Uthenga Wabwino Wolembewa na Mateyo

27 Siku yokonkhapo m’mawa, gulu yonse ya ansembe akulu na akulu ekambilana nokatizhyana zakuti apaye Yesu. 2 Pavuli pakuti amumanga, emupeleka m’manja mwa bwanamkubwa, Pilato.

3 Yudasi wamene niye emupeleka peciona kuti Yesu waweluziwa kuti apaiwe, ecimvwa cisoni ngako ndipo ewezhya ndalama 30 zasiliva kuli ansembe akulu na akulu. 4 Yove elaŵila kuti: “Nacimwa, napeleka munthu wosalakwa.”* Ove emuyankha kuti: “Kansi zutikhuza tyani zamene izo? Uziŵe weka cocita.”* 5 Tetyo, yove eponya ndalama izi zasiliva m’kacisi noluta. Pavuli pake, eluta kuyozimangilila. 6 Koma ansembe akulu etola ndalama izi zasiliva nolaŵila kuti: “N’cosaloleka kuziika mu cosungilamo cuma copatulika cifukwa ni malipilo a milopa.” 7 Pavuli polaŵizhyana, ekatizhyana kuti ndalama izi agulile munda wa munthu woumba manongo kuti unkhale manda ya alwendo. 8 Tetyo, munda uyu wankhala uitiwa kuti Munda wa Milopa mpaka lelo. 9 Izi zekwanilisha mau yecilaŵila mneneli Yeremiya akuti: “Ndipo etola ndalama 30 zasiliva, mtengo wogulila munthu koma soti mtengo wecimuikila ayakine mwa ŵana a Isiraeli, 10 nogulila munda wa woumba manongo mokatizhyana na zecinilamula Yehova.”

11 Pavuli pake, Yesu epanama pamenso pa bwanamkubwa ndipo bwanamkubwa emukonsha kuti: “Kansi niwe Mfumu ya Ayuda?” Yesu eyankha kuti: “Zamwalaŵila, ni mwamene.” 12 Peenzonenezewa na ansembe akulu na akulu, yove aliyoyankhe ciliconse. 13 Pavuli pake, Pilato emukonsha kuti: “Kansi ukumvwa lini vinthu vonse ivi vakukuneneza?” 14 Koma enkhala tyala celele, osayankha ciliconse cakuti bwanamkubwa edabwa ngako.

15 Pa cikondwelelo ciliconse, bwanamkubwa enzomasula mkaidi m’mozi wamene ŵanthu enzofuna kuti amasuliwe. 16 Pa nthawi iyi, penze mkaidi muyakine woyofya ngako wa zina yakuti Baraba. 17 Tetyo ŵanthu pecisonkhana pamozi, Pilato eŵakonsha kuti: “Kansi mufuna kuti nikumasulileni ŵani, Baraba kapena Yesu wamukuti ni Khristu?” 18 Cifukwa Pilato enzoziŵa kuti emupeleka m’manja mwake cifukwa ca nsanje. 19 Kuyangizhyila apo, pecinkhala pa mpando woweluzila milandu, mkazi wake emutumizhyila uthenga wakuti: “Nkhani ya munthu uyu wolungama isakukhuzeni cifukwa neo lelo navutika ngako m’maloto cifukwa ca munthu uyu.” 20 Koma ansembe akulu na akulu elimbikisha gulu ya ŵanthu kuti asenge kuti aŵamasulile Baraba, koma Yesu apaiwe. 21 Bwanamkubwa eŵakonsha kuti: “Pa ŵanthu aŵili aŵa, kansi mufuna kuti nikumasulileni ŵani?” Ove eyankha kuti: “Baraba.” 22 Pilato eŵakonsha soti kuti: “Lomba, kansi mufuna kuti nicite naye cinji Yesu wamukuti ni Khristu?” Onse eyankha kuti: “Apacikiwe!”* 23 Yove eŵakonsha kuti: “Ndaŵa yanji? Kansi wacita cinthu ciipa cotyani?” Koma ove epitilizhya kukuwa ngako kuti: “Apacikiwe tyala!”

