Uthenga Wabwino Wolembewa na Mateyo
3 M’masiku amene ŵala, Yohane M’batizi eluta m’cipululu ca Yudeya noyamba kulalikila, 2 kuti: “Lapani, cifukwa Ufumu wa kululu uli pafupi.” 3 Uyu niye munthu wecilaŵila mneneli Yesaya pecilaŵila kuti: “M’cipululu mwemvwika mau okuwa akuti: ‘Konzani njila ya Yehova! Pangani njila zake kunkhala za siteleti.’” 4 Yohane enzovwala vovwala va usako wa ngamila na beoti yacikumba muluunda mwake. Cakulya cake cenze mphanzi na uci. 5 Tetyo ŵanthu a mu Yerusalemu, mu Yudeya monse na madela onse ozungulila Yorodano, enzoluta kuli yove. 6 Enzoŵabatiza* mu M’mana wa Yorodano ndipo ove enzoulula macimo ŵao patuŵa.
7 Yohane peciona Afarisi na Asaduki anyinji akuza kuli yove kuti aŵabatize, eŵauzhya kuti: “Mweo ŵana anjoka, kansi ni ŵani wakucenjezhyani kuti muthaŵe ukali wamene ukuza? 8 Citani zinthu zoonesha kulapa. 9 Osazipusisha poziuzhya kuti, ‘Nise ŵana ŵa Abulahamu.’ Cifukwa Mulungu angakwanishe kuukishila Abulahamu ŵana kufumila ku miyala iyi. 10 Katemo kaikiwa kale pa mizhyu ya vimiti. Tetyo cimuti ciliconse camene cutwala lini vipaso vabwino, citendewe noponyewa pa mulilo. 11 Neo nukubatizani na manzi cifukwa cakuti mwalapa. Koma akuza pavuli pangu ali na mphamvu kupambana neo ndipo n’ne wosayenelela kumuvula masanda.* Yove akakubatizeni na mzimu utuŵa na mulilo. 12 Fosholo youluzila mungu ili m’manja mwake, ndipo yove akatuŵishe ngako malo ŵake opunthilapo mbeu. Akaike witi m’cimphaka koma mungu akaushoke pa mulilo wamene ungazimishiwe lini.”
13 Pavuli pake, Yesu efuma ku Galileya noluta ku M’mana wa Yorodano kwenze Yohane kuti amubatize. 14 Koma Yohane M’batizi eyesa kumulesha mwa kumuuzhya kuti: “ Neo niye nufunika kubatiziwa na mweo, nanga mukuza tyani soti kuli neo?” 15 Yesu emuyankha kuti: “Leka kuti pali pano zinkhale teti cifukwa kucita izi kutiyavye kucita zonse zolungama.” Pavuli pake, eleka kumulesha. 16 Pavuli pakuti Yesu wabatizika, evuuka m’manzi. Nthawi yamene iyo, kululu kweseguka ndipo eona mzimu wa Mulungu wamene wenzooneka monga nkhunda ukuza pali yove nomundata. 17 Pemvwika soti mau kufumila kululu akuti: “Uyu ni mwana wangu wanukonda ndipo nukondwela naye.”