O sa Kamake le ka Gonyana Gore Jehova o go Tshwarele

1-2. Mo re di bona tsa gore Jehova o re tshwarele ga tso re di sinnyeng, re šala re tikwa byang? (Lebelela le sethombhe sa ka tawong.)

KGOŠI Dafita ke mo a di tšiba gabutši gore di byang go kokona ke lekwalo ka taba la tso a di sinnyeng botala. (Pis. 40:12; 51:3; mantsu ya mathomo) O yye a sinya ka matla mo a kene a phela. Mara, o yye a šupetsa gore o sokologiye tsa mannete, fote Jehova o yye a mo tshwarela. (2 Sam. 12:13) Tsotsone di makiye gore Dafita a kwe a yimulugiye mo a bona gore Jehova o mo tshwarele.—Pis. 32:1.

² Go fo tshwana le Dafita, le rune re ka tikwa re yimulugiye mo re di bona gore ka nnete Jehova o re kwele go baba a boya a re tshwarela ga tso re di sinnyeng. Wa tšiba, re fo kwa di re thoba dipelo go fo tšiba gore Jehova o tikemisele go re tshwarela ga tso re di sinnyeng—re ra le mong tsela tsa go tshosa—mo re ka fo sokologa tsa mannete, ra hlaya tso re di sinnyeng ke mokane ra maka so re ka se kgonang gore re sa sa di boyelela! (Diy. 28:13; Meber. 26:20; 1 Joh. 1:9) Phela di ya re tiyisa go tšiba gore mo a re tshwarela, di napa di ba nkare a sanka ra mo sinyela!—Hezek. 33:16.

3-4. Mogageru ye mongwana wa mosadi o yye a tikwa byang ka nthago ga go kolobetsiwa, fote re nyoko handahanda ka ying ga hlogotaba yowa?

³ Le mo go le ka mokgonone, ka dinako tse dingwana re kamaka gore ka nnete Jehova o re tshwarele. Nka mokgo Jennifer a yyeng a tikwa ka gona. Babelegi bage ba mo tšhutisiye ka Jehova. Mara mo a kene a gola-gola, o yye a thomisa go maka dilo tsa go tšwa pateng fote a fo re tsee, a di wutametsela babelegi bage. Mara ka nthago ga mengwaga, o yye a tšhentšha, a tineyela ga Jehova ke mokane a kolobetsiwa. O re: “Ku botala ne ke dulela go maka bonghwahla, ke tlayila, ke le motho wa go kwatakwata fote selo se segolo ho gaka ne yi le go maka tšheleta. Ne ke di tšiba tsa gore Bhayibele yi re ka taba la sehlabelo sa Kreste, Jehova a ka re tshwarela ga tso re di sinnyeng. Mara ne ke sa na ke kamaka gore o ntshwarele tsa mannete.”

⁴ Ayitsano le wene di ya go thathafela go tshepa taba ya gore Jehova o go tshwarele ga dilo tso o di sinnyeng ku botala? Ka taba la gore Jehova o kwelana go baba, o nyaka re sa kamake le ka gonyana gore o re tshwarele go fo tshwana le ka mokgo Dafita a yyeng a tikwa ka gona. Ga hlogotaba yowa, re nyoko fo re handahanda ka gore ke ntaba di nyaka re sa kamake le ka go twii gore ka nnete Jehova o re tshwarele le gore re ka gelepa king gore re thogo maka ka mokgonone.

KE NTABA DI NYAKA RE YAMOGELE MO JEHOVA A RE TSHWARELA?

5. Sathane o nyaka gore re tshepe ying? Beyisa.

⁵ Mo re yamogela gore Jehova o re tshwarele, re ko kganela kgole le go wela molabong wa Sathane. O sa lebale gore Sathane o nyoko maka se sengwana le se sengwana go fo re a re lisise go berekela Jehova. Gore a segelele tsotsone, Sathane a ka liketsa go maka gore re tshepe taba ya gore ba ka sa tsoge ba tshwarele ga tso re di sinnyeng. Lebelela tso di makegeleng morenela wa hala Korente wa gore o yye a maka bonghwahla ke mokane ba mo tlosa ka phutegong. (1 Makor. 5:1, 5, 13) Ka nthago o yye a sokologa. Mara Sathane ne a nyaka gore bo ba leng ka phutegong ba gane go tshwarela morenela fote ba sa mo yamogele ka phutegong. Ka nthoko ye nngwana, Sathane ne a nyaka gore morenela a tikwe nkare ba ka sa tsoge ba mo tshwarele—a “kgongwele ka matla” tsa gore a ka šinya a lisetsa le go berekela Jehova. Sathane aa soko tšhentšha tso a nyakang go di segelela kela dipolanenyana tsage. Mara “re tšiba mathayithayi yage.”—2 Makor. 2:5-11.

