Uthenga Wabwino Wolembewa na Luka
21 Peciloleshesha, eona ŵanthu olemela oponya zopeleka zao mu kabokosi koponyamo zopeleka. 2 Pavuli pake, eona munakazi muyakine wamasiye wosauka oponyamo tumakoini tuŵili tuliye mphamvu.* 3 Ndipo yove elaŵila kuti: “Kulaŵila cendi, nukuuzhyani kuti munakazi uyu wosauka, waponyamo ndalama zinyinji kupambana ŵanthu onse amene aponyamo ndalama zao. 4 Zili teti cifukwa ndalama zaaponya ŵanthu onse aŵa, azicosa pa ndalama zinyinji zaali nazo. Koma munakazi uyu wosauka wapeleka zonse zaali nazo zamene sembe zamuyavya pa umoyo wake.”
5 Pa nthawi iyakine, ŵanthu peenzolaŵila zokhuza mwewekongoleshewela kacisi na miyala yabwino ngako koma soti mphaso zopelekewa kwa Mulungu, 6 yove elaŵila kuti: “Pokamba za vinthu ivi vamuona, masiku akafwike ndipo pano pakasale lini mwala ulionse palulu pa uyake wati ukaleke kuponeshewa.” 7 Pavuli pake, ove emukonsha kuti: “Mphunzisi, kansi ni lini pati vikacitike vinthu ivi, ndipo cizindikilo coonesha kuti nthawi yakuti vinthu ivi vicitike yasala patontho cikankhale cinji?” 8 Poŵayankha, Yesu eŵauzhya kuti: “Cenjelani kuti musasoŵeshewe. Cifukwa anyinji akawele kuli mweo m’zina yangu nokamba kuti, ‘Khristu ula ni neo.’ Akakambe soti kuti, ‘Nthawi ila ili pafupi.’ Osati mukaŵakonkhe. 9 Kuyangizhyila apo, mukayokumvwa za nkhondo koma soti misokonezo, musakacite wowa. Cifukwa vinthu ivi vufunika kucitika coyamba, koma masilizhyilo akafwike lini nthawi yamene iyo.”
10 Pavuli pake, eŵauzhya kuti: “Mtundu ukaukilane na mtundu uyake ndipo ufumu ukaukilane na ufumu uyake. 11 Kukacitike vivomezi vamphamvu ndipo kukankhale milili na njala m’malo osiyanasiyana. Kukaoneke vinthu voyofya ndipo kululu kukaoneke vizindikilo voyofya.
12 “Koma vinthu vonse ivi vikaliyocitika, ŵanthu akakukateni nokunzunzani ndipo akakupelekeni ku masunagoge na ku jele. Akakupelekeni kuli mafumu na abwanamkubwa cifukwa ca zina yangu. 13 Izi zikakupaseni mpata wakuti mukacitile umboni. 14 Tetyo, nkhalani osimikizhya m’mitima mwanu kuti osati mukokonzekelatu zati mukayankhe poziteteza. 15 Zili teti cifukwa neo nikakuuzhyeni mau yati mukalaŵile koma soti nikakupaseni nzelu zamene ŵanthu onse okusushani akakwanishe lini kuzikana olo kuzisusha. 16 Kuyangizhyila apo, makolo ŵanu ŵeneŵene, akwanu, abululu ŵanu koma soti ayanu, akakupelekeni nopaya ayakine a mweo. 17 Ŵanthu onse akakuzondeni cifukwa ca zina yangu. 18 Koma olo sisi imozi tyala ya m’mutu mwanu ikaonongewe lini. 19 Ngati mukapilile, mukapeze moyo.
20 “Koma mukayoona kuti Yerusalemu wazunguliliwa na magulu a nkhondo, mukaziŵe kuti mzinda uyu wasala patontho kuonongewa. 21 Pavuli pake, ali mu Yudeya akayambe kuthaŵila ku malupili, ndipo ali mkati mwa mzinda uyu akacokemo. Ŵala ali ku madela a ku minzi asakaloŵe mu mzinda uyu, 22 cifukwa masiku aŵa ni opeleka ciweluzo kuti zonse zelembewa zikwanilishiwe. 23 Soka kuli anakazi ati akapezeke kuti ali na mavumo koma soti ati akonyonsha m’masiku amene ao. Cifukwa m’calo ici mukankhale mavuto akulu koma soti ukali pa ŵanthu aŵa. 24 Ŵanthu akapaiwe na cibemba koma soti akatolewe kuluta ku mitundu iyakine yonse monga akapolo. Ŵanthu a mitundu iyakine akakandekande Yerusalemu mpaka nthawi zoikiwilatu za ŵanthu a mitundu iyakine zikakwane.
25 “Kuyangizhyila apo, pakankhale vizindikilo pa zuŵa, mwezi na nyenyezi. Ndipo pa calo ŵanthu a mitundu iyakine akanzunzike cifukwa cosoŵa cocita pokumvwa congo noona kuŵinduka kwa nyanja. 26 Ŵanthu akakomoke cifukwa ca wowa koma soti cifukwa coyembekezela vinthu vati vicitikile ŵanthu onkhala pa calo, pofwana kuti mphamvu za kululu zikanyang’anye. 27 Pavuli pake, akaone Mwana wa munthu akuza m’mikumbi apo n’kuti ali na mphamvu koma soti ulemelelo ukulu. 28 Koma vinthu ivi vikayoyamba kucitika, mukapaname noimya mitu yanu, cifukwa cipulumuso canu cili pafupi.”
29 Pecilaŵila izi, eŵauzhya fanizo yakuti: “Lolesheshani cimuti ca mkuyu na vimiti viyakine vonse. 30 Mukaona kuti vimiti vayamba kuphukila, muziŵa kuti mainza ali pafupi. 31 Molingana na izi, namwe mukayoona vinthu ivi vucitika, mukaziŵe kuti Ufumu wa Mulungu uli pafupi. 32 Kulaŵila cendi, nukuuzhyani kuti m’badwo uyu ukasile lini wonse mpaka vinthu vonse ivi vikacitike. 33 Kululu na calo vikacoke, koma mau ŵangu ankhalepo mpaka kale-kale.
34 “Koma samalani kuti mitima yanu isalemewe na kulya ngako, kumwa ngako koma soti nkhawa za moyo, kuti siku yamene iyo isakakufwikileni mozizimusha 35 monga msampha. Cifukwa ikafwikile ŵanthu onse onkhala pa calo. 36 Tetyo, nkhalani menso ndipo mukopemphela mopapatila nthawi zonse kuti mukakwanishe kuthaŵa vinthu vonse ivi vamene vufunika kucitika koma soti kuti mukakwanishe kupanama pamenso pa Mwana wa munthu.”
37 Mzuŵa Yesu enzophunzisa m’kacisi, koma usiku enzoluta kuyoyona mu Lupili ya Maolivi. 38 Ndipo ŵanthu onse enzoluta kuli yove m’mamawa ku kacisi kuti akamumvwishile.