O sa Kamake Gore Jehova o go Nyaka ka Matla

1. Ke ntaba o tineyele ga Jehova? (Lebelela le sethombhe.)

AYITSANO o sa gopola nakwela o tineyela ga Jehova? O segelele sepheto sone ka taba la gore o tšibiye Modimo ke mokane wa kwa o mo nyaka ka matla. O tshepisiye gore o nyoko wa o tsoga gore o mmerekele mo o kene o phela fote o nyoko ya mahlong o mo nyaka ka pelo yago ka moka, bowene byago, monagano wago le matšhika yago ka mokana ga wona. (Mar. 12:30) Go tlugisela ka nako yonone, o yye wa fo teya mowalawala ka go mo nyaka ka matla. Byalo, o nyoko re king mo ye mongwana a ka fo go butsisa gore, “Nje wa resa mo o re ga Jehova o mo nyaka ka matla?” Phela o ka fetola o sa kgwisi le mare o re, “Ke ya falala ka yene!”

2-3. King sa gore Jehova o nyaka re sa se kamake fote re nyoko tšhuta ying ga hlogotaba yowa? (Jeremiya 31:3)

² Byalo, o nyoko re king mo ye mongwana a ka go butsisa gore, “Nje wene wa mo tshepa ga Jehova gore o go nyaka ka matla?” Ayitsano o nyoko tshwara kuwa o lisa o tseya nkare o fo ba setlakati sa gore Jehova a ka tsoge a se nyakiye? Mogageru ye mongwana wa mosadi wa gore o yye a gahlana le tsa go baba mo a sa gola o re: “Ke ya di tšiba gore ga Jehova ke mo nyaka ka matla. Fote tsotsone a ke di kamake le ka gonyana. Taba ya gore yi dula yi ntlela ka matla ke gore, Ayitsano Jehova yene wa nnyaka mara?” Byalo, o ka gelepa king barena gore o di tšibe tsa gore Jehova o tikwa byang ka wene?

³ Jehova o nyaka gore o sa kamake gore o go nyaka ka matla. (Bala Jeremiya 31:3.) Ke nnete gore ke Jehova ye a go gogiyeng gore o tle gage. Fote nakwela o tineyela gage o boya go kolobetsiwa, o krayye selo sa go bafala ka matla—go nyakanana gage ga mannete. Phela tsotsone di rela gore o go nyaka la go sa hlayisege fote a ka sa ro go lisetsa. Ka taba la gore Jehova aa timakisi mo a re malata yage o ma nyaka tsa mannete a boya a ma tseya go le “phahlo ya go hlawolega” byalo, le wene o go tseyela gedimo ka matla. (Mal. 3:17, setw.) Jehova o nyaka gore le wene o sa yi kamake taba ya gore o go nyaka ka matla go fo tshwana le mo Pawulo wa lepostola a yye a di tshepa tsa gore Jehova o mo nyaka ka matla. Pawulo o ngwadiye a sa kamake gore: “Ke ro di tšiba gore likgu, lephelo, mangeloyi, memmušo, dilo tso di makegang gana byalo le tso di sa tlang kela ba go lawola, kela dilo tso di leng ku gedimo kela tso di leng ho tlase kela tso Modimo a di makiyeng, di ka sa ro kgona go re yahluganya le Modimo.” (Marom. 8:38, 39) Ga hlogotaba yowa, re nyoko petapeta ka gore ke ntaba di nyaka re kikitela taba ya go sa kamake gore Jehova o re nyaka ka matla le gore re ka gelepa king gore re make ka mokgonone.

KE NTABA DI NYAKA RE TSHEPE GORE JEHOVA WA RE NYAKA?

