Uthenga Wabwino Wolembewa na Mateyo

25 “Ufumu wa kululu tingaulinganizhye na ndola 10 zamene zetola malambi yao noluta kuyoyembekeza mkwati. 2 Ndola 5 zenze zopusa, koma ndola 5 zenze zocenjela.* 3 Ndola zopusa zenyamula malambi yao, koma ziliyonyamule mafuta a pambali. 4 Koma zocenjela zenyamula malambi yao pamozi na mafuta a pambali m’mabotolo yao. 5 Cifukwa cakuti mkwati ecelwa kuwela, onse eyamba kukusila ndipo eyona. 6 Pakati pa usiku, kwemvwika mau okuwa akuti: ‘Mkwati ula wafwika! Nkhoyani mukamulandile.’ 7 Nthawi yamene iyo, ndola zonse zeuka nokonza malambi yao. 8 Koma ndola zopusa zeuzhya ndola zocenjela kuti, ‘Tipenkoni mafuta yanu cifukwa malambi yasu yasala patontho kuzima.’ 9 Ndola zocenjela, zeyankha kuti: ‘Ngati tingakupasenkoni, payakine yangatikwanile lini tonse. Tetyo nkhoyani kuli ogulisa, mukagule yanu.’ 10 Peenzokuya kuyogula mafuta, mkwati efwika. Ndola zamene zenze zokonzeka, zeloŵela naye pamozi m’ng’anda mwamene mwenze phwando ya ukwati. Ndipo ciseko cevaliwa. 11 Pavuli pake, ndola ziyakine nazo zewela nolaŵila kuti, ‘Ambuye, Ambuye, tisegulileni!’ 12 Yove eŵayankha kuti, ‘Kulaŵila cendi, nukuziŵani lini.’

13 “Tetyo, pitilizhyani kunkhala menso cifukwa muziŵa lini siku na awa yake.

14 “Cifukwa zili monga ni munthu wamene enzofuna kuluta ku calo ciyakine ndipo eita akapolo ŵake noŵasungizhya cuma cake. 15 Woyamba emupasa ndalama zokwanila matalente* 5, waciŵili emupasa matalente aŵili ndipo wacitatu emupasa talente imozi. Aliyense emupasa molingana na luso yake ndipo yove eluta ku calo ciyakine. 16 Nthawi yamene iyo, ula wamene epasiwa matalente 5 eluta kuyocita malonda na matalente amene aŵa, ndipo epeza matalente ayakine 5 oyangizhyilika. 17 Naye ula wamene epasiwa matalente aŵili ecita soti cimozimozi ndipo epeza matalente ayakine aŵili oyangizhyilika. 18 Koma kapolo wamene epasiwa tyala talente imozi, eluta kuyokumba pansi nofisa ndalama* ya ambuye ŵake.

19 “Pavuli pa nthawi itali, ambuye ŵao ŵa akapolo aŵa ewela kuzoŵelengelana nao ndalama izi. 20 Tetyo, kapolo wamene epasiwa matalente 5, ewela na matalente 5 oyangizhyilika nolaŵila kuti, ‘Ambuye, mwenipasa matalente 5 koma onani, napezelapo matalente ayakine 5.’ 21 Ambuye ŵake emuuzhya kuti: ‘Wacita bwino ngako. Niwe kapolo wabwino koma soti wokhulupilika. Cifukwa cakuti wenkhala wokhulupilika pa vinthu vitontho, nukuika kuti ukoyanganila vinthu vinyinji. Sangalala pamozi na neo ambuye ŵako.’ 22 Pavuli pake, kwewela kapolo wamene epasiwa matalente aŵili ndipo elaŵila kuti, ‘Ambuye, mwenipasa matalente aŵili koma onani, napezelapo matalente ayakine aŵili.’ 23 Ambuye ŵake emuuzhya kuti: ‘Wacita bwino ngako, niwe kapolo wabwino koma soti wokhulupilika. Cifukwa cakuti wenkhala wokhulupilika pa vinthu vitontho, nukuika kuti ukoyanganila vinthu vinyinji. Sangalala pamozi na neo ambuye ŵako.’

