’cendi kuti mzimu ni wofunishisha, koma muŵili ni wofoka.” 42 Eluta soti kaciŵili kuyopemphela kuti: “Atata, ngati n’zosakwanishika kuti kapu iyi inipitilile, mpaka nimwe mphela, lolani kuti cifunilo canu cicitike.” 43 Peciwelela soti kuli ophunzila ŵake, eŵapeza soti kuti aliyone cifukwa enzokumvwa tulo. 44 Tetyo, eŵasiya noluta soti kuyopemphela kacitatu ndipo ewelezhya mau yeenze ekamba. 45 Pavuli pake, ewelela soti kuli ophunzila ŵake noŵakonsha kuti: “Kansi n’cendi kuti nthawi monga ino muyona nopumula? Onani! Nthawi yakuti Mwana wa munthu apelekewe m’manja mwa ŵanthu ocimwa ili pafupi. 46 Nyamukani, tiyeni tiyambepo cifukwa wonipeleka ali pafupi.” 47 Peenze akalulaŵila na ophunzila ŵake, Yudasi m’mozi mwa ophunzila 12, ewela pamozi na gulu ikulu ya ŵanthu yamene yenze na mabemba koma soti nkholi. Gulu iyi yenze yetumiwa na ansembe akulu na akulu.

48 Womupeleka enze eŵapasa cizindikilo, ndipo eŵauzhya kuti: “Munthu wati nikising’e niye wamene, mumukate.” 49 Pecifwika, Yudasi eluta kuli Yesu nolaŵila kuti: “Muli tyani, Rabi?” Pavuli pake, emukising’a mwacikondi. 50 Koma Yesu emuuzhya kuti: “Shamwali, wazocitanji kuno?” Nthawi yamene iyo, gulu ya ŵanthu yeluta kuli Yesu ndipo yemukata nomumanga. 51 Koma m’mozi mwa ophunzila a Yesu etola bemba yake notenda kwatu ya kapolo wa mkulu wa ansembe. 52 Pavuli pake, Yesu emuuzhya kuti: “Wezhyela bemba yako m’malo mwake cifukwa aliyense oseŵenzesha bemba, akapaiwe na bemba. 53 Kapena kansi uganiza kuti ningasenge lini Atata kuti anitumizhyile magulu yopitilila 12 ya angelo lomba teti? 54 Koma ngati ningacite teti, kansi Malemba yamene yolaŵila kuti vinthu ivi vufunika kucitika yangakwanilishiwe tyani?” 55 Nthawi yamene iyo, Yesu ekonsha gulu ya ŵanthu kuti: “Ndaŵa yanji mwanyamula mabemba na nkholi pakuzonimanga monga kuti n’ne kawalala? Masiku onse nenzonkhala mu kacisi kuphunzisa, koma muliyonimange. 56 Koma vonse ivi vacitika kuti zecilemba aneneli zikwanilishiwe.”* Pavuli pake, ophunzila ŵake onse emuthaŵa nomusiya yeka.

57 Gulu ya ŵanthu amene emanga Yesu yemutwala kuli Kayafa mkulu wa ansembe. Kwamene uku niye kweenze ekumana alembi na akulu. 58 Koma Petulo epitilizhya kumukonkha capatali mpaka efwika mu luŵanza ya mkulu wa ansembe. Peciloŵa mkati, enkhala pansi pamozi na anchito a pa ng’anda kuti aone zati zicitikile Yesu.

59 Ansembe akulu na onse a mu Khoti ya Sanihedirini,* enzosakila umboni wawenye kuti ayopezhyele Yesu mlandu na colinga cakuti amupaye. 60 Olo kuti kwewela mboni zinyinji zawenye, ove aliyopeze umboni ulionse. Pavuli pake, kwewela mboni ziyakine ziŵili 61 ndipo zelaŵila kuti: “Munthu uyu enzolaŵila kuti, ‘Ningakwanishe kugumula kacisi wa Mulungu noumanga soti m’masiku atatu.’” 62 Peecimvwa izi, mkulu wa ansembe epanama nomukonsha kuti: “Kansi uyankha lini ciliconse? Kansi ukumvwa lini zakulaŵila ŵanthu aŵa?” 63 Koma Yesu enkhala tyala celele. Tetyo, mkulu wa ansembe emuuzhya kuti: “Nukulumbilisha pali Mulungu wamoyo kuti utiuzhye ngati niwe Khristu, Mwana wa Mulungu.” 64 Yesu emuyankha kuti: “Zamwakamba, ni mwamene. Koma nukuuzhyani kuti: Kuyambila lelo mpaka msogolo, mukaone Mwana wa munthu apo n’kuti wankhala ku kwanja yamalendi yamphamvu ndipo mukamuone soti apo n’kuti akuza m’mikumbi ya kululu.” 65 Pavuli pake, mkulu wa ansembe eng’amba covwala cake cakunja nolaŵila kuti: “Munthu uyu wanyoza Mulungu! Kansi pali cifukwa cakuti tisakilile umboni uyakine? Mwazimvwila mweka mwawanyozela Mulungu. 66 Kansi muganizapo tyani pa nkhani iyi?” Ove eyankha kuti: “Ofunika kupaiwa.” 67 Tetyo, eyamba kumutila mata kumenso nomuchaya makhofi. Ndipo ayakine emuchaya mambama 68 nomuuzhya kuti: “Lotela, weo Khristu. Ni ŵani wakuniata?”

69 Petulo peenze nkhezi m’luŵanza, msimbi muyakine wanchito eluta kuli yove nolaŵila kuti: “Namwe mwenze na Yesu wa ku Galileya.” 70 Koma yove ekana pamenso pa ŵanthu onse nolaŵila kuti: “Nuziŵa lini zaulaŵila.” 71 Pecicoka noluta pa kang’anda kenze pafupi na mlyango wa luŵanza, msimbi muyakine soti emuzindikila nouzhya ŵanthu ŵeenze nao pafupi kuti: “Munthu uyu enze pamozi na Yesu Mnazareti.” 72 Koma Petulo ekana soti mocitolumbila ndipo elaŵila kuti: “Munthu uyu numuziŵa lini.” 73 Pavuli pa kanthawi katontho, ŵanthu amene enze epanama naye pafupi eluta kuli Petulo nomuuzhya kuti: “N’cendi nawe niwe m’mozi mwa ophunzila ŵake, ndipo kalaŵilidwe kako kakukatisha.” 74 Pavuli pake, Petulo eyamba kutembelela nolumbila, ndipo elaŵila kuti: “Munthu uyu numuziŵa lini!” Nthawi yamene iyo, kombwe elila. 75 Ndipo Petulo ekumbukila mau ŵecimuuzhya Yesu akuti: “Kombwe akaliyolila, unikane katatu.” Pavuli pake, ecoka panja noyamba kulila mokhuzika.