Uthenga Wabwino Wolembewa na Luka
13 Pa nthawi yamene iyo, ŵanthu ayakine amene enzepo emufotokozela za ŵanthu a ku Galileya amene Pilato eyavikizhya milopa yao na nsembe zao. 2 Yove eŵayankha kuti: “Kansi muganiza kuti ŵanthu aŵa a ku Galileya, enze ocimwa ngako kupambana ŵanthu ayakine onse a ku Galileya cifukwa ca vinthu ivi veŵacitikila? 3 Yai. Nukuuzhyani kuti ngati mulape lini, mweo monse mukaonongewe monga ni ove. 4 Kapena kansi muganiza kuti ŵanthu ŵala 18 a ku Siloamu amene nsanja yeŵaponela noŵapaya, enze ocimwa ngako kupambana ŵanthu ayakine onse onkhala mu Yerusalemu? 5 Yai. Koma nukuuzhyani kuti ngati mulape lini, mweo monse mukaonongewe monga ni ove.”
6 Pavuli pake, eyamba kuŵafotokozela fanizo iyi: “Munthu muyakine enze na cimuti ca mkuyu m’munda wake wa mpesa ndipo eluta kuyosakila nkhuyu m’cimuti ici koma aliyopezemo ciliconse. 7 Pavuli pake, euzhya munthu wosamalila munda uyu wa mpesa kuti, ‘Kwa vyaka vitatu lomba, nankhala nuwela kuzosakila nkhuyu m’cimuti ici koma nikaliyopezamo olo imozi. Citendeni cimuti ici! Ndaŵa yanji cuononga nthaka?’ 8 Wosamalila munda, eyankha kuti, ‘Ambuye, cisiyeni kwa caka tyala cimozi. Neo nikumbe m’mbali mwa cimuti ici notilamo manyowa. 9 Ngati cikatwale vipaso msogolo, zikankhale bwino. Koma ngati cikatwale lini, mukacitende.’”
10 Pa nthawi iyakine, enzophunzisa m’sunagoge iyakine pa Sabata. 11 M’sunagoge umu mwenze munakazi muyakine wamene enze na mzimu wamene wenzomufokesha* kwa vyaka 18. Yove enze wobenda ngako msana ndipo enzokwanisha lini kuŵelamuka olo patontho. 12 Yesu pecimuona, elaŵila naye ndipo emuuzhya kuti: “Weo munakazi, wamasuka ku matenda ŵako.” 13 Pavuli pake, eika manja ŵake pali munakazi uyu ndipo nthawi yamene iyo eŵelamuka noyamba kutamanda Mulungu. 14 Koma msogoleli wa sunagoge peciona izi, ekalipa ngako cifukwa Yesu epolesha munthu pa Sabata. Tetyo, euzhya gulu ya ŵanthu kuti: “Pali masiku 6 yatufunika kukata nchito. Tetyo, mukowela masiku amene ao kuzopoleshewa, osati pa siku ya Sabata.” 15 Koma Ambuye emuyankha kuti: “Mweo ŵanthu acinyengo, kansi aliyense wa mweo omasula lini ng’ombe yake kapena bulu wake m’ciŵaya pa Sabata noluta naye kuyomumwesha manzi? 16 Kansi munakazi uyu wamene ni mwana wa Abulahamu, wamene Satana enze emumanga kwa vyaka 18, enzofunika lini kumasuliwa pa siku ya Sabata?” 17 Pecilaŵila izi, ŵanthu onse amene enzomususha ecimvwa nsoni. Koma gulu yonse ya ŵanthu yeyamba kusangalala cifukwa ca vinthu vodabwisa vecicita.
18 Tetyo, epitilizhya kulaŵila kuti: “Kansi Ufumu wa Mulungu uli monga ni cinji, ndipo ningaulinganizhye na cinji? 19 Uli monga ni kansele ka mpilu* kamene munthu ekatola nokakomola m’munda mwake. Pavuli pake, kemela nonkhala cimuti cakuti tunyoni twa m’mululu twemanga tuvumbo m’misambo yake.”
20 Yove elaŵila soti kuti: “Kansi Ufumu wa Mulungu ningaulinganizhye na cinji? 21 Uli monga ni vofufumisha vecitola munakazi muyakine noviyavizhya na fulawu wokwanila mipimo itatu ikulu-ikulu ndipo pavuli poukanya, fulawu wonse wefufumuka.”
22 Yesu eyenda mu mzinda na mzinda koma soti munzi na munzi. Yove enzophunzisa nopitilizhya ulwendo wake wakuya ku Yerusalemu. 23 Pavuli pake, munthu muyakine emukonsha kuti: “Ambuye, kansi n’cendi kuti ŵanthu ati akapulumuke ni atontho?” Yove eŵauzhya kuti: 24 “Yesayesani mwamphamvu kuti muloŵe pa mlyango utontho. Cifukwa nukuuzhyani kuti ŵanthu anyinji akafunishishe kuloŵapo koma akakwanishe lini. 25 Mwineco wa ng’anda akayonyamuka nokhoma ciseko, mweo mukapaname panja nogogoda paciseko ndipo mukalaŵile kuti, ‘Ambuye, tisegulilenkoni.’ Koma yove akakuyankheni kuti: ‘Nuziŵa lini kwamucokela.’ 26 Pavuli pake, mukayambe kulaŵila kuti, ‘Tenzokulya na kumwa pamenso panu ndipo mweo mwenzophunzisa m’miseu yasu.’ 27 Koma yove akakuuzhyeni kuti, ‘Nuziŵa lini kwamucokela. Cokani pamenso pangu mweo monse amene mucita vinthu vosalungama!’ 28 Kwamene uko, mukalile nokukuta menu yanu mukayoona Abulahamu, Isaki na Yakobo na aneneli onse mu Ufumu wa Mulungu apo n’kuti mweo akuponyani kunja. 29 Kuyangizhyila apo, ŵanthu akawele kufumila ku m’mawa na ku m’cingulo koma soti ku mpoto na ku m’mwela ndipo akankhale pa thebo mu Ufumu wa Mulungu. 30 Kulaŵila cendi, ŵala osilizhyila akankhale oyambilila, ndipo oyambilila akankhale osilizhyila.”
31 Pa nthawi yamene iyo, kwewela Afarisi ayakine ndipo emuuzhya kuti: “Cokani kuno ndipo mulute kutali cifukwa Herode ofuna kukupayani.” 32 Yove eŵayankha kuti: “Nkhoyani mukauzhye nkhandwe yamene iyo kuti, ‘Neo nucosa viŵanda nopolesha ŵanthu lelo na mailo, ndipo pa siku yacitatu nikasilizhye.’ 33 Olo n’tetyo, nipitilizhye ulwendo wangu lelo, mailo na mazo, cifukwa n’kosayenela kuti mneneli amupaile kunja kwa Yerusalemu. 34 Yerusalemu, Yerusalemu, weo upaya aneneli koma soti utema miyala ŵanthu amene otumizhyiwa kuli weo. Mowelezhyawelezhya, nenzofuna kusonkhanisha ŵana ŵako pamozi monga ni mwamene nkhuku yusonkhanishila ŵana ŵake m’mapapiko ŵake. Koma weo uliyofune izi. 35 Lomba mvwaya! Mulungu wacoka nokusiila ng’anda yako. Nukuuzhyani kuti kuyambila lelo, mukanione lini soti mpaka pati mukalaŵile kuti: ‘Wodalisiwa ni ula wamene akuza m’zina ya Yehova!’”