24 Peciona kuti ŵanthu aŵa ocinja lini maganizo ŵao na kuti ayamba cipwilikiti, Pilato etola manzi nosamba m’manja pamenso pa gulu ya ŵanthu ndipo elaŵila kuti: “Neo niliye mlandu wa milopa ya munthu uyu. Zonse zili m’manja mwanu.” 25 Peecimvwa izi, ŵanthu onse eyankha kuti: “Lekani kuti milopa yake inkhale pali seo na ŵana ŵasu.” 26 Tetyo, eŵamasulila Baraba koma elamula kuti Yesu akwapuliwe nomupeleka kuti akapaiwe mwa kumupacika pa cimuti.

27 Pavuli pake, masoja a bwanamkubwa etola Yesu noluta naye ku ng’anda kwa bwanamkubwa. Kwamene uku esonkhanisha gulu yonse ya masoja. Ndipo gulu iyi yezungulila Yesu. 28 Pavuli pake, emuvula vovwala vake nomuvwalika cinyula cisweta ngako. 29 Epanga soti cisote cacifumu ca minga nomuvwalika ku mutu. Ndipo emukatisha tete ku kwanja yake yamalendi. Pavuli pake, emugwadila noyamba kumunyoza kuti: “Muli tyani,* mweo mfumu ya Ayuda!” 30 Ndipo emutila mata notola tete ila noyamba kumuniata nayo ku mutu. 31 Pecisilizhya kumunyoza, emuvula cinyula cisweta nomuvwalika covwala cake cakunja. Ndipo eluta naye kuyomukhokhomela pa cimuti.

32 Peenzokuya, ekumana na munthu muyakine wa ku Kurene wa zina yakuti Simoni. Ove ekakamizhya munthu uyu kuti anyamule cimuti conzunzikilapo ca Yesu. 33 Pecifwika pa malo oitiwa kuti Gologota, kutanthauza kuti, Malo a Sikeletoni ya Mutu, 34 epasa Yesu waini woyavizhya na vinthu voŵaŵa kuti amwe. Koma peciulaŵa, yove ekana kumwa. 35 Pecimukhomelela pa cimuti, ove egaŵana vovwala vake vakunja mwa kucita maele 36 ndipo enkhala pansi pa malo amene aŵa noyamba kumulonda. 37 Kuyangizhyila apo, palulu pa mutu wake eikapo cikwangwani coonesha mlandu wecimupaila kuti: “Uyu ni Yesu, Mfumu ya Ayuda.”

38 Ndipo akawalala aŵili epacikiwa naye pamozi, muyakine ku kwanja yake yamalendi ndipo muyakine ku yamanjele. 39 Ŵanthu amene enzopita pafupi enzolaŵila mau onyoza Yesu ndipo enzozunguzhya mitu yao 40 nolaŵila kuti: “Weo wamene wenzolaŵila kuti ungakwanishe kugumula kacisi noumanga soti m’masiku atatu, zipulumuse weka. Ngati niwe cendi mwana wa Mulungu, seluka pa cimuti conzunzikilapo.” 41 Ansembe akulu, alembi na akulu nao eyamba kumunyoza kuti: 42 “Enzokwanisha kupulumusa ayakine koma wakangiwa kuzipulumusa. Ngati ni Mfumu cendi ya Isiraeli, aseluke pa cimuti conzunzikilapo ndipo timukhulupilile. 43 Yove okhulupilila Mulungu, tetyo lekani kuti Mulungu amupulumuse ngati omufuna cendi. Cifukwa enzolaŵila kuti, ‘N’ne Mwana wa Mulungu.’” 44 Nao akawalala ŵeenze epacikiwa nao pamozi enzomunyoza.

