Uthenga Wabwino Wolembewa na Mateyo
19 Yesu pecisilizhya kulaŵila vinthu ivi, ecoka ku Galileya noluta ku malile a Yudeya kusilya kwa Yorodano. 2 Gulu ikulu ya ŵanthu yemukonkha ndipo eŵapolesha ku malo kwamene uku.
3 Afarisi eluta kuli yove na colinga cakuti amuyese ndipo emukonsha kuti: “Kansi n’cololeka kuti munalume aleke mkazi wake pa cifukwa ciliconse?” 4 Yove eŵayankha kuti: “Kansi muliyoŵelenge kuti wala wamene eŵalenga kucokela pa ciyambi, eŵalenga munalume na munakazi 5 nolaŵila kuti: ‘Pa cifukwa ici, munalume akasiye ausuwake na amai ŵake noziphatika kuli mkazi wake ndipo onse aŵili akankhale muŵili umozi’? 6 Onkhala lini soti aŵili, koma muŵili umozi. Tetyo, camene Mulungu wacimanga pamozi, munthu asacilekanishe.” 7 Ove emukonsha kuti: “Lomba ndaŵa yanji Mose elamula kuti munalume akopeleka cikalata cosilizhyila ukwati kuli mkazi wake nomuleka?” 8 Yove eŵayankha kuti: “Mose ekulolani kuti mukosilizhya ukwati cifukwa ca kuyuma mtima kwanu, koma zenze lini teti kuyambila paciyambi. 9 Nukuuzhyani kuti aliyense woleka mkazi wake nokwatila muyakine, wacita cigololo, kupatulapo tyala ngati wamuleka cifukwa cakuti wacita ciwelewele.”
10 Pavuli pa izi, ophunzila emuuzhya kuti: “Ngati niye mwazilili kuli munalume na mkazi wake, niye kuti cili bwino kusalungula.” 11 Yove eŵauzhya kuti: “Ni onse lini angakwanishe kucita izi, koma tyala ŵala amene ali na mphaso. 12 Cifukwa ayakine olungula lini cifukwa cakuti evyalika teti ndipo ayakine olungula lini cifukwa cakuti ŵanthu niye eŵacitisha kunkhala tetyo. Koma pali ayakine amene ofuna lini kulungula cifukwa ca Ufumu wa kululu. Amene angakwanishe kucita izi, acite.”
13 Pavuli pake, ŵanthu emuletela ŵana atontho-atontho kuti aŵakate* noŵapemphelela. Koma ophunzila ŵake eŵakalipila. 14 Yesu eŵauzhya kuti: “Alekeni ŵana ndipo musaŵaleshe kuti awele kuli neo cifukwa Ufumu wa kululu ni wa ŵanthu ali monga ni ŵana aŵa.” 15 Tetyo, ekata ŵana aŵa, ndipo pavuli pake ecoka ku malo aŵa.
16 Pavuli pa izi, munthu muyakine eluta kuli yove nomukonsha kuti: “Mphunzisi, kansi nufunika kucita vinthu vabwino votyani kuti nikapeze moyo wosasila?” 17 Yove emuyankha kuti: “Ndaŵa yanji unikonsha zokhuza vinthu vabwino? Pali tyala m’mozi wabwino. Koma ngati ufuna kuti ukapeze moyo, upitilizhye kusunga malamulo.” 18 Yove ekonsha kuti: “Malamulo otyani?” Yesu eyankha kuti: “Musapaye munthu, musacite cigololo, osati mukoiŵa, osati mukocitila umboni wawenye, 19 mukolemekeza ausuwanu na amai ŵanu na yakuti mukokonda muyanu monga ni mwamuzikondela mweka.” 20 Wacilumbwana uyu eyankha Yesu kuti: “Nankhala nusunga malamulo yonse aya. Kansi n’cinji ciyakine canufunikila kucita?” 21 Yesu emuyankha kuti: “Ngati ufuna kuti unkhale wangwilo,* nkhoya ukagulise katundu wako ndipo ndalama zati upeze upase osauka. Ukacita tetyo, unkhale na cuma kululu. Pavuli pake, uwele unkhale wokonkha wangu.” 22 Wacilumbwana uyu peecimvwa izi, eluta apo n’kuti ali na cisoni cifukwa enze na katundu unyinji. 23 Pavuli pake, Yesu euzhya ophunzila ŵake kuti: “Kulaŵila cendi, nukuuzhyani kuti cikankhale covuta kuli munthu wolemela kuti akaloŵe mu Ufumu wa kululu. 24 Ndipo nukuuzhyani soti kuti ni cinthu capafupi kuti ngamila iloŵe pa linso ya nsingano kupambana kuti munthu wolemela akaloŵe mu Ufumu wa Mulungu.”
25 Ophunzila ŵake peecimvwa izi, edabwa ngako ndipo ekonsha kuti: “Ngati zili tetyo, kansi ni ŵani angapulumuke?” 26 Yesu eŵaloleshesha nolaŵila kuti: “Kuli ŵanthu izi zingaoneke monga n’zosakwanishika, koma na Mulungu zinthu zonse zukwanishika.”
27 Pavuli pake, Petulo ekamba kuti: “Onani! Tesiya vinthu vonse nokukonkhani. Lomba kansi tipeze cinji?” 28 Yesu eŵauzhya kuti: “Kulaŵila cendi, nukuuzhyani kuti pa nthawi yolenga soti vinthu, Mwana wa munthu akankhale pa mpando wake waulemelelo, ndipo mweo amene mwankhala munikonkha mukankhale pa mipando yacifumu 12 ndipo mukaweluze mafuko 12 a Isiraeli. 29 Aliyense wamene wasiya mang’anda, akwake, azilongosi, ausuwake, amai ŵake, ŵana olo malo cifukwa ca zina yangu, akalandile vinthu ivi kuyangizhyilika maulwendo 100 ndipo akapeze moyo wosasila.
30 “Koma anyinji amene ni oyamba akankhale osilizhyila, ndipo osilizhyila akankhale oyamba.