Uthenga Wabwino Wolembewa na Maliko
5 Pavuli pake, Yesu efwika kusilya iyakine ya nyanja, m’dela ya Agerasa. 2 Pavuli pakuti waseluka m’boti, nthawi yamene iyo ekumana na munthu wamene enze na mzimu uipa apo n’kuti osokoloka kufumila pa manda.* 3 Yove enzokonda kunkhala pa manda apa ndipo kucokela kuvuli konse mpaka pa nthawi iyi, paliye aliyense enzokwanisha kumumanga olo na cheni, cifukwa yove enzoitenda. 4 Kanyinji-kanyinji, enzokonda kumumanga na matangaza koma soti macheni koma yove enzotenda macheni aŵa nothyola matangaza aŵa cakuti paliye munthu aliyense wamene enzokwanisha kumugonjesa. 5 Ndipo nthawi zonse, usiku na mzuŵa, enzokuwa pa manda na m’malupili koma soti enzozicekaceka na miyala. 6 Koma peciona Yesu capatali, emuutukila nomugwadila. 7 Pavuli pake, ekuwa mwamphamvu kuti: “Nakulakwilani cinji mweo Yesu Mwana wa Mulungu Wapalulu Ngako? Nukulumbilishani pali Mulungu kuti musaninzunze.” 8 Ekamba izi cifukwa Yesu enzouzhya mzimu ula kuti: “Fuma muli munthu uyu, weo mzimu uipa.” 9 Koma Yesu ekonsha munthu uyu kuti: “Kansi niwe ŵani zina yako?” Munthu uyu eyankha kuti: “Zina yangu n’ne Gulu, cifukwa nise anyinji.” 10 Ndipo epitilizhya kupapatila Yesu kuti asatumizhye mizimu iyi kutali na dela iyi.
11 Pa nthawi iyi, gulu ikulu ya nkhumba yenzolyela mu lupili. 12 Tetyo, mizimu iyi yeyamba kumupapatila kuti: “Titumizhyeni kuti tikaloŵe mu nkhumba izo.” 13 Ndipo yove eilola. Pavuli pa izi, mizimu iyi iipa yefuma na kuyoloŵa mu nkhumba ndipo nkhumba zonse zeutukila ku m’polipoli na kuyolumphila m’nyanja. Nkhumba izi zenze pafupifupi 2,000 ndipo zembila m’nyanja. 14 Koma aciŵeta a nkhumba izi, ethaŵa na kuyouzhya ŵanthu za nkhani iyi mu mzinda na m’minzi ndipo ŵanthu ewela kuti aone zecitika. 15 Tetyo, efwika kwenze Yesu ndipo eona munthu ula wamene enze na ciŵanda wamene poyamba enze na gulu ya mizimu iipa apo n’kuti wankhala pansi, wavwala bwino-bwino koma soti maganizo ŵake ali bwino-bwino. Ndipo ove ecita wowa. 16 Kuyangizhyila apo, ŵanthu ŵala amene eona zecitika, efotokozela ŵanthu aŵa zecitikila munthu wamene enze na ciŵanda koma soti nkhumba zala. 17 Tetyo, eyamba kupapatila Yesu kuti acoke mu dela yao.
18 Yesu peenzokwela boti, munthu ula wamene enze na ciŵanda emupapatila kuti alutile naye pamozi. 19 Yesu aliyomulole koma emuuzhya kuti: “Nkhoya ku ng’anda kuli abululu ŵako ndipo ukaŵauzhye vinthu vonse vawakucitila Yehova na cifundo cawakuonesha.” 20 Tetyo, munthu ula eluta ndipo eyamba kuuzhya ŵanthu ku Dekapoli* vinthu vonse vecimucitila Yesu. Ndipo ŵanthu onse edabwa ngako.
