Uthenga Wabwino Wolembewa na Luka
18 Pavuli pake, Yesu eŵauzhya fanizo pofuna kuŵayavya kumvwisha kufunika kopemphela nthawi zonse koma soti kuti osati akotaya mtima. 2 Eŵauzhya kuti: “Mu mzinda uyakine mwenze woweluza wamene enzoyopa lini Mulungu koma soti enzolemekeza lini ŵanthu. 3 Mu mzinda uyu mwenze soti munakazi muyakine wamasiye wamene mowelezhyawelezhya enzoluta kuli woweluza uyu nomusenga kuti: ‘Conde, muniweluzile mlandu wangu mwacilungamo na munthu woniimba mlandu.’ 4 Kwakanthawi, woweluza uyu enzofuna lini. Koma pavuli pake, eziuzhya kuti: ‘Olo kuti nuyopa lini Mulungu olo kulemekeza munthu aliyense, 5 nionesheshe kuti cilungamo cacitika kuli munakazi uyu wamasiye cifukwa cakuti onivutisha. Nicite izi kuti aleke kuwela kuzonivuta na vinthu vakusenga.’” 6 Pavuli pake, Ambuye elaŵila kuti: “Mwamvwa zecilaŵila woweluza uyu olo kuti enze wosalungama. 7 Lomba kansi Mulungu aonesheshe lini kuti cilungamo cacitika kuli osankhiwa ŵake amene omulilila mzuŵa na usiku pakuŵalezela mtima? 8 Nukuuzhyani kuti yove akaonesheshe kuti cilungamo cacitika kamangu kuli ove. Lomba kansi Mwana wa munthu akayowela akapeze cendi cikhulupililo monga ni ici pa calo?”
9 Yesu efotokoza soti fanizo iyakine kuli ŵanthu amene enzoziona kuti ni olungama koma soti amene enzoona ayao kuti ni atyalatyala. Elaŵila kuti: 10 “Ŵanthu aŵili eluta ku kacisi kuyopemphela. M’mozi enze Mfarisi ndipo muyakine enze wosonkhesha misonkho. 11 Mfarisi epanama noyamba kupemphela mu mtima mwake kuti, ‘Nukuyamikilani Mulungu wangu cifukwa n’ne wosiyana na ŵanthu ayakine onse. Ove ni akawalala, ni osalungama ndipo ni a cigololo. N’ne soti wosiyana na wosonkhesha misonkho uyu. 12 Neo nuleka kulya kwakanthawi kaŵili pa wiki, ndipo nupeleka cakhumi pa vinthu vonse vanupeza.’ 13 Koma wosonkhesha misonkho epanama capatali ndipo enzofuna lini olo kulolesha kululu. Yove enzoziniata pa nganga apo n’kuti olaŵila kuti, ‘Mulungu wangu, nicitileni cifundo neo munthu wocimwa.’ 14 Nukuuzhyani kuti munthu uyu eluta kwao apo n’kuti oonewa kuti ni wolungama ngako kupambana Mfarisi wala. Cifukwa aliyense wamene oziika palulu akacitishiwe nsoni, koma aliyense wamene olicefya akaikiwe palulu.”
15 Pavuli pake, ŵanthu enzomuletela ŵana atontho-atontho kuti aŵakate.* Koma ophunzila ŵake peciona izi, eyamba kuŵakalipila. 16 Koma Yesu eita ŵana aŵa. Yove elaŵila kuti: “Alekeni ŵana awele kuli neo, musaŵaleshe. Cifukwa Ufumu wa Mulungu ni wa ŵanthu ali monga ni ŵana aŵa. 17 Kulaŵila cendi, nukuuzhyani kuti aliyense wamene olandila lini Ufumu wa Mulungu monga ni mwana mtontho, akaloŵe lini mu Ufumu wamene uyo.”
