Uthenga Wabwino Wolembewa na Maliko
13 Yesu peenzocoka m’kacisi, m’mozi mwa ophunzila ŵake emuuzhya kuti: “Mphunzisi, onani miyala iyi yokongola koma soti mang’anda.” 2 Koma Yesu emukonsha kuti: “Kansi wayaona mang’anda akulu-akulu koma soti okongola aŵa? Pano pakasale lini mwala ulionse palulu pa uyake wati ukalekoponeshewa.”
3 Peenze nkhale payeka mu Lupili ya Maolivi, pa malo pamene kacisi wenzoonekela bwino, Petulo, Yakobo, Yohane na Andireya eluta kuli yove nomukonsha kuti: 4 “Tiuzhyeni, kansi ni lini pati vikacitike vinthu ivi, ndipo cizindikilo ca masilizhyilo a vinthu vonse ivi cikankhale cotyani?” 5 Tetyo, Yesu eyamba kuŵauzhya kuti: “Cenjelani kuti munthu aliyense asakusoŵesheni. 6 Ŵanthu anyinji akawele kuli mweo m’zina yangu nokamba kuti, ‘Khristu ula ni neo,’ ndipo akasoŵeshe ŵanthu anyinji. 7 Mukayokumvwa za nkhondo koma soti malipoti okhuza nkhondo, musakacite wowa, cifukwa vinthu ivi vufunika kucitika masilizhyilo akaliyofwika.
8 “Mtundu ukaukilane na mtundu uyake ndipo ufumu ukaukilane na ufumu uyake. Kukankhale vivomezi m’malo osiyanasiyana koma soti kukankhale njala. Vinthu vonse ivi ni ciyambi ca mavuto akulu.
9 “Koma mweo, mukonkhala osamala. Ŵanthu akakupelekeni ku makhoti atontho-atontho ndipo akakukwapuleni m’masunagoge ŵao. Akakupelekeni kuli olamulila na mafumu cifukwa ca neo, kuti mukacitile umboni kuli ŵeve. 10 Kuyangizhyila apo, uthenga wabwino ufunika kulalikiliwa ku mitundu yonse coyamba. 11 Ndipo akayokupelekani kwamene uko, osati mukacite nkhawa zokhuza mwati mukalaŵilile olo zati mukalaŵile. Zati mukalaŵile, mukapasiwe pa nthawi yamene iyo cifukwa ni mweo lini mwati mukalaŵile koma ni mzimu utuŵa. 12 Kuyangizhyila apo, munthu akapeleke mkwake kuti apaiwe, atata akapeleke mwana wao, ŵana akaukile makolo ŵao ndipo akacitishe kuti apaiwe. 13 Ŵanthu onse akakuzondeni cifukwa ca zina yangu, koma wala wati akapilile* mpaka posilizhyila, akapulumuke.
14 “Koma mukayoona cinthu conyansa coleta cionongeko capanama pa malo pacisafunika kupanama (woŵelenga akazindikile). Pavuli pake, ali mu Yudeya akayambe kuthaŵila ku malupili. 15 Munthu ali pa mtenje wa ng’anda asakaseluke kuti akatole cinthu ciliconse m’ng’anda mwake. 16 Ndipo munthu ali ku munda asakawelele kuli vinthu vawasiya kuvuli kuti akatole covwala cake cakunja. 17 Soka kuli anakazi ati akapezeke kuti ali na mavumo koma soti ati akonyonsha m’masiku amene ao. 18 Pitilizhyani kupemphela kuti musakathaŵe m’nthawi yozizila. 19 Cifukwa masiku amene ao akankhale masiku a cisauso camene cikaliyocitikapo kufumila pa ciyambi ca cilengedwe ca Mulungu mpaka pa nthawi yamene iyo, ndipo cikacitikepo lini soti. 20 Kulaŵila cendi, kuti Yehova aliyofupikishe masiku amene ao, sembe paliye aliyense wayopulumuka. Koma cifukwa ca osankhiwa amene yove eŵasankha, wafupikisha masiku amene ao.
21 “Ndipo aliyense akayokuuzhyani kuti, ‘Onani! Khristu ula ali kuno,’ kapena ‘Onani! Ali uko!’ musakakhulupilile. 22 Cifukwa kukankhale ŵanthu ati akolaŵila kuti n’ne Khristu koma soti kukankhale aneneli awenye ndipo akacite vizindikilo na vinthu vodabwisa kuti asoŵeshe ŵanthu. Ngati n’zokwanishika, akasoŵeshe soti olo ŵala amene ni osankhiwa. 23 Tetyo, nkhalani osamala cifukwa nakuuzhyilantoni vinthu vonse.
24 “M’masiku amene ao cisauso cikulu cikayosila tyala, zuŵa ikacite mfinzi ndipo mwezi ukawale lini. 25 Nyenyezi zikapone kufumila kululu ndipo mphamvu zili kululu, zikanyang’anye. 26 Ndipo akaone Mwana wa munthu akuza m’mikumbi apo n’kuti ali na mphamvu zinyinji koma soti ulemelelo. 27 Pavuli pake, akatume angelo ndipo akasonkhanishe osankhiwa ŵake pamozi kufumila ku mphepo 4, kufumila kosilizhyila kwa mbali iyakine ya m’mululu mpaka kufwika kosilizhyila kwa mbali iyakine.
28 “Lomba phunzilani kufumila pa fanizo iyi ya cimuti ca mkuyu. Misambo yake itontho-itontho ikaphukila nocosa matepo, muziŵa kuti mainza ali pafupi. 29 Molingana na izi, namwe mukayoona vinthu vonse ivi, mukaziŵe kuti yove ali pafupi, pa mlyango penepene. 30 Kulaŵila cendi, nukuuzhyani kuti m’badwo uyu ukasile lini wonse mpaka vinthu vonse ivi vikacitike. 31 Kululu na calo vikacoke, koma mau ŵangu ankhalepo mpaka kale-kale.
32 “Ponena za siku yamene iyi koma soti awa yake, paliye aliyense oziŵa, olo angelo a kululu kapena Mwana, koma ni Atata tyala. 33 Pitilizhyani kunkhala menso koma soti kunkhala chelu cifukwa nthawi yoikika muiziŵa lini. 34 Zili monga ni munthu wamene akuya ku calo ciyakine ndipo wasiya ng’anda yake m’manja mwa akapolo ŵake. Yove wasiya kapolo aliyense pa nchito yake nolamula kamalonda wa pa geti kuti akonkhala menso. 35 Tetyo, pitilizhyani kunkhala menso cifukwa muziŵa lini nthawi yati akawele mwineco wa ng’anda. Muziŵa lini ngati akawele m’cingulo, pakati pa usiku, m’matemwakuca* kapena m’mamawa, 36 kuti akayowela mosayembekezeleka, asakakupezeni kuti muliyone. 37 Koma mweo monse nukuuzhyani kuti: Pitilizhyani kunkhala menso.”