NKHANI YOPHUNZILA 3
NYIMBO 124 Tinkhale Okhulupilika Nthawi Zonse
Yehova Akokuyavyani pa Nthawi Zovuta
“[Yehova] akutang’isheni.”—1 PET. 5:10.
ZATI TIPHUNZILE
Tiphunzile zatingacite kuti tikopindula na thandizo ya Yehova pa nthawi ya mavuto.
1-2. Kansi atumiki a Yehova okhulupilika angakumane na mavuto otyani?
NGATI zinthu ziipa zaticitikila, zingacinje umoyo wasu mosayembekezeleka. Mwacisanzo, mkwasu wokhulupilika wa zina yakuti Luisa emupeza na matenda a khansa. Adokota emuuzhya kuti ankhale tyala na moyo kwa miyezi itontho. Kalongosi Monika na mulume wake enzotumikila Yehova pamozi. Siku iyakine, yove ezindikila kuti mulume wake wamene enze mkulu enze na umoyo wapaŵili ndipo ecita izi kwa vyaka. Kalongosi Olivia wamene ni mbeta, ekakamizhyika kufuma mu ng’anda yake cifukwa cimvula ca cimphepo cenze cesala patontho kuti cicitike. Peciwelela, epeza kuti ng’anda yake yaonongeka. M’kanthawi tyala katontho, miyoyo ya Akhristu aŵa yecinja. Kansi mwekumanako na mavuto yamene yecinja umoyo wanu mosayembekezeleka?
2 Monga atumiki a Yehova okhulupilika, tukumana na mavuto koma soti tulwala monga ni mwakucitila ŵanthu onse. Koma kuyangizhyila apo, tufunika soti kupilila cisuso na cinzunzo kufumila kuli ŵanthu amene ozonda atumiki a Mulungu. Olo kuti Yehova otipewesha lini ku mavuto yonse, yove otilonjeza kuti akotiyavya. (Yes. 41:10) Moyavyiwa na yove, tingapitilizhye kunkhala acimwemwe, kupanga zosankha zanzelu nopitilizhya kunkhala okhulupilika kuli yove olo pa nthawi zovuta. M’nkhani ino, tilaŵizhyane njila 4 zakutiyavyilamo Yehova pa nthawi zovuta. Tilaŵizhyane soti zatingacite kuti tikopindula na thandizo ya Yehova.
YEHOVA AKOKUTETEZANI
3. Tikakumana na mavuto, kansi cingankhale covuta kucita cinji?
3 Vuto. Tikakumana na mayeselo akulu, cingankhale covuta kuganiza bwino nopanga zosankha zanzelu. Ndaŵa yanji? N’cifukwa cakuti tingankhale na cisoni koma soti nkhaŵa. Tingasokonezeke maganizo koma soti kusoŵa cocita. Onani mwamene azilongosi aŵili ŵatatomola poyamba emvwila peenzokumana na mayeselo. Kalongosi Olivia elaŵila kuti, “Cimvula ca cimphepo peciononga ng’anda yangu, nezimvwa kunkhala wosoŵa ndipo necita nkhaŵa ngako.” Ponena zecicita alume ŵake, kalongosi Monika elaŵila kuti: “Nekhumudwa ngako soti. Cenze covuta kucita zinthu monga ni mwenenzocitila kale. Zinthu zamene zenzooneka kuti zinganicitikile lini, zenicitikila.” Kansi Yehova olonjeza kuti akotiyavya tyani tikakumana na mavuto?
4. Molingana na Afilipi 4:6, 7, kansi Yehova otilonjeza cinji?
4 Zakucita Yehova. Otilonjeza kuti akotipasa “mtendele wa Mulungu.” (Ŵelengani Afilipi 4:6, 7.) Mtendele uyu ni cimwemwe catupeza poziŵa kuti tili pa ushamwali wotang’a na Yehova. Mtendele uyu “upambana kuganiza mozama kulikonse.” Kuziŵa izi kutilimbikisha ngako. Mwacisanzo, kansi mwepemphelapo kale mofumila pansi pa mtima kwa Yehova ndipo pavuli pake nonkhala wacimwemwe? Mwecimvwa teti cifukwa Yehova ekupasani “mtendele wa Mulungu.”
5. Kansi mtendele wa Mulungu uteteza tyani mtima na maganizo yasu?
5 Vesi imozimozi yulaŵila kuti mtendele wa Mulungu uteteza ‘mitima yasu na maganizo ŵasu.’ Mau yemasuliliwa kuti “kuteteza,” yenzoseŵenzeshewa ponena za masoja amene enzoteteza mzinda kuli adani. Ŵanthu a mumzinda uyu, enzolala mwamtendele poziŵa kuti masoja oŵateteza. Molingana na izi, ngati mtendele wa Mulungu uteteza mitima na maganizo ŵasu, tunkhala odekha poziŵa kuti nise otetezeka. (Sal. 4:8) Molingana na Hana, olo kuti mavuto ŵasu angasile lini nthawi yamene iyo, tingankhale mphela na mtendele. (1 Sam. 1:16-18) Ndipo tikankhala odekha, cunkhala cosavuta kuganiza bwino nopanga zosankha mwanzelu.