18 Pavuli pa izi, wolamulila muyakine emukonsha kuti: “Mphunzisi wabwino, kansi nufunika kucita cinji kuti nikapeze moyo wosasila?” 19 Yesu emuyankha kuti: “Ndaŵa yanji uniita kuti wabwino? Paliye wabwino koma tyala Mulungu. 20 Weo uziŵa malamulo akuti: ‘Musacite cigololo, musapaye munthu, osati mukoiŵa, osati mukocitila umboni wawenye koma soti yakuti mukolemekeza ausuwanu na amai ŵanu.’” 21 Munthu ula eyankha kuti: “Nankhala nusunga malamulo yonse aya kuyambila nikali mwana.” 22 Peecimvwa izi, Yesu emuyankha kuti: “Usoŵekela cinthu cimozi. Ukagulise vinthu vonse vauli navo ndipo ndalama zati upeze upase osauka. Ukacita tetyo, unkhale na cuma kululu. Pavuli pake, uwele unkhale wokonkha wangu.” 23 Peecimvwa izi, ecimvwa cisoni ngako cifukwa enze wolemela ngako.
24 Yesu elolesha munthu uyu nolaŵila kuti: “Cikankhale covuta kuli ŵanthu a ndalama kuti akaloŵe mu Ufumu wa Mulungu. 25 Kulaŵila cendi, ni cinthu capafupi kuti ngamila iloŵe pa linso ya nsingano kupambana kuti munthu wolemela akaloŵe mu Ufumu wa Mulungu.” 26 Ŵanthu amene ecimvwa izi elaŵila kuti: “Lomba kansi ni ŵani angapulumuke?” 27 Yove eŵauzhya kuti: “Vinthu vamene ni vosakwanishika kuli ŵanthu, ni vokwanishika kwa Mulungu.” 28 Koma Petulo elaŵila kuti: “Onani! Tesiya vinthu vasu nokukonkhani.” 29 Yesu eŵauzhya kuti: “Kulaŵila cendi, nukuuzhyani kuti paliye aliyense wamene wasiya ng’anda, mkazi, akwake, makolo kapena ŵana cifukwa ca Ufumu wa Mulungu, 30 wati akaleke kupeza vinyinji m’nthawi ino ndipo msogolo akapeze moyo wosasila.”
31 Pavuli pake, etola ophunzila ŵake 12 noluta nao kwaŵeka, ndipo eŵauzhya kuti: “Mvwani! Lomba, tikuya ku Yerusalemu, ndipo vinthu vonse velembewa na aneneli vokhuza Mwana wa munthu vikakwanilishiwe. 32 Mwacisanzo, akamupeleke kuli ŵanthu a mitundu iyakine ndipo akamucitile vinthu viipa, kumunyoza koma soti kumutila mata. 33 Akayosilizhya kumukwapula, akamupaye. Koma pa siku yacitatu akauke.” 34 Olo n’tetyo, ove aliyomvwishe tanthauzo ya ciliconse mwa vinthu ivi cifukwa mau aŵa enze ofisika kuli ove ndipo aliyomvwishe velaŵiliwa.
35 Yesu pecisala patontho kufwika ku Yeriko, munthu muyakine wamene enzololesha lini enze nkhezi m’mbali mwa njila ndipo enzosengasenga. 36 Peecimvwa gulu ya ŵanthu yamene yenzopita, eyamba kukonsha kuti aziŵe zenzocitika. 37 Ŵanthu emuuzhya kuti: “Yesu Mnazareti opita.” 38 Peecimvwa izi, yove ekuwa kuti: “Yesu, Mwana wa Davide, nicitileni cifundo!” 39 Pavuli pake, ŵanthu amene enze pasogolo eyamba kumuzuzula nomuuzhya kuti ankhale celele. Koma peenzomulesha, yove niye pecipitilizhya kukuwa ngako kuti: “Mwana wa Davide, nicitileni cifundo!” 40 Tetyo, Yesu epanama nolamula kuti munthu uyu amulete kuli yove. Pecifwika pafupi, Yesu emukonsha kuti: 41 “Kansi ufuna kuti nikucitile cinji?” Yove eyankha kuti: “Ambuye, niyavyeni kuti niyambe kuona.” 42 Tetyo, Yesu emuuzhya kuti: “Yamba kuona. Cikhulupililo cako cakupolesha.” 43 Nthawi yamene iyo, eyamba kuona ndipo eyamba kumukonkha apo n’kuti otamanda Mulungu. Kuyangizhyila apo, ŵanthu onse amene eona izi etamanda Mulungu.