Uthenga Wabwino Wolembewa na Luka
16 Pavuli pake, Yesu euzhya soti ophunzila ŵake kuti: “Munthu muyakine wolemela enze na mtumiki woyanganila ng’anda yake, wamene ŵanthu ayakine enzomuneneza kuti enzoononga cuma ca ambuye ŵake. 2 Tetyo, emuita nomuuzhya kuti, ‘Namvwa vinthu viipa vaucita. Nipase lipoti yokhuza mwamene wankhala ukatila nchito yoyanganila ng’anda ino, cifukwa upitilizhye lini kukata nchito yoyanganila.’ 3 Pavuli pake, mtumiki uyu eziuzhya kuti, ‘Nicite cinji? Abosi ŵangu ofuna kunicosa nchito. Ningakwanishe lini kulima cifukwa niliye mphamvu ndipo nucita nsoni kuti ninkhale wosengasenga. 4 Yaa! Naziŵa zati nicite kuti akanicosa nchito, ŵanthu akanilandile bwino mu mang’anda mwao.’ 5 Tetyo, yove eita aliyense mwa ŵanthu amene enze na nkhongole kuli abosi ŵake. Ndipo ekonsha woyamba kuti, ‘Kansi uli na nkhongole ikulu tyani kuli abosi ŵangu?’ 6 Yove eyankha kuti, ‘Manongo* 100 a mafuta a maolivi.’ Woyanganila uyu emuuzhya kuti, ‘Tola cikalata cemwelembapo nkhongole yako ndipo unkhale pansi nolembapo manongo 50 kamangu-kamangu.’ 7 Pavuli pake, ekonsha muyakine kuti, ‘Nanga weo uli na nkhongole ikulu tyani?’ Yove eyankha kuti, ‘Vitundu 100 va witi.’* Woyanganila uyu emuuzhya kuti, ‘Tola cikalata cemwelembapo nkhongole yako ndipo ulembepo vitundu 80.’ 8 Abosi ŵake emuyamikila mtumiki uyu cifukwa ecita vinthu mwanzelu olo kuti enze wosalungama. Cifukwa ŵana a m’nthawi ino ocita vinthu mwanzelu ngati ocita vinthu na ŵanthu a m’badwo wao kupambana na ŵana a kuwala.
9 “Namwe, nukuuzhyani kuti: Pangani ayanu poseŵenzesha cuma cosalungama, kuti cuma ico cikayosila, akakulandileni m’malo a muyaya. 10 Munthu wamene ni wokhulupilika pa cinthu citontho, onkhala soti wokhulupilika pa cinthu cikulu, ndipo munthu wamene ni wosakhulupilika pa cinthu citontho, onkhala soti wosakhulupilika pa cinthu cikulu. 11 Tetyo, ngati muliyooneshe kuti nimwe wokhulupilika pa cuma cosalungama, kansi ni ŵani angakusungizhyeni cuma cenecene? 12 Ndipo ngati muliyooneshe kuti nimwe okhulupilika pa vinthu va ŵene, kansi ni ŵani angakupaseni mphoto yecikusungilani? 13 Mtumiki angankhale lini kapolo wa ambuye aŵili, cifukwa angazonde m’mozi nokonda muyakine, kapena angankhale wokhulupilika kuli m’mozi nonyoza muyakine. Mungankhale lini a kapolo a Mulungu na Cuma pa nthawi imozi.”
14 Afarisi amene enzokonda ngako ndalama, enzomvwishila ku vinthu vonse ivi ndipo eyamba kumunyoza. 15 Tetyo, yove eŵauzhya kuti: “Mweo niye mulaŵila kuti nimwe olungama pamenso pa ŵanthu, koma Mulungu oziŵa mitima yanu. Cifukwa cinthu cakuona ŵanthu kuti n’capalulu, n’conyansa m’menso mwa Mulungu.
16 “Ŵanthu enzolalikila za Cilamulo na mau ŵa aneneli mpaka m’nthawi ya Yohane. Kuyambila nthawi yamene iyo kuluta msogolo, uthenga wabwino wamene ulengezewa ni wokhuza Ufumu wa Mulungu, ndipo ŵanthu osiyanasiyana oyesayesa mwakhama kuti akaloŵemo. 17 Kulaŵila cendi, kululu na calo vingacoke mosavuta, kupambana kuti kambali katontho kacilembo ca m’Cilamulo kasakwanilishiwe.
18 “Aliyense woleka mkazi wake nolungula muyakine, wacita cigololo ndipo aliyense wamene walungula munakazi wasiiwa naye wacita cigololo.
19 “Penze munthu muyakine wolemela wamene enzokonda kuvwala vovwala vapepo koma soti nyula zabwino ngako. Yove enzosangalala koma soti kulya bwino siku iliyonse. 20 Koma penze munthu muyakine wosengasenga wa zina yakuti Lazaro wamene enze na vilonda muŵili wonse. 21 Ŵanthu enzokonda kumuika pa geti ya munthu uyu wolemela. Yove enzokumbwila kulya vinyenye venzopona pa thebo ya munthu uyu wolemela. Olo imbwa zenzowela nomyangula vilonda vake. 22 M’kuluta kwa nthawi, munthu ula wosengasenga emwalila ndipo angelo emutola na kuyomuika pafupi na Abulahamu.*
“Ndipo naye munthu wolemela emwalila noikiwa m’manda. 23 Peenze m’Manda* apo n’kuti onzunzika, eona Abulahamu capatali ndipo Lazaro enze pafupi na yove.* 24 Tetyo, eita kuti, ‘Atata a Abulahamu, nicitileni cifundo! Tumani Lazaro kuti avwivwike kosilizhyila kwa cikumo cake m’manzi na kuti azezizilishe lilime yangu, cifukwa nunzunzika m’mulilo uyu uyaka ngako.’ 25 Koma Abulahamu elaŵila kuti, ‘Mwanawe, kumbuka kuti welandililatu vabwino vako vonse pa nthawi yewenze moyo, ndipo Lazaro elandililatu viipa. Ndipo lomba osangalala kuno koma weo unzunzika. 26 Ndipo pakati pa mweo na seo paikiwa cisengu cikulu ngako, cakuti ŵala amene ofuna kuwela uko kufumila kuno angakwanishe lini, koma soti ŵanthu angatauke lini kucokela uko kuwela kuno.’ 27 Pavuli pake, munthu ula wolemela elaŵila kuti, ‘Pofwana kuti zili teti, nukusengani atata kuti mumutume ku ng’anda ya atata 28 cifukwa nili na akwangu 5. Tetyo, alute kuti akaŵapase umboni wokwanila kuti nao asakawele ku malo konzunzikilako kuno.’ 29 Koma Abulahamu elaŵila kuti, ‘Ove ali na zolemba za Mose koma soti mau ŵa aneneli, leka amvwile zamene izi.’ 30 Pavuli pake, yove elaŵila kuti, ‘Yai, conde atata a Abulahamu, koma ngati muyakine wofumila kuli akufwa angalute, ove alape.’ 31 Koma yove emuuzhya kuti, ‘Ngati omvwila lini zolemba za Mose koma soti mau ŵa aneneli, ove angamvwile lini soti olo munthu waukishiwa kwa akufwa.’”