Uthenga Wabwino Wolembewa na Mateyo
28 Pavuli pa siku ya Sabata, m’mawa mwa siku yoyamba mu wiki yamene iyo, Mariya Magadala na Mariya muyakine eluta kuyoona manda.
2 Pecifwika pafupi, ezindikila kuti penze pecitika civomezi camphamvu, cifukwa mngelo wa Yehova enze ewela kufumila kululu ndipo ekunkhuluzhya cimwala cenze pa manda nonkhala pa cimwala camene ico. 3 Yove enzooneka monga ni kaleza ndipo vovwala vake venze vituŵa ngako. 4 Cifukwa coyopa mngelo uyu, ŵanthu amene enzolonda manda aŵa enjenjemela ndipo eyuma monga kuti afwa.
5 Koma mngelo euzhya anakazi aŵa kuti: “Musacite wowa, nuziŵa kuti musakila Yesu wamene epaiwa mwa kucitopacikiwa pa cimuti. 6 Muno muliye, cifukwa waukishiwa monga ni mwecilaŵilila. Welani muone peenze. 7 Tetyo, nkhoyani kamangu mukauzhye ophunzila ŵake kuti waukishiwa kwa akufwa. Ndipo watangula kuluta ku Galileya. Mukamuone kwamene uko. Uyu niye uthenga wanakuletelani.”
8 Tetyo, kamangu ecoka pa manda acikumbuso apo n’kuti ali na wowa koma soti cimwemwe cikulu. Ove eutuka kuyouzhya ophunzila ŵake. 9 Nthawi yamene iyo, Yesu ekumana nao ndipo eŵauzhya kuti: “Muli tyani azimai!” Ove efwika pafupi nomukata ku mendo ndipo emugwadila. 10 Pavuli pake, Yesu eŵauzhya kuti: “Osayopa! Nkhoyani mukauzhye akwangu kuti alute ku Galileya ndipo akanione kwamene uko.”
11 Peenzokuya, masoja ayakine eluta mu mzinda ndipo eluta kuyouzhya ansembe akulu vinthu vonse vecitika. 12 Ansembe akulu pecisonkhana na akulu nolaŵizhyana, ekatizhyana zakuti apase masoja ndalama zinyinji zasiliva. 13 Ndipo eŵauzhya kuti: “Mukolaŵila kuti, ‘Ophunzila ŵake ewela usiku kuzomuiŵa seo petenze yone.’ 14 Ndipo ngati bwanamkubwa angaziŵe za nkhani iyi, timufotokozele.* Tetyo musacite nkhaŵa.” 15 Ove etola ndalama zasiliva nocita monga ni mweciŵalamulila. Nkhani iyi yankhala yowanda pakati pa Ayuda mpaka lomba.
16 Tetyo, ophunzila ŵake okwanila 11 eluta ku Galileya ndipo eciyokumana na Yesu pa lupili monga ni mweenze eŵalonjezela. 17 Pecimuona, emugwadila. Olo n’tetyo, ayakine mwa ove enze aliyokhulupilile kuti enze eona cendi Yesu. 18 Yesu evwendela pafupi na ove ndipo elaŵila kuti: “Neo napasiwa ulamulilo wonse, kululu na pa calo. 19 Tetyo, nkhoyani mukapange ophunzila kufumila ku ŵanthu a mitundu yonse, ndipo mukoŵabatiza m’zina ya Atata, ya Mwana na ya mzimu utuŵa. 20 Mukoŵaphunzisa kuti akosunga vinthu vonse vanakulamulani. Ndipo mukokumbukila kuti nthawi zonse nikonkhala namwe mpaka masilizhyilo a nthawi ino.