Davide Aliyocite Wowa

Ko ukonda kucita tyani ukacita wowa?— Mosapenekela ukonda kuluta kuli auso keno kuli anyoko kuti akuyavye, koma pali soti munthu muyakine wamene angakuyavye. Munthu wamene uyo ali na mphamvu ngako kupula munthu muyakine aliyense. Mwa umuziŵa wamene uyo?— Eee, ni Yehova Mulungu. Lomba tiye tisambile za mulumbwana muyambine otomolewa m‘Baibolo, oziŵika kuti Davide. Mulumbwana wamene uyo eziŵa kuti Yehova enze naye nsita zonse, tetyo enzeve wowa.

Akali mwana Davide, makolo ŵake enzomusambizhya kutemwa Yehova. Ici cemuyavya Davide kuti atang’e mtima pecikumana na vinthu vomvwisha wowa. Pofwana kuti enze pa ushamwali na Yehova, eziŵa kuti akomuyavya. Nsita iyambine, Davide penzoŵetela mbelele, kwewela nkhalamu ikulu nipo yekata mbelele yake. Ko uziŵa cecicita Davide? Eipitikisha nkhalamu mpaka eipaya na manja ŵake. Nthawi iyakine soti, Davide epaya cimbalangondo pecikata mbelele yake. Mwa ulingilila kuti ni ŵani emuyavya Davide?— N’cendi, Yehova niye emuyavya.

Davide eonesha soti kutang’a mtima pa nsita iyambine. Aisilaeli enzoniyatana na ŵanthu ayambine enzoitiwa kuti Afilisiti. Pakati pa masoja acifilisiti, penze musoja muyambine enzoziŵika kuti Goliati. Musoja wamene uyo enze mutali ngako nipo enze cimphona. Cimphona camene ici cenzodelela masoja aciisilaeli nipo cenzonyoza zina ya Yehova. Goliati etuntha masoja aciisilaeli kuti aniyatane nao. Aisilaeli ecimvwa wowa ngako kuti aniyatane na Cimphona camene ico. Pecimvwa zamene izi, Davide euzhya Goliati kuti: ‘Nikuniyate, Yehova aniyavye kuti nikugonjese!’ Ko ulingilila kuti Davide enze wotang’a mtima?— Eee, enze wotang’a mtima ngako. Mwa upangwa kuziŵa cecicita pavuli pake?

Davide etola mvuluma yake na myala 5 yosalala luweme noluta kuyoniyatana na cimphona camene ico. Goliati peciona kuti Davide ni mwana, emudelela, koma Davide euzhya Goliati kuti: ‘Weo ukuza kuli neo na cibemba koma neo nikuza kuli weo m’zina ya Yehova.’ Pamene apo, Davide eika mwala mu mvuluma yake noutukila kwenze Goliati. Em’tema nao pakati pa menso nipo epona pansi ali wakufwa. Afilisiti ecita wowa nipo ethaŵa. Pofwana kuti Davide enze mwana, ko ekwanisha tyani kucigonjesa cimphona?— Yehova emuyavya cikomo cakuti ni wamphamvu ngako kupula mwecenzele cimphona.

Mwa ungasambilepo cinji pa nkhani ya Davide?— Yehova ali na mphamvu ngako kupula munthu muyambine aliyense soti ni shamwali wako. Ukayokumana na vinthu vomvwisha wowa nsita iyakine, ukakumbukile kuti Yehova ni wokonzeka kukuyavya kuti uŵe wotang’a mtima.