Uthenga Wabwino Wolembewa na Maliko

14 Kwenze kwesala masiku aŵili kuti Pasika na Cikondwelelo ca Buledi Iliye Vofufumisha vicitike. Ndipo ansembe akulu na alembi enzosakila njila yakuti akatilemo Yesu mocenjela nomupaya. 2 Ecita izi cifukwa ove enzokambilana kuti: “Tufunika lini kuyomukata pa nthawi ya cikondwelelo cifukwa pangayonkhala msokonezo ukulu ngako.”

3 Yesu peenzokulya cakulya ku Betaniya mu ng’anda ya Simoni wamene enze na khate, kwewela munakazi muyakine wamene enze na mafuta onunkhila amene enze m’botolo yopangiwa na mwala wa alabasitala. Mafuta aŵa enze nado wenewene koma soti enze odula ngako. Munakazi uyu esegula botolo iyi ya mafuta mwa kucitoiphwanya ndipo eyamba kutila m’mutu mwa Yesu. 4 Ayakine peciona izi ekalipa ngako ndipo eyamba kulaŵizhyana kuti: “Ndaŵa yanji oononga mafuta aŵa onunkhila? 5 Mafuta aŵa sembe agulisiwa na ndalama zopitilila madinari 300 ndipo ndalama zake sembe tapasa osauka.” Ove ekalipa ngako na zecicita munakazi uyu. 6 Koma Yesu eŵauzhya kuti: “Musiyeni munakazi uyu. Ndaŵa yanji mumuvutisha? Yove wanicitila cinthu cabwino. 7 Cifukwa osauka muli nao nthawi zonse ndipo mungaŵacitile cinthu cabwino nthawi iliyonse yamufuna. Koma neo munkhale lini nane nthawi zonse. 8 Munakazi uyu wacita zaangakwanishe. Yove wanitila mafuta onunkhila pokonzekela kuikiwa kwangu m’manda. 9 Kulaŵila cendi, nukuuzhyani kuti kulikonse kwati ukalalikiliwe uthenga wabwino pa calo conse, zawacita munakazi uyu zikalaŵiliwe soti pomukumbukila.”

10 Pavuli pake, m’mozi mwa ophunzila 12 wa zina yakuti Yudasi Isikarioti, eluta kuli ansembe akulu na colinga cakuti apeleke Yesu kuli ove. 11 Ove peecimvwa izi, esangalala ngako ndipo emulonjeza kuti amupase ndalama zasiliva. Tetyo, kufumila pa nthawi yamene iyi, yove eyamba kusakila mpata wabwino wakuti amupelekelemo m’manja mwa adani.

12 Pa siku yoyamba ya Cikondwelelo ca Buledi Iliye Vofufumisha, peenzopeleka nsembe ya nyama ya Pasika mwamwambo, ophunzila ŵake eluta kuli Yesu nomukonsha kuti: “Kansi mufuna tilute tikakukonzeleni kuni malo kwati mulyele Pasika?” 13 Peecimvwa izi, yove etuma ophunzila ŵake aŵili ndipo eŵauzhya kuti: “Nkhoyani mu mzinda ndipo mukakumane na munalume muyakine wamene wanyamula nongo ya manzi. Mukamukonkhe, 14 mpaka mu ng’anda mwati akaloŵe. Pavuli pake, mukauzhye mwineco wa ng’anda yamene iyo kuti, ‘Mphunzisi watituma kuti tizekukonsheni kuti: “Kansi cipinda ca alwendo cili kuni caningalyelemo Pasika neo na ophunzila ŵangu?”’ 15 Yove akakuonesheni cipinda cikulu capalulu cokonzewa bwino. Mukakonze Pasika mu cipinda camene ico.” 16 Tetyo, ophunzila aŵa eluta. Peciloŵa mu mzinda wamene uyo, zecitika ndendende monga ni mweciŵauzhyila Yesu. Ndipo ekonza vinthu vonse vofunikila pa Pasika.

17 M’cingulo, Yesu eluta ku ng’anda kula na ophunzila ŵake 12. 18 Peenzokulya cakulya pa thebo, Yesu eŵauzhya kuti: “Kulaŵila cendi, nukuuzhyani kuti m’mozi wa mweo wanukulya naye pamozi, anipeleke.” 19 Peecimvwa izi, ophunzila ŵake ecimvwa cisoni ngako ndipo aliyense eyamba kumukonsha kuti: “Kansi n’neo?” 20 Yove eŵayankha kuti: “Ni m’mozi wa mweo 12, munthu wamene otoŵela m’mbale imozi na neo. 21 Mwana wa munthu apelekewe kulingana na zelembewa zokhuza yove. Koma soka kuli munthu wati apeleke Mwana wa munthu. Ndipo sembe zenze bwino kuti munthu wamene uyo enze aliyovyalike.”

