Uthenga Wabwino Wolembewa na Luka

11 Yesu enzopemphela pa malo ayakine. Pecisilizhya, m’mozi mwa ophunzila ŵake emuuzhya kuti: “Ambuye, tiphunziseni mopemphelela monga ni mwamene Yohane ephunzisila ophunzila ŵake.”

2 Tetyo, yove eŵauzhya kuti: “Ngati mupemphela, mukolaŵila kuti: ‘Atata, zina yanu ituŵishiwe. Ufumu wanu uwele. 3 Mutipase cakulya ca* lelo mokatizhyana na vinthu vatufunikila siku iliyonse. 4 Mutikhululukile macimo ŵasu cifukwa nase tukhululukila aliyense watilakwila. Ndipo mutiyavye kuti tisagonje ngati tuyesewa.’”*

5 Pavuli pake, eŵauzhya kuti: “Yelekezelani kuti m’mozi mwa mweo ali na muyake ndipo waluta kuli muyake wamene uyo pakati pa usiku nomusenga kuti, ‘Shamwali, nikongolesheko mabuledi atatu, 6 cifukwa muyangu muyakine niye pawafwika kucokela pa ulwendo ndipo niliye ciliconse comupasa.’ 7 Koma muyake wamene uyu oyankha apo n’kuti ali m’ng’anda kuti: ‘Osanivutisha. Nakhoma kale ciseko, ndipo neo na ŵana ŵangu talala kale. Ningauke lini kuti nikupase ciliconse.’ 8 Nukuuzhyani kuti ngati angaleke kuuka nomupasa vilivonse cifukwa cakuti ni muyake, angauke nomupasa vilivonse vakufuna cifukwa cakuti walimbikila kumusenga. 9 Tetyo, nukuuzhyani kuti pitilizhyani kusenga ndipo akupaseni, pitilizhyani kusakila ndipo mupeze, pitilizhyani kugogoda ndipo akusegulileni. 10 Cifukwa aliyense wamene osenga opasiwa, aliyense wamene osakilasakila opeza ndipo aliyense wamene ogogoda omusegulila. 11 Kansi ni atata otyani pakati panu amene angapase mwana wao njoka pavuli pakuti waŵasenga nsomba? 12 Kapena pavuli poŵasenga lungu, angamupase cimbambalizhya?* 13 Tetyo, ngati mweo amene nimwe ŵanthu aipa muziŵa kupasa ŵana ŵanu mphaso zabwino, nanga tyani ponena za Ausuwanu a kululu? Mosakaikila, ove apeleke mwawanzi mzimu utuŵa kuli ŵala amene omusenga.”

14 Pavuli pake, efumya ciŵanda muli munthu muyakine camene cenzomukangisha kulaŵila. Ciŵanda ici pececoka, munthu ula eyamba kulaŵila ndipo gulu ya ŵanthu yedabwa ngako. 15 Koma ŵanthu ayakine enzolaŵila kuti: “Munthu uyu ocosa viŵanda na mphamvu ya Belezebule,* wolamulila wa viŵanda.” 16 Koma ayakine pofuna kumuyesa eyamba kumukakamizhya kuti aŵaoneshe cizindikilo cofumila kululu. 17 Peciziŵa zeenzoganiza, yove eŵauzhya kuti: “Ufumu ulionse ukagaŵikana, uonongeka ndipo ng’anda iliyonse ikagaŵikana yupona. 18 Molingana na izi, ngati Satana naye wagaŵikana, kansi ufumu wake ungankhale tyani wotang’a? Cifukwa mulaŵila kuti nucosa viŵanda na mphamvu ya Belezebule. 19 Ngati neo nucosa viŵanda na mphamvu za Belezebule, kansi ŵana ŵanu ocosa viŵanda na mphamvu za ŵani? Niye cifukwa cake ŵana ŵanu akakuweluzeni. 20 Koma ngati nucosa viŵanda na cikumo ca Mulungu, niye kuti Ufumu wa Mulungu wakuwelelani mozizimusha. 21 Ngati munthu wamphamvu wamene ali na vida vokwanila olonda ng’anda yake, cuma cake cunkhala cotetezeka. 22 Koma ngati munthu muyakine wamphamvu kupambana yove angawele nomugonjesa, omulonda vida vake vonse vakudalila koma soti katundu wake ndipo ogaŵila ŵanthu ayakine katundu wamene uyo. 23 Aliyense wamene ali lini ku mbali yangu, osushana nane ndipo aliyense wamene okata lini nchito yosonkhanisha pamozi na neo, omwazhya.

24 “Mzimu uipa ukacoka mu munthu, upita m’malo muliye manzi kusakila malo kwaungankhale. Koma ngati uŵapeza lini, uziuzhya kuti, ‘Niwelele soti ku ng’anda yangu kwenecoka.’ 25 Ndipo ukafwika upeza kuti munkhala lini aliyense, koma ni mopyelewa na mokongoleshewa. 26 Pavuli pake, uwelela na kuyotola mizimu iyakine 7 yamene ni iipa ngako kupambana weve ndipo ikaloŵa, yunkhala mwamene umu. Posilizhyila pake, munthu uyu onkhala muipa ngako kupambana poyamba.”

27 Peenzolaŵila vinthu ivi, munakazi muyakine kufumila pa gulu iyi ekuwa kuti: “Wosangalala ni munakazi wamene luvumo yake yekunyamulani mweo koma soti wamene maziŵa ŵake ekunyonshani!” 28 Koma yove eyankha kuti: “Yai, m’malo mwake, osangalala ni ŵanthu amene akumvwa mau a Mulungu noyasunga!”