4. Re ka kikirisana byang le mathayithayi ya Sathane?

⁴ Mo re tshepa taba ya gore Jehova o re nyaka ka matla, re ko thogo lwa le “mathayithayi” ya Sathane. (Maef. 6:11) Sathane a ka šinya a ro kgokologana le ho fase go fo re a re bone re sa sa berekela Jehova. Mathayithayi ya mangwana ya Sathane a ma berekisang ke go sabalatsa taba ya gore Jehova aa na taba le rune. O sa lebale gore Sathane o dula a ramele. Mo re tshetsha, o napa a re wisa—nakwenngwana mo re kgahleletsa ke tso di yyeng dya re makegela ku botala, dintshitshire tso re gahlanang natso gana byalo kela re šekedisa ke go sa tšibi gore go nyoko makega ying ku mahlong. (Diy. 24:10) Sathane o tshwana le tawu ya gore yi yemele phoolwane gore yi tšwe morapeng, ke mokane a fo re yi vho. Byalo, o liketsa go maka gore mo re kene re lelemela, re sa yemelele, re fo psyaralala ho fase. Mara mo re ka sa thogathoge ga taba ya gore Jehova o re nyaka ka matla, re ko ba re amme gore re thogo “lwa” le Sathane le mathayithayi yage.—1 Pet. 5:8, 9; Jak. 4:7.

5. Ke ntaba re nyaka go bona gore Jehova o re nyaka ka matla fote o re tseyela gedimo?

⁵ Mo re dumela gore Jehova o re nyaka ka matla, re ko thogo šutela thina gage. Ke ntaba re reyane. Jehova o makiye gore di fo ba ho mading gore re tikwe re nyaka ba bangwana fote le rune ba re nyake. Mo ba re šupetsa gore baa re nyaka, le rune di fo re tšhofa gore re ba nyake. Byalo, mo re di bona tsa gore Jehova o re nyaka ka matla le gore o re tseyela gedimo, le rune re napa re mo nyaka la go sa hlayisege. (1 Joh. 4:19) Mo taba ya go mo nyaka ka matla yi hluhlutela, le yene gage yi napa yi kumatela. Bhayibele yi re botsa yi sa jikajiki gore: “Šutelaneng thina le Modimo, le yene o nyoko šutela thina le lune.” (Jak. 4:8) Byalo, re ka maka byang gore re nape re di tshepa gore Jehova o re nyaka ka matla?

RE KA GELEPA KING GORE RE TSHEPE GORE JEHOVA O RE NYAKA KA MATLA?

6. Mo nkare a o yi tshepe taba ya gore Jehova o go nyaka ka matla, o ka maka ying mara?

⁶ Dula o rapela Jehova gore a go gelepe o thogo kwisisa gore ke ntaba a go nyaka ka matla. (Lluk. 18:1; Marom. 12:12) Mo di kgonega—ka letšatši, kgopela Jehova gatleletlele gore a go gelepe o titseye ka mokgo yene a go tseyang. Ka dinako tse dingwana, o ka tikwa nkare ke wene tšhepisi ya go fela monate la go šinya o sa tshepe gore Jehova o ko ba a go nyakela ying. Mara o sa lebale gore Jehova ke ye mogolo go phala dipelo tsa rune. (1 Joh. 3:19, 20) O go tšiba go phala ka mokgo wene o titšibang; o bona dilo tsa gore wene o ka sa kgone go di bona. (1 Sam. 16:7; 2 Dikor. 6:30) Byalo, mmotse so se go kokonang ke mokane o mo kgopele a go gelepe o thogo tshepa taba ya gore o go nyaka ka matla. (Pis. 62:8) Mo o šele o mo rapele, di ka ba gabutši ka matla gore o make dilo tsowa tsa go latela.

7-8. Pisalema yi re gelepa ka mokgo mang gore re di tshepe tsa gore Jehova o re nyaka ka matla?

⁷ Tshepa tso Jehova a di hlayang. O hlohletsele bo ba ngwadiyeng Bhayibele gore ba hlatolle ka mokgo a leng. Lebelela ka mokgo mopisalema Dafita a di beyyeng monate ka gona mo a hlatolla Jehova. “Jehova o thina le bo ba gore dipelo tsa bona di kwile go baba; O phonisa bo ba gore ba kgongwele.” (Pis. 34:18) Mo o kgongwele ka matla, o ka tikwa nkare o fo ba ntoši. Mara Jehova o tshepisa gore ka dinako tsotsone, a ka sa tloge ho thina gago ka taba la gore wa di bona gore o ka sa loke. Ga pisalema ye nngwana, Dafita o ngwadiye gore: “Ke kgopela o yageletse dinepedi tsaka ka sekhwama sago sa mokgopa.” (Pis. 56:8) Jehova wa di bona mo o tshwere bothatha. Wa tihlupa ka wene fote a di mo tshware tsona mo a di bona gore o kikirisana le tsa go go manya. Go fo tshwana le mo motho wa gore o sepela ga poleke ya gore ke kgwaakgwa a tseyela gedimo lethothi la meetši, le Jehova aa di tseye ka gonyana dinepedi tsago fote o gopola dinako ka moka tsa mo o kwa go baba o boya o re sello phororo. Ga Pisalema 139:3, re bala gore: “[Jehova] o tšiba tso ke di makang ka mokana ga tsona.” Jehova o bona ka mokana ga tsona tso o di makang, mara o kgeta go lebelela tsa gabutši. (Maheb. 6:10) Ke ntaba? Ka taba la gore o tseyela gedimo dilo ka moka tso o liketsang go di maka gore o thogo mo jabodisa.a