24 “Posilizhyila pake, kapolo wamene epasiwa talente imozi ewela ndipo elaŵila kuti: ‘Ambuye, nenzoziŵa kuti nimwe munthu wovuta, muwezhya kwamuliyokomole ndipo mutunsha witi wamuliyopepeteko. 25 Tetyo, necita wowa ndipo neluta kuyofisa talente yanu pansi. Aneni, tolani ndalama yanu.’ 26 Ambuye ŵake emuyankha kuti: ‘Weo kapolo muipa koma soti waulesi, wakamba kuti wenzoziŵa kuti nuwezhya kwaniliyokomoleko notunsha witi waniliyopepeteko? 27 Sembe zenkhala bwino kuti wesungizhya ndalama* yangu ku banki. Cifukwa neo panawela sembe anipasa ndalama iyi pamozi na ya palulu.

28 “‘Tetyo, mulondeni talente yaali nayo noipeleka kuli ali na matalente 10. 29 Cifukwa aliyense wamene ali navo akapasiwe viyakine vinyinji, ndipo vikapake ngako. Koma aliye, akalondewe olo vakuganiza kuti ali navo. 30 Ponyani kapolo uyu watyalatyala kunja ku mfinzi. Kwamene uko alile nokukuta menu yake.’

31 “Mwana wa munthu akayowela mu ulemelelo wake pamozi na angelo onse, akankhale pa mpando wake wacifumu waulemelelo. 32 Mitundu yonse ya ŵanthu ikasonkhanishiwe kuli yove. Ndipo akapatule ŵanthu monga ni mwamene mciŵeta opatulila mbelele na mbuzi. 33 Akaike mbelele ku kwanja yake yamalendi koma mbuzi akaziike ku kwanja yake yamanjele.

34 “Pamene apo, Mfumu ikauzhye ati akankhale ku kwanja yake yamalendi kuti: ‘Welani mweo amene mwadalisiwa na Atata, loŵani mu Ufumu wecikukonzelani kuyambila pa ciyambi ca calo. 35 Cifukwa necimvwa njala, koma mweo mwenipasa cakulya. Necimvwa njota, koma mweo mwenipasa manzi. Nenze mlwendo, koma mweo mwenilandila bwino. 36 Nenze na wamba, koma mweo mwenipasa vovwala. Nelwala, koma mweo mwenisamalila. Ndipo neikiwa m’jele, koma mweo mwewela kuzoniona.’ 37 Olungama akamuyankhe kuti: ‘Ambuye, kansi ni lini petekuonani kuti muli na njala, seo nokupasani cakulya, olo ni lini petekuonani kuti muli na njota, seo nokupasani manzi? 38 Ni lini petekuonani kuti nimwe mlwendo, seo nokulandilani bwino, olo ni lini petekuonani kuti mwenze na wamba, seo nokupasani vovwala? 39 Kansi ni lini petekuonani kuti mulwala olo muli m’jele, seo nowela kuzokuonani?’ 40 Mfumu ikaŵayankhe kuti, ‘Kulaŵila cendi, nukuuzhyani kuti nthawi iliyonse yemwecitila vinthu ivi m’mozi mwa akwangu atontho aŵa, mwecitila soti neo.’

41 “Pavuli pake, akauzhye ŵanthu ŵati akankhale ku kwanja yake yamanjele kuti: ‘Cokani pamenso pangu mweo ŵanthu otembelelewa. Lutani ku mulilo wosasila wecikonzela Maleŵania na angelo ŵake. 42 Cifukwa necimvwa njala, koma mweo muliyonipase cakulya. Necimvwa njota, koma mweo muliyonipase manzi. 43 Nenze mlwendo, koma mweo muliyonilandile bwino. Nenze na wamba, koma mweo muliyonipase vovwala. Nelwala koma soti neikiwa m’jele, koma mweo muliyonisamalile.’ 44 Nao akayankhe kuti: ‘Ambuye, kansi ni lini petekuonani kuti mwenze na njala kapena mwenze na njota kapena mwenze mlwendo kapena mwenze na wamba kapena mwenze olwala kapena mwenze mweikiwa m’jele, koma seo osakutumikilani?’ 45 Yove akaŵayankhe kuti: ‘Kulaŵila cendi, nukuuzhyani kuti nthawi iliyonse yamuliyocitile vinthu ivi m’mozi mwa atontho aŵa, muliyocitile soti neo.’ 46 Ŵanthu aŵa akalute ku cionongeko cosasila,* koma olungama akalute ku moyo wosasila.”