22 Akaliyosilizhya kulya, Yesu etola buledi ndipo pavuli popemphela, eisunasuna noŵapasa, ndipo eŵauzhya kuti: “Aneni, lyani. Buledi iyi yupanamila muŵili wangu.” 23 Etola soti kapu ya waini, ndipo pavuli popemphela eŵapasa ndipo onse ecimwa. 24 Ndipo eŵauzhya kuti: “Waini uyu upanamila ‘milopa yangu ya pangano’ yati itaike cifukwa ca ŵanthu anyinji. 25 Kulaŵila cendi, nukuuzhyani kuti nikamwe lini soti cakumwa cocokela ku mphesa mpaka pati nikamwe cakumwa calomba mu Ufumu wa Mulungu.” 26 Pavuli pake, eimba nyimbo zotamanda Mulungu noluta ku Lupili ya Maolivi.

27 Ndipo Yesu eŵauzhya kuti: “Monse munithaŵe nonisiya neka cifukwa Malemba olaŵila kuti: ‘Nikapaye mciŵeta ndipo mbelele zikamwazhyikane.’ 28 Koma nikayoukishiwa, nikatangule kuluta ku Galileya ndipo niye kwati mukanipeze.” 29 Koma Petulo eyankha kuti: “Olo kuti aŵa ayakine onse angakuthaŵeni nokusiyani mweka, neo neka ningakuthaŵeni lini.” 30 Peecimvwa izi, Yesu emuuzhya kuti: “Kulaŵila cendi, nukuuzhya kuti lelo, usiku wa lelo kombwe akaliyolila kaŵili, unikane katatu.” 31 Koma yove epitilizhya kulaŵila kuti: “Olo ngati pangafunike kuti nifwile namwe pamozi, neo ningakukaneni lini.” Ophunzila ayakine onse nao eyamba kulaŵila cimozimozi.

32 Pavuli pake, ove eluta ku malo oitiwa kuti Gesemani, ndipo Yesu euzhya ophunzila ŵake kuti: “Nkhalani pano, neo panukuyopemphela.” 33 Pakuya, etola Petulo, Yakobo na Yohane ndipo yove eyamba kumvwa cisoni na kuvutika ngako mu mtima. 34 Yove eŵauzhya kuti: “Neo nukumvwa cisoni cikulu ngako* cakuti ningafwe naco. Nkhalani pano ndipo pitilizhyani kunkhala menso.” 35 Pecilutako pasogolo patontho, egwada mpaka cinso cake pansi noyamba kupemphela kuti ngati n’zokwanishika awa yamene iyi imupitilile. 36 Ndipo elaŵila kuti:“Abba, Atata, vinthu vonse ni vokwanishika kuli mweo. Nicoseleni kapu iyi. Osati mwa kufuna kwangu koma mwa kufuna kwanu.” 37 Pavuli pake, ewelela penze ophunzila ŵake ndipo eŵapeza kuti aliyone. Tetyo, ekonsha Petulo kuti: “Simoni, kansi n’cendi kuti uliyone? Kansi wenzeve mphamvu zakuti upitilizhye kunkhala menso kwa awa imozi? 38 Pitilizhyani kunkhala menso ndipo osaleka kupemphela kuti musaloŵe m’mayeselo. N’cendi kuti mzimu ni wofunishisha, koma muŵili ni wofoka.” 39 Pavuli pake, eluta soti kuyopemphela ndipo ewelezhya mau yeenze ekamba. 40 Peciwelela soti kuli ophunzila ŵake, eŵapeza soti kuti aliyone cifukwa enzokumvwa tulo. Ndipo ove esoŵa cakuti alaŵile. 41 Pavuli pake, ewelela soti kacitatu kuli ophunzila ŵake ndipo eŵakonsha kuti: “Kansi muyona nopumula pa nthawi monga ino? Onani! Nthawi yakuti Mwana wa munthu apelekewe m’manja mwa ŵanthu ocimwa yakwana. 42 Nyamukani, tiyeni tiyambepo cifukwa wonipeleka ali pafupi.”

43 Peenze akalulaŵila na ophunzila ŵake, Yudasi m’mozi mwa ophunzila 12, ewela pamozi na gulu ikulu ya ŵanthu yamene yenze na mabemba koma soti nkholi. Gulu iyi yenze yetumiwa na ansembe akulu, alembi na akulu. 44 Womupeleka enze eŵapasa cizindikilo, ndipo eŵauzhya kuti: “Munthu wati nikising’e niye wamene, mumukate noluta naye ndipo asathaŵe.” 45 Pavuli pake, Yudasi eluta kuli Yesu nolaŵila kuti: “Rabi!” Ndipo emukising’a mwacikondi. 46 Tetyo, ove emukata nomumanga. 47 Koma m’mozi mwa ophunzila a Yesu etola bemba yake notenda kwatu ya kapolo wa mkulu wa ansembe. 48 Yesu eŵakonsha kuti: “Ndaŵa yanji mwanyamula mabemba na nkholi pakuzonimanga monga kuti n’ne kawalala? 49 Masiku onse nenzonkhala mu kacisi kuphunzisa, koma muliyonimange. Vinthu vonse ivi vacitika kuti Malemba akwanilishiwe.”