⁸ Gabutšibutši, Jehova o berekisa mangwalo yawa ya gore maa re kgomoletsa go fo hlaya gore: “Ke fo nyaka o di tšibe tsa gore ke go nyaka ka matla fote ke ya tihlupa ka wene.” Akere re šele re tšhutiye gore Sathane o nyaka o tshepa taba ya gore Jehova aa yisi felo ka wene. Byalo, mo nkare ka dinako tse dingwana yi fela yi go vakašela taba ya go kamaka gore Jehova wa go nyaka kela dho, yemanyana ke mokane o tiputsise gore, ‘Ke nyoko tshepa mang—ye wa gore matsaka “ma thomisiye ke yene” kela “Modimo wa go bolabola nnete”?’—Joh. 8:44; Pis. 31:5.

9. Jehova o ba tshepisa ying bo ba gore ba mo nyaka ka matla? (Eksoda 20:5, 6)

⁹ Nagana ka taba ya gore Jehova o tikwa byang mo batho ba mo šupetsa gore ba mo nyaka ka matla. Lebelela gore Jehova o yitseri king ga Moše le ga Maisrayele. (Bala Eksoda 20:5, 6.) Jehova o tshepisa gore o nyoko fo ya mahlong a ba nyaka tsa mannete bo ba gore ba mo nyaka ka matla. Ka taba la gore Jehova o nyakanana tsa mannete, re tshepa re tiyisiye gore re ka sa re re ya mo nyaka, ke mokane yene a gana. (Neh. 1:5) Byalo, mo nkare ka dinako tse dingwana o nyaka sa go šupetsa gore nnete Jehova wa go nyaka, tiputsise gore, ‘Nje nna ga Jehova ke mo nyaka ka matla?’ O fo yi tseya ka mokgo: Mo nkare o mo nyaka ka matla fote wa karakara gore o mo jabodise, ke sona so se šupetsang gore mpela-mpela o go nyaka la go sa hlayisege. (Dan. 9:4; 1 Makor. 8:3) Gabutšibutši, mo nkare wa di tšiba tsa gore ga Jehova o mo nyaka ka matla, ke ntaba o kamaka gore yene wa go nyaka? O ka napa o di tshepa tsa gore yene o go nyaka ka matla fote tsa go go nyaka di ka sa ro tšhipa.

10-11. Jehova o nyaka gore re tseye taba ya lepolliwa ka mokgo mang? (Magalata 2:20)

¹⁰ Nagana ka gore mo Jehova a šinya a neyela ka Morwayi wage, ne a makela mang. Sehlabelo sa go re lepolla sa Jeso Kreste ke selo se segolo ka matla so Jehova a se makeleng batho. (Joh. 3:16) Mara ayitsano Morwayi yene wa Jehova o kgwele le wene? Eya! Lebelela tso Pawulo wa lepostola a yyeng a gahlana natso. Phela o yye a sinya ka matla mo a soko bane a ba Mokreste fote ne di nyaka gore a ye mahlong a lwa le taba ya gore aa yenela. (Marom. 7:24, 25; 1 Thim. 1:12-14) Mara o yye a tseya sehlabelo sone go le selo sa gore Jehova o ro makela yene. (Bala Magalata 2:20.) O sa lebale gore ke Jehova ye a hlohletseleng Pawulo gore a ngwale mantsu yane. Byalo, Jehova o nyaka gore re tšhute ga tso Pawulo a di ngwadiyeng. (Marom. 15:4) Mantsu ya Pawulo ma šupetsa ka mokgo Jehova a nyakang gore wene o tseye taba ya go lepolliwa—gore ke selo sa gore se tšwa gage fote o se makele wene. Mo o ka tseya taba ya go lepolliwa ka mokgonone, o ka sa kamake le ka gonyana gore Jehova o go nyaka ka matla.

