Uthenga Wabwino Wolembewa na Luka
5 Pa nthawi iyakine, gulu ya ŵanthu yenzomvwishila Yesu peenzophunzisa mau a Mulungu apo n’kuti wapanama m’mbali mwa Nyanja ya Genesarete.* Ndipo ŵanthu aŵa enzomupanikiza. 2 Pavuli pake, yove eona maboti aŵili apo n’kuti ali m’mbali mwa nyanja. Koma okasha nsomba enze ecokamo ndipo enzowasha maneti ŵao. 3 Tetyo, yove ekwela m’boti imozi yamene yenze ya Simoni ndipo emusenga kuti aikankhileko m’manzi patontho. Pavuli pake, enkhala m’boti iyi noyamba kuphunzisa gulu ya ŵanthu. 4 Pecisilizhya kulaŵila, euzhya Simoni kuti: “Kankhila boti iyi konoka, ndipo muponye maneti ŵanu kuti mukashe nsomba.” 5 Koma Simoni eyankha kuti: “Mlangizi, taseŵenza usiku wonse koma tiliyokasheko kalikonse. Koma pofwana kuti ni mweo mwalaŵila, niponye maneti aŵa.” 6 Pecicita izi, ove ekasha nsomba zinyinji cakuti maneti ŵao eyamba kung’ambika. 7 Tetyo, eceula ayao amene enze m’boti iyakine kuti azeŵayavye. Ove eluta ndipo maboti yonse yaŵili yezula na nsomba cakuti yeyamba kumbila. 8 Simoni Petulo peciona izi, egwada pamenso pa Yesu nomuuzhya kuti: “Ambuye, fumamponi pali neo cifukwa n’ne munthu wocimwa.” 9 Simoni na ŵanthu ŵeenze nao edabwa ngako na kupaka kwa nsomba zecikasha. 10 Nao ŵana a Zebedayo amene ni Yakobo na Yohane amene enzokashila pamozi nsomba na Simoni, edabwa ngako. Koma Yesu euzhya Simoni kuti: “Usacite wowa. Kuyambila lelo ukokasha ŵanthu amoyo.” 11 Tetyo, etwala maboti ku mtunthu, ndipo esiya vinthu vonse nomukonkha.
12 Pa nthawi iyakine peenze mu mzinda uyakine, ekumana na munthu wamene enze na khate muŵili wonse. Munthu ula peciona Yesu, egwada noŵelama mpaka cinso cake pansi ndipo emusenga kuti: “Ambuye, ngati mufuna, munganituŵishe.” 13 Tetyo, Yesu etambulula kwanja yake nomukata. Ndipo elaŵila kuti: “Nufuna. Nkhala mtuŵa.” Nthawi yamene iyo, khate yake yesila. 14 Pavuli pake, euzhya munthu ula kuti asauzhye aliyense, ndipo emuuzhya kuti: “Koma nkhoya ukaonekele kuli wansembe ndipo ukapeleke nsembe ya kutuŵishiwa kwako monga ni mwecilamulila Mose kuti unkhale umboni kuli ove.” 15 Koma mbili yake yemvwika ngako ndipo magulu ya ŵanthu yenzosonkhana pamozi kuti amumvwishile koma soti kuti aŵapoleshe matenda ŵao. 16 Koma kanyinji-kanyinji, yove enzoluta ku malo kwayeka kuyopemphela.
