Uthenga Wabwino Wolembewa na Mateyo
17 Pavuli pa masiku 6, Yesu etola Petulo, Yakobo na Yohane mkwake wa Yakobo ndipo eluta nao mu lupili itali kwaŵeka. 2 Peenze mu lupili umu, maonekedwe ŵake ecinja apo n’kuti ove ololesha. Cinso cake cewala monga ni zuŵa ndipo vovwala vake vakunja vewala ngako. 3 Nthawi yamene iyo, eona Mose na Eliya apo n’kuti okamba na Yesu. 4 Pavuli pake, Petulo euzhya Yesu kuti: “Ambuye, zingankhale bwino kuti tikonkhala pamene pano. Ngati mufuna, ningamange misasa itatu. Umozi wanu, uyakine wa Mose koma soti wa Eliya.” 5 Akaliyosilizhya kulaŵila, mkumbi wowala ngako weŵavwinikila ndipo mu mkumbi uyu mwemvwika mau akuti: “Uyu ni Mwana wangu, wanukonda ndipo nukondwela naye. Mukomumvwila.” 6 Ophunzila ŵake peecimvwa izi, egwada noŵelama mpaka vinso vao pansi ndipo ecita wowa ngako. 7 Tetyo, Yesu eluta pafupi noŵakata, ndipo eŵauzhya kuti: “Nyamukani. Osacita wowa.” 8 Pecinyamula mitu yao, eona kuti penze Yesu tyala. 9 Peenzoseluka mu lupili, Yesu eŵalamula kuti: “Musauzhyeko aliyense za mensomphenya yamwaona mpaka Mwana wa munthu akaukishiwe kwa akufwa.
10 Koma ophunzila aŵa emukonsha kuti: “Lomba ndaŵa yanji alembi olaŵila kuti, Eliya ofunika kuwela coyamba?” 11 Yove eŵayankha kuti: “Eliya akawele cendi ndipo akawezhyeleshe vinthu vonse. 12 Koma, nukuuzhyani kuti Eliya ewela kale koma ove aliyomuzindikile ndipo emucitila vilivonse veenzofuna ove. Molingana na izi, ove akavutishe soti Mwana wa munthu.” 13 Pavuli pake, ophunzila ŵake ezindikila kuti enzoŵauzhya zokhuza Yohane M’batizi.
14 Pecifwika pafupi na gulu ya ŵanthu, munalume muyakine eluta kuli yove nomugwadila ndipo emuuzhya kuti: 15 “Ambuye, mucitileni cifundo mwana wangu munalume cifukwa ali na khunyu ndipo olwala. Kanyinji-kanyinji, oponela pa mulilo koma soti m’manzi. 16 Nenze namutwala kuli ophunzila ŵanu, koma aliyokwanishe kumupolesha.” 17 Yesu eyankha kuti: “Mweo m’badwo uliye cikhulupililo koma soti wa maganizo olakwika, kansi nipitilizhye kunkhala namwe mpaka lini? Kansi nikupilileni mpaka lini? Muleteni kuno.” 18 Pavuli pake, Yesu ezuzula ciŵanda ici ndipo cecoka. Nthawi yamene iyo, mlumbwana uyu enkhala bwino. 19 Pavuli pake, ophunzila ŵake eluta kuli yove peenze kwayeka nomukonsha kuti: “Ndaŵa yanji seo takangiwa kucosa ciŵanda cala?” 20 Yove eŵauzhya kuti: “N’cifukwa cakuti muli na cikhulupililo citontho. Kulaŵila cendi, nukuuzhyani kuti, ngati mungankhale na cikhulupililo colingana na kansele ka mpilu kucepa kwake, mukwanishe kuuzhya lupili iyi kuti, ‘Coka pano ulute apo,’ ndipo icoke cendi. Paliye ciliconse cati cinkhale cosakwanishika kuli mweo.” 21 ——
22 Peenze esonkhana pamozi ku Galileya, Yesu eŵauzhya kuti: “Mwana wa munthu akapelekewe m’manja mwa ŵanthu. 23 Ŵanthu amene aŵa akamupaye, koma pa siku yacitatu akaukishiwe.” Ophunzila ŵake peecimvwa izi, ecita cisoni ngako.
24 Pecifwika ku Kaperenao, ŵanthu amene enzosonkhesha msonkho wa madalakima aŵili eluta kuli Petulo nomukonsha kuti: “Kansi mphunzisi wanu olipila msonkho wa madalakima aŵili?” 25 Yove eyankha kuti: “Eee.” Koma peciloŵa m’ng’anda akaliyolaŵila ciliconse, Yesu emukonsha kuti: “Kansi uganiza tyani Simoni? Kansi mafumu a pa calo olandila misonkho kufumila kuli ŵani? Kufumila kuli ŵana ŵao olo kuli ŵanthu acilwendo?” 26 Peciyankha kuti: “Kufumila kuli ŵanthu acilwendo,” Yesu emuuzhya kuti: “Niye kuti ŵana ŵao ofunika lini kupeleka msonkho. 27 Koma kuti tisaŵakhumudwishe, nkhoya ku nyanja ukaponye mbezo pa manzi, kuti ukashe nsomba. Ukatole nsomba yati ukayambile kukasha noisegula ku kamwa ndipo ukapezemo kakoini kamozi ka siliva.* Ukatole kakoini aka kuti ukalipilile msonkho wangu na wako.”