¹¹ Re leboga Jehova re sa fetsi gore o romele Jeso ho lefaseng gore a tle a re kgwele. Mara selo se sengwana so se makiyeng gore Jeso a šinye a tle ho lefaseng ne yi le gore a tle a botse ba bangwana nnete ya go bolabola ka Modimo. (Joh. 18:37) Ga nnete yone go kena le taba ya ka mokgo Jehova a tikwang ka bana bage.

JESO O RE TŠHUTISIYE GORE RE BONE GORE JEHOVA O RE NYAKA KA MATLA

12. Ke ntaba re ka tshepa ka mokgo Jeso a hlatollang Jehova?

¹² Nakwela Jeso a le ho lefaseng, ne a di jabolela go botsa batho gore Jehova ke Modimo wa mošaga mang. (Lluk. 10:22) Phela a go na so se ka makang gore re sa mo tshepe ga Jeso ga mokgwa wo a hlatolliyeng Jehova. Akere Jeso ne a dula a le gana ho thina le Jehova ku legedimong mengwagangwaga mo a soko bane a segela ho lefaseng. (Makol. 1:15) Jeso o ro di bona ka maahlo gore Papage o ba nyaka ka matla barwayi le barwediya Bage ba go tshepega. Jeso o gelepa ba bangwana ka mokgo mang gore ba di tshepe gore nnete Modimo o ba nyaka ka matla?

13. Jeso o nyaka gore ga Jehova re mo tseye ka mokgo mang?

¹³ Jeso o nyaka re tseye Jehova ka mokgo yene a mo tseyang. Jeso mo a ra Jehova o re “Papa” fote taba yone yi nyarela ga Diebangedi ga go teya ka ku ga 160. Mo a bolabola le malata yage, ke mo a berekisa mantsu ya go tshwana le ya gore “Papa wa lune” kela “Papa wa lune wa magedimong.” (Mat. 5:16; 6:26) Mo Jeso a soko bane a segela ho lefaseng, malata ya Jehova ya go tshepega mo ma ra Jehova ne ma re ‘Ke wa Matšhika ka Moka,’ wa ‘Ku Malenghelengheng,’ ‘Yene ye Mogolo’ le direto tse dingwana tsa go yelana le tsotsone. Mara ga go tlala, Jeso ne a re Jehova ke ‘Papa’ wa rune. Tsotsone ne di šupetsa gore Jehova o nyaka gore malata yage ma tikwe ma le thina naye go fo tshwana le mo ngwana a kwana le papage ka matla. Byalo, di fo ba lekgwaying gore Jeso o re tšhutisa gore Jehova o re nyaka ka matla go fo tshwana le Papa wa gore aa nyake go kwa selo ka bana Bage. Tla re lebeleleneng mešupetso ka mmedi ya mo Jeso a berekisiyeng lentsu, “Papa.”

14. Jeso o šupetsiye ka mokgo mang gore ye mongwana le ye mongwana wa rune o bafele mahlong ga Papa wa rune wa ku legedimong? (Matewu 10:29-31) (Lebelela le sethombhe.)

¹⁴ Sa mathomo, lebelela mantsu ya Jeso ya ma leng ga Matewu 10:29-31. (Bala.) Ditiyane ke dinonyane tse dinyana tsa gore di ka sa tsoge di mo nyakiye ga Jehova kela dya mo rapela. Mara, Papa wa rune o tseyela gedimo le mong tiyane ka yyoši la gore o tšiba le mo yi wele fase. Phela mo nkare o tseyela gedimo dinonyane tse dinyana, ayitsano a ka šita ke rune? Fote Jeso o hlayye gore Papa wa rune o balele le meriri ya ho dihlogong tsa rune. Ka taba la gore Jehova o tšiba le mong dilo tse dinyana ka rune, re tshepa re tiyisiye gore wa tihlupa ka rune. Byalo, di fo ba lekgwaying gore Jeso o nyaka re di tšibe gore re bafele ka matla mahlong ga Papa wa rune wa ku legedimong.

