Uthenga Wabwino Wolembewa na Mateyo
16 Pavuli pake, Afarisi na Asaduki eluta kuli Yesu. Ndipo pofuna kumuyesa, emusenga kuti aŵaoneshe cizindikilo cofumila kululu. 2 Koma Yesu eŵayankha kuti: “Kukayamba kufipa, mulaŵila kuti, ‘Nyengo inkhale yabwino cifukwa kululu kwasweta monga ni mulilo.’ 3 Ndipo m’mawa mulaŵila kuti, ‘Lelo kuzizile ndipo kulokwe mvula cifukwa kululu kuoneka kusweta koma soti kuli mikumbi.’ Muziŵa kumasulila maonekedwe a kululu, koma mukangiwa kumasulila vizindikilo va nthawi ino. 4 M’badwo uipa na wacigololo* upitilizhya kusenga cizindikilo, koma upasiwe lini cizindikilo ciliconse kupatulapo tyala cizindikilo ca Yona.” Pavuli polaŵila izi, ecokapo noŵasiya.
5 Pavuli pake, ophunzila ŵake etauka kuluta ku mbali iyakine koma eluŵa kunyamula buledi. 6 Yesu eŵauzhya kuti: “Nkhalani menso ndipo musamale na cofufumisha ca Afarisi na Asaduki.” 7 Tetyo ove eyamba kukambilana kuti: “Tiliyonyamule mabuledi powela kuno.” 8 Yesu peciziŵa izi, eŵakonsha kuti: “Mweo acikhulupililo citontho, ndaŵa yanji mulaŵizhyana nkhani yakuti muliyonyamule buledi powela kuno? 9 Kansi mumvwisha lini mphela mfundo yake? Olo kansi mukumbukila lini za ŵanthu 5,000 amene ecilya mabuledi 5, koma soti kupaka kwa mabasiketi a vakulya vesalako yemwetola? 10 Kapena kansi mukumbukila lini za ŵanthu 4,000 amene ecilya mabuledi 7 na kupaka kwa mabasiketi yakulu-yakulu ya vakulya vesalako yemwetola? 11 Lomba ndaŵa yanji muzindikila lini kuti nulaŵila lini namwe zokhuza buledi, koma nulaŵila kuti musamale na cofufumisha ca Afarisi na Asaduki?” 12 Pavuli pake, ove ezindikila kuti enzokamba lini kuti asamale na cofufumisha ca buledi, koma kuti asamale na vinthu veenzophunzisa Afarisi na Asaduki.
13 Pecifwika m’cigao ca Kaisareya wa ku Filipi, Yesu ekonsha ophunzila ŵake kuti: “Kansi ŵanthu okamba kuti Mwana wa munthu ni ŵani?” 14 Ove emuyankha kuti: “Ayakine okamba kuti ni Yohane M’batizi, ayakine okamba kuti ni Eliya ndipo ayakine okamba kuti ni Yeremiya olo m’mozi mwa aneneli.” 15 Pavuli pake eŵakonsha kuti: “Nanga mweo, kansi muziŵa kuti n’ne ŵani?” 16 Simoni Petulo eyankha kuti: “Nimwe Khristu, Mwana wa Mulungu wamoyo.” 17 Yesu emuuzhya kuti: “Niwe wodala Simoni mwana wa Yona cifukwa ni munthu lini wakuululila izi, koma na Atata a kululu akuululila. 18 Nukuuzhya soti kuti: Weo niwe Petulo ndipo pa mwala uyu nikamangepo mpingo wangu. Mageti a Manda* akaugonjese lini. 19 Nikakupase makii a Ufumu wa kululu. Ciliconse cati ukamange pa calo cikankhale kuti camangiwa kale kululu, ndipo ciliconse cati ukamasule pa calo cikankhale kuti camasuliwa kale kululu.” 20 Pavuli pake, Yesu elamula ophunzila ŵake mwamphamvu kuti asauzhye aliyense kuti yove ni Khristu.
21 Kuyambila nthawi yamene iyo, Yesu eyamba kuuzhya ophunzila ŵake kuti yove enzofunika kuluta ku Yerusalemu ndipo kwamene uko enze kuyonzunziwa ngako na akulu, ansembe akulu na alembi nopaiwa. Koma pa siku yacitatu enze kuzoukishiwa. 22 Petulo peecimvwa izi, etola Yesu noluta naye pambali ndipo eyamba kumuzuzula kuti: “Ziwamileni mtima Ambuye. Musalole kuti izi zikucitikileni olo patontho.” 23 Koma Yesu ecunguluka nouzhya Petulo kuti: “Luta kuvuli kwangu Satana! Niwe cokhumudwisha kuli neo cifukwa zauganiza ni maganizo lini a Mulungu koma ni maganizo a ŵanthu.”
24 Pavuli pake, Yesu euzhya ophunzila ŵake kuti: “Ngati munthu ofuna kunikonkha, azikane yeka ndipo anyamule cimuti cake conzunzikilapo nopitilizhya kunikonkha. 25 Cifukwa aliyense wamene ofuna kupulumusa moyo wake, akautaye. Koma aliyense wamene otaya moyo wake cifukwa ca neo, akaupeze. 26 Kulaŵila cendi, kansi ni pindu yanji yaangapeze munthu ngati angankhale na vinthu vonse vili pa calo notaya moyo wake? Kapena kansi ni cinji caangacinjanishe munthu na moyo wake? 27 Cifukwa Mwana wa munthu akawele mu ulemelelo wa Ausuwake pamozi na angelo ŵake. Pa nthawi iyi, akapeleke mphoto kuli aliyense mokatizhyana na vocita vake. 28 Kulaŵila cendi, nukuuzhyani kuti ayakine amene apanama pano akailaŵe lini imfwa olo patontho mpaka akaone Mwana wa munthu akuza mu Ufumu wake coyamba.”