Mukopemphela mpaka pa nthawi yamwamvwa kuti “mtendele wa Mulungu” wateteza mtima na maganizo ŵanu (Onani ndime 4-6)
6. Kansi tufunika kucita cinji kuti tipindule na mtendele wa Mulungu? (Onani soti cithunzithunzi.)
6 Zatufunika kucita. Ngati takumana na mavuto, tufunika kusenga Yehova kuti atiyavye. Motyani? Mwa kumusenga kuti atipase mtendele wa Mulungu. (Luka 11:9; 1 Ates. 5:17) Mkwasu Luis watafotokoza koyambilila, efotokoza zeyavya yove na mkazi wake Ana kuti akwanishe kupilila peciziŵa kuti wangosala tyala na miyezi itontho kuti afwe. Elaŵila kuti: “Pa nthawi yoteti, cunkhala covuta ngako kupanga zosankha mwanzelu pa nkhani yokhuza cithandizo ca mankhwala na nkhani ziyakine. Koma tekwanisha kunkhala na mtendele pa nthawi iyi yovuta, tyala cifukwa cakuti tepemphela kwa Yehova.” Mkwasu Luis na mkazi wake elaŵila kuti epemphela mofumila pansi pa mtima. Mowelezhyawelezhya, esenga Yehova kuti aŵapase mtendele wa m’maganizo, mtima wodekha koma soti nzelu kuti akwanishe kupanga zosankha zabwino. Ndipo eona kuti Yehova eŵayavya. Ngati mukumana na mavuto, mukolimbikila kupemphela noona mwamene mtendele wa Yehova ungatetezele mtima na maganizo ŵanu.—Aro. 12:12.
YEHOVA AKOKUTANG’ISHANI
7. Kansi tingamvwe tyani ngati takumana na ciyeso cikulu?
7 Vuto. Ngati takumana na ciyeso cikulu, cingankhale covuta kuganiza nocita zinthu monga ni mwetenzocitila kale. Monga ni mwamene boti ingakankhiwile uku na uku cifukwa ca cimphepo, nase tingamvwe monga tukankhiwa na cimphepo. Kalongosi Ana watatomola lombapano, efotokoza kuti mulume wake Luis pecimwalila, enzocinjacinja mweenzomvwila. Elaŵila kuti: “Nthawi ziyakine nenzovutika ngako maganizo ndipo nenzozimvwila cifundo. Nenzokalipa cifukwa ca imfwa ya mulume wangu.” Kuyangizhyila apo, kalongosi Ana enzozimvwa kuti ali yeka ndipo enzovutika kupanga zosankha zamene mulume wake Luis enzozisamalila bwino akali moyo. Kansi Yehova akumvwa tyani ngati mavuto yatukumana nayo yayamba kuticitisha nkhaŵa?
8. Molingana na 1 Petulo 5:10, kansi Yehova otisimikizhyila cinji?
8 Zakucita Yehova. Otisimikizhyila kuti akotitang’isha. (Ŵelengani 1 Petulo 5:10.) Ngati pa nyanja payamba cimphepo, boti ingayambe kuyenda uku na uku. Pofuna kuiteteza kuti osati ikoyenda uku na uku, nthawi ziyakine ingankhale na vinthu kunyansi kwake vamene vingaiteteze. Izi zingacitishe ŵanthu ali m’boti kuzimvwa kuti ni otetezeka. Koma kuti vinthu ivi viseŵenze bwino, boti yufunika kupitilizhya kuluta kusogolo. Molingana na izi, kuti Yehova atitang’ishe, tufunika kupitilizhya kunkhala okhulupilika ngati tukumana na ciyeso.
Mukozitang’isha moyavyiwa na zida zasu zofufuzila (Onani ndime 8-9)