17 Siku iyakine yove peenzophunzisa, Afarisi na aphunzisi a Cilamulo amene enzofumila m’minzi yonse ya Galileya, ku Yudeya na ku Yerusalemu enze enkhala pansi pa malo amene ao. Mphamvu ya Yehova yakuti akwanishe kupolesha olwala, yenze pali yove. 18 Pavuli pake, pefwika ŵanthu amene enze enyamula munthu wozizila vizo pa macila. Ove enzosakila njila yakuti aloŵeshelemo munthu ula m’ng’anda na kuti amuike pafupi na Yesu. 19 Koma pecikangiwa kupita naye cifukwa ca kupaka kwa ŵanthu, ekwela pa mtenje. Ndipo poseŵenzesha cim’boo ceenze epanga pa mtenje apa, ove emuloŵesha pamozi na macila nomufwikisha pakati pa ŵanthu amene enze na Yesu. 20 Yesu peciona cikhulupililo cao, euzhya munthu ula wozizila vizo kuti: “Shamwali, macimo ŵako akhululukiwa.” 21 Tetyo, alembi na Afarisi eyamba kuzikonsha kuti: “Kansi munthu uyu ni ŵani kuti akonyoza teti Mulungu? Kansi ni ŵani muyakine angakhululukile macimo kupatulapo Mulungu?” 22 Koma Yesu pecizindikila zeenzoganiza eŵakonsha kuti: “Kansi muganiza cinji m’mitima yanu? 23 Kansi cipepu n’cotyani pali kulaŵila kuti, ‘Macimo ŵako akhululukiwa’ olo kulaŵila kuti, ‘Nyamuka uyambe kuyenda’? 24 Koma kuti muziŵe kuti Mwana wa munthu ali na mphamvu yokhululukila macimo pa calo—” yove euzhya munthu wozizila vizo kuti: “Nulaŵila na weo, nyamuka, tola macila ŵako ndipo ulute kwanu.” 25 Nthawi yamene iyo, munthu ula enyamuka apo n’kuti ŵanthu onse oona ndipo enyamula macila ŵake noluta kwao apo n’kuti otamanda Mulungu. 26 Ŵanthu onse edabwa ngako nocita wowa ndipo eyamba kutamanda Mulungu. Ove enzolaŵila kuti: “Lelo taona vinthu vodabwisa!”
27 Pavuli pa izi, ecoka ndipo eona wosonkhesha msonkho muyakine wa zina yakuti Levi apo n’kuti alinkhale mu ofesi yosonkheshela misonkho, ndipo emuuzhya kuti: “Nkhala wokonkha wangu.” 28 Yove esiya vinthu vonse, ndipo enyamuka noyamba kumukonkha. 29 Pavuli pake, Levi ekonzela Yesu phwando ikulu ku ng’anda kwake. Ku phwando iyi kwewela ŵanthu anyinji osonkhesha misonkho koma soti ŵanthu ayakine amene enzokulya nao pamozi. 30 Afarisi na alembi ŵao peciona izi, eyamba kung’ung’uzila nokonsha ophunzila ŵake kuti: “Ndaŵa yanji mukulya na kumwa pamozi na osonkhesha misonkho na ŵanthu ocimwa?” 31 Yesu eŵayankha kuti: “Ŵanthu amene ali na thanzi yabwino ofunikila lini dokota, koma olwala niye ofunikila dokota. 32 Niliyowele kuzoita ŵanthu olungama, koma ocimwa kuti alape.”
33 Ove emuuzhya kuti: “Kanyinji-kanyinji, ophunzila a Yohane oleka kulya kwakanthawi, ndipo opemphela mopapatila. Nao ophunzila ŵa Afarisi ocita cimozimozi. Koma ophunzila ŵanu akulya na kumwa.” 34 Yesu eŵayankha kuti: “Kansi mweo mungauzhye ayake a mkwati kuti aleke kulya kwakanthawi ngati mkwati akali nao pamozi? 35 Koma masiku akuza pamene mkwati akatolewe pakati pao, ndipo pavuli pake, ove akaleke kulya kwakanthawi m’masiku amene ao.”
36 Eŵauzhya soti fanizo yakuti: “Paliye munthu otenda cigamba pa malaya akunja anyowani nosokelela pa malaya akunja akale. Ngati angacite izi, cigamba canyowani cinganyonsokepo pa malaya akale ndipo cigamba canyowani cukatizhyana lini na malaya akale. 37 Kuyangizhyila apo, paliye aliyense wamene otila waini wanyowani m’vyola va cikumba vakale. Ngati angacite izi, waini wanyowani ungacitishe kuti vyola ivi viphulike ndipo ungataike koma soti vyola ivi vingaonongeke. 38 Koma waini wanyowani ufunika kutiliwa m’vyola vacikumba vanyowani. 39 Munthu akamwa waini wakale, ofuna lini soti kumwa waini wanyowani cifukwa olaŵila kuti, ‘Waini wakale ni wabwino ngako.’”