Uthenga Wabwino Wolembewa na Mateyo
4 Pavuli pake, Yesu esogolelewa na mzimu kuluta m’cipululu kuti akayesewe na Maleŵania. 2 Pavuli pakuti wankhala masiku 40, mzuŵa na usiku osalya kanthu kalikonse, ecimvwa njala. 3 Ndipo Woyesa ewela kuli yove nomuuzhya kuti: “Ngati nimwe cendi mwana wa Mulungu, uzhyani miyala iyi kuti iyaluke mabuledi.” 4 Koma yove emuyankha kuti: “Malemba okamba kuti: ‘Munthu onkhala lini na moyo cifukwa ca cakulya* tyala, koma onkhala na moyo cifukwa ca mau onse ofuma pakamwa pa Yehova.’”
5 Pavuli pake, Maleŵania emutola noluta naye mu mzinda utuŵa. Ndipo emuika palulu pa mtenje wa kacisi 6 nomuuzhya kuti: “Ngati nimwe cendi mwana wa Mulungu, ziponyeni pansi, cifukwa Malemba okamba kuti: ‘Yove alamule angelo ŵake zokhuza mweo’ ndipo, ‘Akunyamuleni m’manja mwao kuti kwendo yanu isaniate pa mwala.’” 7 Yesu emuyankha kuti: “Malemba okamba soti kuti: ‘Usamuyese Yehova Mulungu wako.’”
8 Maleŵania emutola soti noluta naye pa lupili itali ngako nomuonesha maufumu onse a pa calo na ulemelelo wao. 9 Yove emuuzhya kuti: “Zinthu zonse izi nikupaseni ngati munganigwadile nonilambilako tyala patontho.” 10 Koma Yesu emuyankha kuti: “Coka Satana! Malemba okamba kuti: ‘Ni Yehova Mulungu wako tyala waufunika kulambila ndipo ufunika kutumikila yove yeka.’” 11 Pavuli pake, Maleŵania emusiya, ndipo nthawi yamene iyo angelo ewela noyamba kumutumikila.
12 Peecimvwa kuti Yohane wamangiwa, Yesu eluta ku Galileya. 13 Kuyangizhyila apo, pavuli pakuti wacoka ku Nazareti eciyonkhala ku Kaperenao, m’mbali mwa nyanja, m’cigao ca Zebuloni na Nafitali. 14 Ecita izi kuti akwanilishe zecilaŵila mneneli Yesaya, wamene ekamba kuti: 15 “Mweo ŵanthu a ku Zebuloni na Nafitali, m’mbali mwa mseu wa ku nyanja, kusilya kwa M’mana wa Yorodano na ŵanthu a mitundu iyakine ku Galileya. 16 Ŵanthu amene enze mu mfinzi eona kuwala kukulu ngako. Ndipo ŵala amene enze mu cimvwilimvwili ca imfwa, kuwala kweŵasanika.” 17 Kuyambila nthawi yamene iyo, Yesu eyamba kulalikila kuti: “Lapani, cifukwa Ufumu wa kululu uli pafupi.”
18 Peenzoyenda m’mbali mwa Nyanja ya Galileya, eona analume aŵili amene enze pokwao. Analume aŵa enze Simoni woitiwa soti kuti Petulo na mkwake Andireya. Ove enzoponya neti m’nyanja cifukwa enze okasha nsomba. 19 Eŵauzhya kuti: “Nikonkheni, ndipo nikupangeni kuti munkhale okasha ŵanthu.” 20 Nthawi yamene iyo, esiya maneti ŵao nomukonkha. 21 Pecipitilizhya kuyenda, eona soti analume aŵili amene enze pokwao. Analume aŵa enze Yakobo mwana wa Zebedayo na mkwake Yohane. Ove enze m’boti pamozi na ausuwao a Zebedayo apo n’kuti osoka maneti, ndipo yove eŵaita. 22 Nthawi yamene iyo, esiya boti na ausuwao ndipo emukonkha.
23 Pavuli pake, eyenda mu Galileya monse ndipo enzophunzisa m’masunagoge ŵao nolalikila uthenga wabwino wa Ufumu. Kuyangizhyila apo, enzopolesha matenda ya mtundu ulionse yeenzolwala ŵanthu. 24 Mbili yake yemvwika ku Siriya konse. Ndipo emuletela ŵanthu onse enzolwala matenda osiyanasiyana, enze na viŵanda, akhunyu na ozizila vizo, ndipo yove eŵapolesha. 25 Tetyo, gulu ikulu ya ŵanthu kufumila ku Galileya, Dekapoli,* Yerusalemu, Yudeya na mbali iyakine ya Yorodano, yemukonkha.