Kansi Nufunika Kupemphela kwa Atuŵa Mtima?

Yankho ya m’Baibo

Yai. Baibo yukamba kuti tufunika kupemphela tyala kwa Mulungu, kupitila m’zina ya Yesu. Yesu euzhya ophunzila ŵake kuti: “Mukopemphela m’njila iyi: Ausuwasu Akululu, zina yanu ituŵishiwe.” (Mateyu 6:9, New American Bible) Yesu aliyouzhye ophunzila ŵake kuti akopemphela kuli atuŵa mtima, angelo olo kuli aliyense, kupatulako tyala kwa Mulungu.

Yesu euzhya soti okonkha ŵake kuti: “Neo n’ne njila, cendi na moyo. Paliye ofwika kwa Atata cosapitila muli neo.” (Yohane 14:6, NAB) Ni Yesu tyala elolewa na Mulungu kunkhala m’nkhalapakati wasu.​—Aheberi 7:25.

Kansi pali vuto ngati ningapemphele kwa Mulungu na kuli atuŵa mtima?

Mulungu elamula kuti: “Neo, ASIKULU, Mulungu wako, n’ne Mulungu wa nsanje.” (Ekisodo 20:5, NAB) Iyi ni imozi mwa Malamulo 10. Kansi ni Mulungu “wa nsanje” m’njila zotyani? Mau a m’nyansi mu New American Bible okamba kuti “ofuna kuti ŵanthu akozipeleka kuli yove yeka tyala.” Mulungu ofuna kuti tikozipeleka, kulambila na kupempela kuli yove yeka tyala.​—Yesaya 48:11.

Ngati tupemphela kuli munthu aliyense, atuŵa mtima olo kuli angelo, tukalipisha Mulungu. Mtumwi Yohane peciyesa kulambila mngelo, mngelo uyu elaŵila kuti: “Usacite izo! Nane n’ne kapolo muyako koma soti m’mozi wa akwako amene ali na nchito yocitila umboni za Yesu. Lambila Mulungu.”​—Chivumbulutso 19:10, NAB.