45 Kuyambila ca m’ma 12 awazi,* m’calo conse mwecita mfinzi mpaka kufwika ca m’ma 15 awazi.* 46 Ca m’ma 15 awazi, Yesu ekuwa mwamphamvu kuti: “Eʹli, Eʹli, laʹma sa·bach·thaʹni?” kutanthauza kuti, “Mulungu wangu, Mulungu wangu, Ndaŵa yanji mwanisiya?” 47 Peecimvwa izi, ŵanthu ayakine amene enze epanama pafupi na yove eyamba kulaŵila kuti: “Munthu uyu oita Eliya.” 48 Nthawi yamene iyo, m’mozi mwa ove eutuka notola cinkhupule nocivwivwika mu waini wowawasha ndipo eciika ku tete nomupasa kuti amwe. 49 Koma ŵanthu ayakine onse elaŵila kuti: “Mulekeni, tiyeni tione ngati Eliya awele kuzomupulumusa.” 50 Yesu ekuwa soti mwamphamvu ndipo pavuli pake esilizhyika.

51 Nthawi yamene iyo, ketani ya m’malo opatulika yeng’ambika pakati kufumila palulu mpaka pansi. Calo cenyang’anya koma soti miyala yephwanyika. 52 Manda* yeseguka ndipo mitembo inyinji ya ŵanthu atuŵa amene enze eikiwa mwamene umu yeponyewa kunja. 53 Ŵanthu anyinji ekwanisha kuiona. (Pavuli pakuti Yesu waukishiwa, ŵanthu amene enzocokela ku manda aŵa eloŵa mu mzinda utuŵa.) 54 Koma mkulu wa masoja na ŵanthu ŵeenze nao polonda Yesu, peciona civomezi na vinthu vonse vecitika, ove ecita wowa ngako ndipo elaŵila kuti: “Uyu enze cendi Mwana wa Mulungu.”

55 Kuyangizhyila apo, anakazi anyinji enze kwamene uku ndipo enzoona zenzocitika apo n’kuti ali capatali. Ove enze ekonkha Yesu peenzocoka ku Galileya kuti akomutumikila. 56 Ayakine mwa ove enze Mariya Magadala na Mariya amai ŵake a Yakobo na Yose. Penze soti amai ŵake a Yakobo na Yohane.

57 M’cingulo, kwewela munthu muyakine wolemela wa ku Arimateya, wa zina yakuti Yosefe wamene enze enkhala wophunzila wa Yesu. 58 Munalume uyu eluta kuli Pilato kuyosenga mtembo wa Yesu. Pavuli pake, Pilato elamula kuti amupase mtembo uyu. 59 Yosefe etola mtembo uyu nouvunga pa nyula ituŵa yabwino ngako. 60 Ndipo eluta kuyouika mu manda* yake yanyowani yamene enze eyagoba m’cimwala. Pavuli pake, ekunkhuluzhya cimwala cikulu novala pa mlyango wa manda* aya, ndipo ecokako. 61 Koma Mariya Magadala na Mariya muyakine esalila kwamene uku apo n’kuti ankhala pafupi na manda aya.

62 Pavuli pakuti siku Yokonzekela yapita, siku yokonkhapo ansembe akulu na Afarisi esonkhana pamozi pamenso pa Pilato. 63 Ndipo elaŵila kuti: “Bwana, seo takumbukila kuti munthu ula wacinyengo peenze akali moyo, enzolaŵila kuti, ‘Pavuli pa masiku atatu nikaukishiwe.’ 64 Tetyo, lamulani kuti pa manda paikiwe citetezo camphamvu kufwika pa siku yacitatu na colinga cakuti ophunzila ŵake asalute na kuyomuiŵa noyamba kuuzhya ŵanthu kuti, ‘Waukishiwa kwa akufwa.’ Cifukwa cinyengo ici cosilizhyila cikankhale ciipa ngako kupambana coyambilila.” 65 Pilato eŵayankha kuti: “Tolani masoja kuti akalonde. Nkhoyani mukaike citetezo cokwanila monga ni mwamuziŵila.” 66 Tetyo, eluta kuyoika citetezo camphamvu pa manda aya mwa kuvalapo ngako na cimwala noikapo masoja kuti akolonda.