9. Kansi zida zasu zofufuzila zingatiyavye tyani kunkhala otang’a? (Onani soti cithunzithunzi.)
9 Zatufunika kucita. Ngati tacita nkhaŵa cifukwa ca vuto yatukumana nayo, tufunika kucita zonse zatingakwanishe kuti tipitilizhye kupemphela, kupezeka pa misonkhano nolalikila. N’cendi kuti zingankhale zovuta kucita zinthu monga ni mwetenzocitila poyamba. Koma tufunika kukumbukila kuti Yehova otiyembekezela lini kucita zinthu zamene tingakwanishe lini. (Linganizhyani na Luka 21:1-4.) Tufunika soti kupatula nthawi yocita phunzilo ya paseka nosinkhasinkha. Ndaŵa yanji? N’cifukwa cakuti Yehova kupitila m’gulu yake, otipasa nkhani na mavidyo yamene yangatiyavye kunkhala otang’a ngati takumana na mavuto. Kuti mupeze zamufuna, mungaseŵenzeshe zida zofufuzila zamene zilimo m’cilaŵilo canu monga JW Library®, Watch Tower Publications Index na Buku Lofufuzila Nkhani la Mboni za Yehova. Kalongosi Monika watatomola koyambilila, elaŵila kuti enzoseŵenzesha zida izi akayamba kucita nkhaŵa cifukwa ca vuto yake. Mwacisanzo, enzofufuza mau akuti “ukali” ndipo nthawi ziyakine enzofufuza mau akuti “kusakhulupilika” olo “kukhulupilika.” Yove enzopitilizhya kuŵelenga nkhani izi mpaka pa nthawi yakuti wamvwa bwino. Elaŵila kuti: “Nikayamba kufufuza, nenzocita ngako nkhaŵa koma nenzopitilizhya kuŵelenga ndipo posilizhyila pake, nenzokumvwa monga kuti Yehova wanikumbatila. Kucita izi, kweniyavya kuzindikila kuti Yehova enzomvwisha mwenenzomvwila ndipo enzoniyavya.” Thandizo yofumila kuli Yehova ingakuyavyeni kuti mupitilizhye kunkhala otang’a.—Sal. 119:143, 144.
YEHOVA AKOKUCILIKIZANI
10. Kansi tingamvwe tyani pavuli pokumana na ciyeso cikulu?
10 Vuto. Pavuli pokumana na ciyeso cikulu, tingozimvwa kufooka. Tingankhale monga ni munthu wamene enzoutuka ngako pa mpikishano woutuka, koma cifukwa cozicita oyenda mociliwa. Tingavutike kucita zinthu zamene kale tenzozicita mosavuta ndipo tingankhale tiliye cifuno cocita zinthu zamene zenzotisangalasa. Molingana na Eliya, tingamvwe monga kuti tufuna lini kuuka ndipo tingofuna tyala kulala. (1 Maf. 19:5-7) Kansi Yehova olonjeza kuti akocitanji ngati tafooka?
11. Kansi ni njila iyakine yotyani yakutiyavyilamo Yehova? (Salimo 94:18)
11 Zakucita Yehova. Otilonjeza kuti akoticilikiza. (Ŵelengani Salimo 94:18.) Monga ni mwamene munthu wamene ezicita pa mpikishano woutuka angafunikile thandizo kuti akwanishe kuyenda, nase tingafunikile thandizo kuti tipitilizhye kutumikila Yehova. Pa nthawi zoteti, Yehova otisimikizhyila kuti: “Neo, Yehova Mulungu wako, nakata kwanja yako yamalendi. Neo nukuuzhya kuti ‘Usacite wowa. Neo nikuyavye.’” (Yes. 41:13) Mfumu Davide elandilako thandizo iyi. Pecikumana na mayeselo koma soti adani, euzhya Yehova kuti: “Kwanja yanu yamalendi inicilikize.” (Sal. 18:35) Koma kansi Yehova otiyavya tyani?
Mukolandila thandizo yofumila kuli abanja ŵanu, ashamwali ŵanu na akulu (Onani ndime 11-13)
12. Kansi Yehova angaseŵenzeshe ŵani kuti atiyavye ngati tafooka?
12 Kanyinji-kanyinji, Yehova oticilikiza mwa kusonkhezela ŵanthu ayakine kuti atiyavye. Mwacisanzo, pa nthawi iyakine Davide peenze efooka, shamwali wake Yonatani eluta kuyomuona na colinga cakuti amutang’ishe nomulimbikisha. (1 Sam. 23:16, 17) Molingana na izi, Yehova esankha Elisa kuti ayavye Eliya. (1 Maf. 19:16, 21; 2 Maf. 2:2) Masiku ŵano, Yehova angaseŵenzeshe abanja ŵasu, ashamwali olo akulu kuti atiyavye. Olo n’tetyo, ngati tukumana na mavuto, tingafune kuzipatula nofuna kunkhala seka. Kansi tufunika kucita cinji kuti tilandile thandizo ya Yehova?
