Yelemiya Aliyoleke Kulaŵila Za Yehova

Nsita ziyakine ŵanthu otiseka keno kukalipa nase tikalaŵila nao za Yehova. Ivi vingaticitishe kuti tileke kulaŵila za Mulungu. Ko nawe wenze wemvwako tetyo?— Baibolo yutiuzhya za mulumbwana muyakine enzotemwa Yehova koma epangwa kuleka kulaŵila za yove. Zina ya mulumbwana wamene uyu enze Yelemiya. Tiye tisambile zinyinji za yove.

Peenze mwana Yelemiya, Yehova emuuzhya kuti enzowamila kucenjezhya ŵanthu kuti aleke kucita vinthu viipa. Ici cenzelini cipepu kuli Yelemiya, nipo enzocita wowa. Tetyo euzhya Yehova kuti ‘nuziŵalini ciningalaŵile, nine mwana.’ Koma Yehova emuuzhya kuti: ‘usacite wowa newo nikuyavye.’

Yelemiya ecenjezhya ŵanthu kuti keno olekalini kucita vinthu viipa Mulungu aŵalange. Mwa ulingilila kuti ŵanthu ecita veciŵauzhya Yelemiya?— Yai. Enzomuseka nom’kalipila nipo ayambine enzopangwa kumpaya. Kansi ulingilila kuti Yelemiya ecimvwa tyani?— Ecimvwa wowa ngako nipo elaŵila kuti: ‘nikalaŵilepo lini soti za Yehova.’ Kansi eleka cendi kulaŵila za Yehova?— Yai, aliyoleke. Yeve enzotemwa ngako Yehova nipo cemukanga kuleka kulaŵila za Yove. Cikomo cakuti Yelemiya aliyeleke kulaŵila, Yehova epitilizhya kumuyavya.

Coonelapo, analume ayakine aipa mitima eponya Yelemiya m’cisime mwenze matika anyinji. Yelemiya enzeve manzi yakumwa keno vakulya. Analume amene aŵo enzopangwa kuti Yelemiya afwele m’cisime. Koma Yehova emuyavya kuti apuzumuke.

Kansi ungasambilepo cinji pa coonelapo ca Yelemiya?— Nangu kuti nsita ziyake enzocita wowa, yove aliyoleke kulaŵila za Yehova. Keno ulaŵila za Yehova ŵanthu angatatike kukuseka nangu kukalipa nawe. Ivi vingakucitishe nsoni keno kukumvwesha wowa. Nangu n’tetyo, osaleka kulaŵila za Yehova. Yove akokuyavya nsita zonse, mwenzoyavyila Yelemiya.