29 Gulu ya ŵanthu peyenzokuya yupakilapakila, yove eyamba kulaŵila kuti: “M’badwo uyu ni uipa ndipo ufuna cizindikilo. Koma upasiwe lini cizindikilo ciliconse kupatulapo tyala cizindikilo ca Yona. 30 Cifukwa monga ni mwamene Yona enkhalila cizindikilo kuli ŵanthu a ku Nineve, naye Mwana wa munthu ankhale cizindikilo kuli ŵanthu a m’badwo uno. 31 Mfumukazi ya ku m’mwela ikaukishiwe kuti ikaweluziwe pamozi na ŵanthu a mu m’badwo uyu, ndipo ikaŵasushe cifukwa yewela kucokela kosilizhyila kwa calo kuzokumvwa nzelu za Solomo. Koma onani! Mkulu kupambana Solomo ali pano. 32 Ŵanthu a ku Ninive akauke kuti akaweluziwe pamozi na m’badwo uyu ndipo akausushe cifukwa ove elapa Yona peciŵalalikila. Koma onani! Mkulu kupambana Yona ali pano. 33 Munthu akayasha lambi oiika lini pa malo ofisika kapena kuivwinikila na basiketi, koma oiika pa kasitandi koikapo lambi kuti ŵanthu oloŵa m’ng’anda aone kuwala. 34 Laiti ya muŵili ni linso. Ngati linso yako yulolesha pa cinthu cimozi, muŵili wako wonse unkhala wowala. Koma ngati ni yansanje,* niye kuti muŵili wako wonse unkhale mu mfinzi. 35 Tetyo, samalani kuti kuwala kuli muli mweo kusankhale mfinzi. 36 Ngati muŵili wako wonse ni wowala ngako ndipo paliye mbali iliyonse ili mu mfinzi, muŵili wako wonse uwale ngako monga ni mwayukusanikilila lambi na kuwala kwake.”

37 Pavuli polaŵila izi, Mfarisi muyakine emusenga kuti akalye naye cakulya. Tetyo, yove eluta ndipo eciyokulya cakulya. 38 Koma Mfarisi uyu edabwa peciona kuti Yesu akulya cakulya akaliyosamba ku manja.* 39 Koma Ambuye emuuzhya kuti: “Mweo Afarisi muli monga ni kapu na mbale zosuka kunja kweka, koma mkati mwake muli lito. Mitima yanu niyozula na dyela koma soti vinthu viipa. 40 Mweo ŵanthu aliye nzelu! Kansi munthu wamene epanga kunja niye lini soti epanga na mkati? 41 Koma ngati mupeleka mphaso zacifundo* mukozipeleka mofumila pansi pa mtima, mukacita tetyo vinthu vonse vokhuza mweo vinkhale vituŵa. 42 Soka kuli mweo Afarisi, cifukwa mupeleka cakhumi ca mbeu ya minti na luwe koma soti mbeu za ku dimba za mtundu ulionse. Koma munyalanyalaza cilungamo na cikondi ca Mulungu! N’cendi kuti wenze udindo wanu kucita vinthu ivi, koma mwenzofunika lini kunyalanyaza vinthu viyakine ivi. 43 Soka kuli mweo Afarisi, cifukwa mukonda mipando ya kusogolo* m’masunagoge koma soti kupasiwa moni m’mamaketi! 44 Soka kuli mweo cifukwa muli monga ni manda* yamene yoonekela lini bwino-bwino, cakuti ŵanthu oyendapo koma oziŵa lini!”

45 M’mozi mwa ŵanthu oziŵa Cilamulo emuyankha kuti: “Mphunzisi, pamulaŵila zinthu izi, nase mutinyoza.” 46 Pavuli pake, yove emuuzhya kuti: “Soka na kuli mweo ŵanthu oziŵa Cilamulo, cifukwa munyamulisha ŵanthu katundu wovuta kuunyamula, koma mweo mufuna lini olo kuukumya na tukumo twanu!

47 “Soka kuli mweo, cifukwa mumanga manda* ya aneneli koma makolo ŵanu niye eŵapaya! 48 Mosakaikila nimwe mboni pa zecicita makolo ŵanu, ndipo mukatizhyana nazo cifukwa ove epaya aneneli koma mweo mumanga manda yao. 49 Niye cifukwa cake nzelu ya Mulungu yelaŵila soti kuti: ‘Nikaŵatumizhyile aneneli na atumwi, koma akapaye ayakine mwa ove ndipo ayakine akaŵanzunze. 50 Ecita izi kuti mlandu wa milopa yetaika ya aneneli onse kuyambila pa ciyambi ca calo ukapezeke pa m’badwo uyu. 51 Kuyambila na milopa ya Abele mpaka milopa ya Zekariya, wamene emupaila pakati pa guwa yansembe na ng’anda yopatulika.’* Eee, nukuuzhyani kuti m’badwo uyu, ukayankhe mlandu wa milopa yamene iyi.

52 “Soka kuli mweo ŵanthu amene muziŵa Cilamulo, cifukwa mwelonda ŵanthu kii yoŵayavya kuziŵa vinthu. Mweo muliyoloŵemo ndipo ŵanthu amene ofuna kuloŵamo muŵavalizhya.”

53 Tetyo, pecifuma kwamene uku, alembi na Afarisi eyamba kumupanikiza ngako noyamba kumukonsha makonsho anyinji, 54 ndipo enzoyembekezela kuti akambe mau yakuti amupezelepo cifukwa.