13. Kansi tufunika kucita cinji kuti tikopindula na thandizo ya Yehova? (Onani soti cithunzithunzi.)
13 Zatufunika kucita. Tufunika kupewa kuzipatula. Kuzipatula kungacitishe kuti tikoganizila ngako pa seo seka na mavuto yatukumana nayo. Kaganizidwe koteti kangacitishe kuti osati tikopanga zosankha mwanzelu. (Miy. 18:1) N’cendi kuti nthawi ziyakine tingafunike kunkhala kwaseka makamaka ngati takumana na mavuto akulu. Olo n’tetyo, kuzipatula kwa nthawi itali kungacitishe kuti tisalandile thandizo yakupeleka Yehova kupitila mu ŵanthu. Tetyo, mosasamala kanthu za kukula kwa vuto yatingakumane nayo, tikolandila thandizo kufumila kuli abanja ŵasu, ashamwali ŵasu koma soti akulu. Tikoona thandizo iyi kuti ni yofumila kwa Yehova wamene ofuna kutiyavya.—Miy. 17:17; Yes. 32:1, 2.
YEHOVA AKOKUTONTHOZANI
14. Kansi ni vinthu votyani vingaticitishe wowa?
14 Vuto. Nthawi ziyakine tingacite wowa. M’Baibo, atumiki a Mulungu okhulupilika efotokoza nthawi pamene enze ecita nkhaŵa koma soti wowa cifukwa ca adani ŵao olo mavuto ayakine. (Sal. 18:4; 55:1, 5) Molingana na izi, tingosushiwa na ayasu a ku sukulu, ku nchito, abanja ŵasu olo na boma. Ndipo tingacite wowa kuti tingafwe cifukwa ca matenda yatingolwala. Pa nthawi zoteti, tingazimvwe monga ni mwana wamene oziŵa lini cocita. Kansi Yehova otiyavya tyani pa nthawi zoteti?
15. Kansi Salimo 94:19 yutisimikizhyila cinji?
15 Zakucita Yehova. Yove otitonthoza notisisimula. (Ŵelengani Salimo 94:19.) Vesi iyi yutipangisha kuganizila za kamwana katontho kamene kacita wowa ndipo kokangiwa kulala cifukwa ca cimvula catuleza. Tingaganizile kuti tuona ausuwake oloŵa m’cipinda, okanyamula nokakumbatila mpaka kalala. Olo kuti cimvula ici catuleza cupitilizhya, kove kokumvwa kunkhala kotetezeka koma soti kotonthozeka poziŵa kuti kali m’manja mwa ausuwake. Molingana na izi, ngati takumana na mayeselo ocitisha wowa, tingafune kuti Ausuwasu akululu atikumbatile mophiphilisila mpaka pa nthawi yakuti tamvwa kutonthozeka. Kansi tingalandile tyani citonthozo coteti kufumila kwa Yehova?
Mukolola Ausuwanu akululu kukutonthozani kupitila m’Malemba (Onani ndime 15-16)
16. Kansi tufunika kucita cinji kuti tikopindula na citonthozo ca Yehova? (Onani soti cithunzithunzi.)
16 Zatufunika kucita. Nthawi zonse mukopeza nthawi yotandala na Yehova mwa kupemphela noŵelenga Mau ŵake. (Sal. 77:1, 12-14) Ngati mukonda kucita izi, cinthu coyamba cati mukocita mukakumana na mavuto, ni kusenga Ausuwanu akululu kuti akuyavyeni. Mukomuuzhya Yehova zinthu zukucitishani wowa na mwamumvwila. Ndipo mukomulola kulaŵila namwe kupitila m’Mau ŵake noona mwakukutonthozelani. Mungaone kuti nkhani ziyakine za m’Baibo ni zotonthoza ngako makamaka kuli mweo pamweka. Mwacisanzo, mungalimbikishiwe kuŵelenga buku ya Yobu, Masalimo na Miyambo koma soti mau yecilaŵila Yesu opezeka m’Mateyu caputa 6. Ngati mupemphela kwa Yehova noŵelenga Mau ŵake, muone mwakukutonthozelani.
17. Kansi tingankhale na cidalilo cotyani?
17 Tingankhale na cidalilo cakuti Yehova akotiyavya pa nthawi ya mavuto. Yove atisiye lini seka. (Sal. 23:4; 94:14) Yehova olonjeza kutiteteza, kutitang’isha, kuticilikiza notitonthoza. Ponena za Yehova, Yesaya 26:3 yulaŵila kuti: “Ŵanthu amene ali na mtima wosanyezhyeka, mukoŵateteza noŵapasa mtendele wosasila cifukwa odalila mweo.” Tetyo, mukodalila Yehova nocita zonse zamungakwanishe kuti mukopindula na thandizo yakupeleka. Mukacita izi, mukopeza mphamvu olo pa nthawi ya mavuto.
KANSI MUNGAYANKHE TYANI?
Kansi ni pa nthawi yotyani makamaka patingafunikile thandizo ya Yehova?
Kansi ni m’njila zotyani zakutiyavyilamo Yehova pa nthawi ya mavuto?
Kansi tufunika kucitanji kuti tikopindula na thandizo ya Yehova?
NYIMBO 12 Yehova ni Mulungu Mkulu
a Mazina ayakine acinjiwa.