15. Mantsu ya Jeso ya gore ma ga Johane 6:44 ma go botsa ying ka Papago wa legedimong?

¹⁵ Lebelela mošupetso wa mabedi mo Jeso a yyeng a berekisa lentsu “Papa.” (Bala Johane 6:44.) Papago wa legedimong o go gelepiye gore o mo tšibe gabutši o boye o ro mo nyaka. Ke ntaba a makiye ka mokgonone? Ka taba la gore o bonne mekgwa yago ya gabutši. (Meber.13:48) Mo Jeso a hlaya mantsu ya ma leng ga Johane 6:44, a ka fo ba a bolabola ka mantsu ya Jehova ya ma leng ga Jeremiya 31:3. Gana hone Jehova o butsiye batho bage gore: “Ke [šupetsiye] gore ke dula ke go nyaka ka matla.” (Jer. 31:3; tshwanisa le Hoseya 11:4.) Nagana gore tsotsone di rela ying. Papa wa rune wa legedimong o ya mahlong a bona mekgwa ya gabutši ho gago ya gore le wene ne o ka sa kgoni go yi bona.

16. (a) Anthe gabutšibutši Jeso o re king fote ke ntaba di nyaka re mo tshepa? (b) O ka maka byang gore o nape o di tshepa tsa gore Jehova ke mong yene Papa ye o mo hlokang? (Lebelela lebhokisi la gore “Papa ye re mo Hlokang ka Mokana ga Rune.”)

¹⁶ Mo Jeso a hlaya gore Jehova ke Papa wa rune, ke mo a re botsa gore: “Jehova a go fo ba papa waka; le wene ke Papa wago. Fote ke ya go tshepisa gore o go nyaka ka matla fote wa tihlupa ka wene.” Byalo, mo nkare ka dinako tse dingwana o kwa o sa di tshepe gore Jehova o go nyaka ka matla, ke ntaba o sa yemenyana ke mokane o tiputsise gore, ‘Anthe a ke ya tshwanela go tshepa mantsu ya Morwayi wa gore o mo tšibela bokawone ga Papa wa rune fote o dula a bolabola nnete?’—1 Pet. 2:22.

MAKA SE SENGWANA GORE O DULE O DI TSHEPA TSA GORE JEHOVA O GO NYAKA KA MATLA

17. Ke ntaba di nyaka re ye mahlong re maka se sengwana gore re dule re di tshepa tsa gore Jehova o re nyaka ka matla?

¹⁷ Di nyaka re ye mahlong re maka se sengwana gore re dule re di tshepa gore Jehova o re nyaka ka matla. Re šele re tšhutiye gore lenaba la rune la mathayithayi lo ba reng ke Sathane, le ka mpa la tlupuga hlogo go fo re le re lisise go berekela Jehova. O nyaka go re lelemetsa. Byalo, a ka sa ro yetsela go fo re a make gore re tshepe gore Jehova aa re nyake. Re sa lisetsi Sathane a hlula barena!—Jobo 27:5.

18. O ka maka byang gore o nape o di tshepa tsa gore Jehova o go nyaka ka matla?

¹⁸ Mo o nyaka go napa o di tshepa tsa gore Jehova o go nyaka ka matla, dula o rapela gore a go gelepe o thogo titseya ka mokgo yene a go tseyang. Ghayela ka matla ka ditemanyana tsa gore di hlatolla ka mokgo Jehova a nang le taba le bo ba mo nyakang. O sa lebale gore Jehova a ka sa šitegi go nyaka motho wa gore le yene o mo nyaka ka matla. Ghayela ka taba ya gore Jehova o neyele ka morwayi wage a makela wene. O boye o tshepe taba yo Jeso a yi hlayyeng ya gore Jehova ke Papa wago wa ku legedimong. Ke mokane mo motho a go butsisa gore: “Nje wene wa mo tshepa ga Jehova gore o go nyaka ka matla?” o ko fetola o sa nghanghamele gore: “Eya, ke ya mo tshepa! Fote ke ro loma le meno gore ke mo šupetse ka moka matšatši gore ke mo nyaka ka matla!”