Dotoronoma
20 “Mo le ya ntweng ke mokane le bona manaba ya lune ma na le dipera, dikotšikara le masole ya go tlala go phala ya lune, di sa le tshose tsone ka taba la gore Jehova Modimo wa lune wa gore o le ntshiye ga naga ya Egepita o na le lune.+ 2 Mo le le thina le go ya ntweng, di nyaka moprista a tle ga batho ba Israyele.+ 3 Di nyaka a ba botse a re, ‘Barena, theetsela wene Israyele, gana byalo o thina le go lwa le manaba yago. Šišimala. O sa tšhoge kela wa tšhaba, o sa hlagasele ka taba la bona, 4 ka gore Jehova Modimo wa lune o sepela le lune gore a le lwele ga manaba ya lune le go le phonisa.’+
5 “Ba bagolo ba masole di nyaka ba re ga batho bone, ‘Ke mang wa gore o yagiye ntlo, wa gore aa soko dula ga yona? A boyele mutšing wage. Ka taba la gore di ka makega gore a kgwe ku ntweng ke mokane monna ye mongwana o nyoko tseya ntlo yone yage. 6 Fote ke mang wa gore o gašiye didhriva tšhomong yage wa gore aa soko di buna? A boyele mutšing wage. Ka taba la gore a ka kgwa ku ntweng, ke mokane monna ye mongwana a tla a di buna didhriva tsone. 7 Ke mang wa gore o tshepisiye mosadi gore o nyoko šadha naye? A boyele mutšing wage.+ Ka taba la gore mo a ka kgwa ku ntweng, monna ye mongwana o nyoko šadha le mosadi wage.’ 8 Ba bagolo ba masole di nyaka ba re ga batho bone, ‘Ke mang wa gore o tšhugiye fote wa hlagasela?+ A boyele mutšing wage, gore a sa make gore bobhuti bage le bona ba hlagasele go tshwana naye.’+ 9 Mo bowa ba bagolo ba fetsiye go bolabola le masole yane, di nyaka ba hlawole dindhuna tsa masole gore di yete batho mahlong.
10 “Mo o šutela le mutši gore o lwe nawo, o ba botse tso di nyakang ba di make gore mutši wa bona wo sa hlasediwi.+ 11 Mo ba ka go fetola gabutši ke mokane ba go yamogela, batho ba naga yone ka mokana ga yona go nyoko ba mabhantiti yago ke mokane ba nyoko go berekela.+ 12 Mara mo ba ka gana go maka tso o ba butsiyeng tsona ke mokane ba lwa nago, wene o tshwanele o ba dukulugele, 13 ka nnete Jehova Modimo wago o nyoko maka gore o ba hlule, ke mokane o nyoko bolaya monna ye mongwana le ye mongwana ka sabola. 14 Mara basadi, bana, diphoolwane le ka mokana ga tsona tsa gore di mutšing wone le dilo tso wo nang natso ka mokana ga tsona, wene o nyoko di tseya gore go be tsago+ fote o nyoko ja tsa go ja tsa manaba yago tsa gore Jehova Modimo wago o go neyye tsona.+
15 “Tsowa ke tso di nyakang o di make ga mitši ka mokana ga yona ya gore yi kgole nago ya gore ke ya ditšhaba tsa gore a di nageng yo wene o dulang ga yona. 16 Mara ga mitši ya batho bowa ya gore Jehova Modimo wa lune o le neya yona gore go be lefa la lune, le sa šiyi le motho ka wwoši a phela.+ 17 Mara di nyaka o fetse ka Mahethe, Maamore, Makanana, Maperezi, Mahivi le Majebuse+ go ya ka mokgo Jehova Modimo wago a go butsiyeng ka gona; 18 gore ba sa le tšhutisi dilo tsa go silikisa tso ba di makelang medimo ya bona, ke mokane ba maka gore le sinyele Jehova Modimo wa lune.+
19 “Mo le hlasela mutši gore le wo tseye ka nthago ga gore le lwe nawo ka matšatši ya go tlala, a di nyake le kupa mehlare ya wona ka selepe. Le ka ja diyengwa tsa wona mara le sa yi kupe.+ Ayitsano di ya kwagala gore o hlasele mohlare wa mone mutšing go tshwana le mo o hlasela motho? 20 Le fetse ka mohlare wa gore diyengwa tsa wona a di jiwi. O ka yi kupa ke mokane wa maka legora la go yagelela mutši wa gore wo lwa le lune go segela le wo hlula.