50 Pavuli pake, ophunzila ŵake onse emuthaŵa nomusiya yeka. 51 Koma mlumbwana muyakine wamene enze evwinikila tyala nyula yabwino koma mkati enze aliyovwale vovwala vokwanila, eyamba kuŵakonkha capafupi ndipo ŵanthu aŵa enzofuna kumukata. 52 Koma eŵasiila nyula yake m’manja nothaŵa apo n’kuti ni wosavwala mokwanila.

53 Pavuli pake, ove etola Yesu noluta naye kuli mkulu wa ansembe ndipo onse ansembe akulu, akulu na alembi esonkhana kwamene uku. 54 Koma Petulo enzomukonkha capatali mpaka efwika mu luŵanza ya mkulu wa ansembe. Yove enkhala pansi pamozi na anchito a pa ng’anda noyamba kuyota mulilo. 55 Pavuli pake, ansembe akulu na onse a mu Khoti ya Sanihedirini,* enzosakila umboni wakuti ayopezhyele Yesu mlandu na colinga cakuti amupaye, koma aliyopeze umboni ulionse. 56 Ŵanthu anyinji enzopeleka maumboni awenye kuti amupeze mlandu koma maumboni ŵao enzokatizhyana lini. 57 Kuyangizhyila apo, ŵanthu ayakine enzopanama nopeleka umboni wawenye wokhuza yove kuti: 58 “Seo tecimvwa munthu uyu olaŵila kuti, ‘Neo nikaponeshe kacisi uyu wamene wemangiwa na manja ndipo m’masiku atatu nikamange uyakine osati womangiwa na manja.’” 59 Koma olo kuti ove elaŵila izi, maumboni ŵao enzokatizhyana lini mphela.

60 Pavuli pake, mkulu wa ansembe epanama pakati pao nokonsha Yesu kuti: “Kansi uyankha lini ciliconse? Kansi ukumvwa lini zakulaŵila ŵanthu aŵa?” 61 Koma yove enkhala tyala celele osayankha ciliconse. Mkulu wa ansembe eyamba soti kumukonsha kuti: “Kansi niwe Khristu Mwana wa Wodalisiwa?” 62 Pavuli pake, Yesu eyankha kuti: “Eee, ni neo cendi ndipo mukaone Mwana wa munthu apo n’kuti wankhala ku kwanja yamalendi yamphamvu ndipo mukamuone soti apo n’kuti akuza m’mikumbi ya kululu.” 63 Peecimvwa izi, mkulu wa ansembe eng’amba covwala cake ndipo elaŵila kuti: “Kansi pali cifukwa cakuti tisakilile umboni uyakine? 64 Mwazimvwila mweka mwawanyozela Mulungu. Kansi muganizapo tyani pa nkhani iyi?” Onse eyankha kuti ofunika kupaiwa. 65 Ndipo ayakine eyamba kumutila mata, kumuvala pamenso, kumuchaya makhofi nomuuzhya kuti: “Lotela!” Pavuli pomuchaya mbama, masoja a pa khoti emutola.

66 Petulo peenze m’luŵanza iyi, kwewela m’mozi mwa asimbi amene enze anchito a mkulu wa ansembe. 67 Peciona kuti yove oyota mulilo, emuloleshesha nolaŵila kuti: “Namwe mwenze pamozi na Yesu ula wa ku Nazareti.” 68 Koma yove ekana nolaŵila kuti: “Numuziŵa lini ndipo numvwisha lini zaulaŵila.” Pavuli pake, ecoka panja noluta pa geti. 69 Kwamene uku, msimbi muyakine wa nchito emuona ndipo eyamba kuuzhya ŵanthu enze pafupi kuti: “Munalume uyu ni m’mozi mwa ove.” 70 Petulo ekana soti. Pavuli pa kanthawi katontho ŵanthu amene enze epanama pafupi eyamba soti kuuzhya Petulo kuti: “N’cendi, nawe niwe m’mozi mwa ophunzila ŵake. Ndipo niwe wa ku Galileya.” 71 Koma Petulo eyamba kutembelela nolumbila ndipo elaŵila kuti: “Munthu uyu wamulaŵila numuziŵa lini.” 72 Nthawi yamene iyo, kombwe elila kaciŵili ndipo Petulo ekumbukila mau ŵecimuuzhya Yesu akuti: “Kombwe akaliyolila kaŵili, unikane katatu.” Ndipo ecimvwa cisoni noyamba kulila.