21 Pavuli pakuti Yesu wataukila soti ku mbali iyakine ya nyanja na boti, gulu ikulu ya ŵanthu yesonkhana kuli yove apo n’kuti yove ali m’mbali mwa nyanja. 22 Pavuli pake, m’mozi mwa asogoleli a sunagoge wa zina yakuti Yairo, eluta ku malo uku. Peciona Yesu, egwada pafupi na mendo yake. 23 Yove emupapatila kanyinji kuti: “Mwana wangu munakazi, ni wolwala ngako.* Conde, tiyeni mukamukate kuti apole nonkhala na moyo.” 24 Peecimvwa izi, Yesu elutila naye pamozi koma gulu ikulu ya ŵanthu yemukonkha, ndipo yenzomupanikizhya.
25 Penze munakazi muyakine wamene enzolwala matenda otaya milopa kwa vyaka 12. 26 Madokota anyinji emucitisha kuti amvwe voŵaŵa vinyinji. Ndipo eseŵenzesha cuma cake conse pofuna kuti apole koma aliyopole. M’malo mwake, matenda ŵake enzokulilako. 27 Peecimvwa zokhuza Yesu, yove eluta kuvuli kwake pakati pa gulu ya ŵanthu nokata covwala cakunja ca Yesu. 28 Ecita izi cifukwa mu mtima mwake enzokamba kuti: “Nikakatako tyala covwala cake cakunja, ninkhale bwino.” 29 Nthawi yamene iyo, eleka kutaya milopa. Ndipo ezimvwa kuti wapola matenda ŵake akulu.
30 Izi pezecitika, Yesu ecimvwa kuti mphamvu zacoka m’muŵili mwake ndipo ecunguluka nokonsha gulu ya ŵanthu kuti: “Ni ŵani wakata covwala cangu cakunja?” 31 Ophunzila ŵake emukonsha kuti: “Ndaŵa yanji mukonsha kuti, ‘Ni ŵani wanikata,’ koma muona kuti pano pali gulu ya ŵanthu yamene yukupanikizhyani?” 32 Koma yove eyamba kuloleshalolesha kuti aziŵe munthu wamene enze ekata covwala cake. 33 Cifukwa cakuti munakazi ula eziŵa zecitika, ecita wowa noyamba kunjenjemela ndipo eluta kuli Yesu nogwada pamenso pake nomuuzhya zonse. 34 Yesu emuuzhya kuti: “Mwanawe, cikhulupililo cako cakupolesha. Nkhoya mwamtendele ndipo matenda ŵako akulu apoleletu.”
35 Peenze akalulaŵila, ŵanthu ayakine ewela kufuma ku ng’anda ya msogoleli wa sunagoge ula ndipo emuuzhya kuti: “Mwana wanu wamwalila kale, ndaŵa yanji muvutisha Mphunzisi?” 36 Yesu ecimvwa mau ŵao ndipo euzhya msogoleli wa sunagoge kuti: “Osacita wowa, nkhala tyala na cikhulupililo.” 37 Pa nthawi iyi, aliyolole kuti aliyense amukonkhe kupatulapo tyala Petulo, Yakobo na Yohane mkwake wa Yakobo.
38 Tetyo pecifwika ku ng’anda ya msogoleli wa sunagoge, epeza kuti gulu ya ŵanthu yulila mokuwa. 39 Peciloŵa mkati, euzhya gulu ya ŵanthu kuti: “Ndaŵa yanji mulila nopanga congo teti? Mwana uyu aliyomwalile koma aliyone.” 40 Pecilaŵila izi, ove eyamba kumuseka nomusula. Koma pavuli pouzhya ŵanthu onse kuti acoke panja, yove etola makolo a mwana ula na ŵala ŵeenze nao ndipo eluta kweenze mwana ula. 41 Pavuli pakuti wakata kwanja ya mwana uyu, emuuzhya kuti: “Talʹi·tha cuʹmi,” mau yamene yakamasuliliwa yotanthauza kuti: “Weo kamsimbi, nulaŵila na weo, uka!” 42 Nthawi yamene iyo, kamsimbi keuka noyamba kuyenda. (Kamsimbi aka kenze na vyaka 12.) Ndipo ŵanthu esangalala ngako. 43 Koma Yesu elamula ŵanthu aŵa mwamphamvu kuti asauzhye aliyense zecitika. Ndipo eŵauzhya kuti apase kamsimbi aka cakulya.