6. Re ka yimuluga ka mokgo mang ga taba ya go kokona ke lekwalo?

⁶ Mo re yamogela gore Jehova o re tshwarele, re nyoko yimuluga ga taba ya go kokona ke lekwalo. Phela mo re sinya, ke ga hlago go re re tikwe re kokona ke lekwalo. (Pis. 51:17) Taba yone ke ya gabutši ka matla. Lekwalo la rune le ka re tšhofa gore re tšhentšhe ke mokane re make dilo gabutši. (2 Makor. 7:10, 11) Mara, mo re ka fo dulela go kokona ke lekwalo le mo re šele re sokologiye, re ka kgongwela ra šinya re lisetsa le go berekela Jehova. Mo re yamogela gore Jehova o re tshwarele, taba yowa ya go kokona ke lekwalo re napa re yi tlatega ku kgole le rune. Ke mokane re ko thogo berekela Jehova ka mokgo yene a nyakang re mmerekela ka gona—re na le lekwalo la go yela fote re jabodiye stereka. (Makol. 1:10, 11; 2 Thim. 1:3) Mara, re ka tšhentšha byang ka mokgo re tikwang re boye re sa kamake gore ka nnete Jehova o re tshwarele?

RE KA GELEPA KING GORE RE THOGO YAMOGELA GORE JEHOVA O RE TSHWARELE?

7-8. Jehova o hlatolliye gore ke yene wa mošaga mang ga Moše, fote taba yowa yi maka gore re sa kamake ying? (Eksoda 34:6, 7)

⁷ Ghayela ka mokgwa wo Jehova a hlatollang gore ke yene wa mošaga mang. Mo re beyisa, lebelela gore Jehova o yitseri king ga Moše nakwela a le Thabeng ya Sinayi.a (Bala Eksoda 34:6, 7.) Le mo nkare Jehova o na le mekgwa ya go tlala ya go bafala yo a tšibegang ka yona, mara o kgetiye go botsa Moše gore ke Yene “Modimo wa go kwelana go baba, wa gore o na le pelo ya gabutši.” Nje mara Modimo wa mošaga wonone a ka ganelela go tshwarela motho wa gore o sokologiye tsa mannete ga tso a di sinnyeng? A ka sa ro thoma! Phela tsotsone di ko ba di šupetsa gore aa kwelane go baba fote aa na pelo—go leng mekgwa ya gore Jehova a yi mo tshwanele fote a ka sa tsoge a le ka mokgonone.

⁸ Re ka di tshepa tsa gore mo Jehova a re o kwelana go baba, wa resa. A ka sa tsoge a bolabodiye matsaka. (Pis. 31:5) Byalo, re ka di tshepa tso a di hlayang. Mo nkare ke ntshitshire gago gore o lisetse go kikita ke lekwalo ka taba la tso o di sinnyeng botala, tiputsise gore: ‘Nje ke ya di tshepa tsa gore Jehova o kwelana go baba a boya a ba le pelo ya gabutši fote a ka tshwarela ye mongwana le ye mongwana wa gore o sokologiye ga tso a di sinnyeng?’ Phela mo nkare wa yi tshepa taba yone, o sa kamake le ka gonyana gore le wene o šele a go tshwarele.

9. Pisalema 32:5 yi re tšhutisa ying ka mokgwa wo Jehova a re tshwarelang ga tso re di sinnyeng?

⁹ Ghayela ka tso Jehova a hlohletseleng bo ba ngwadiyeng Bhayibele gore ba di hlaye ga taba ya go tshwarela. Mo re beyisa, lebelela gore Dafita wa gore o ngwadiye Bhayibele o yi hlatolla ka mokgo mang taba ya gore Jehova wa tshwarelana. (Bala Pisalema 32:5.) Dafita o yitseri: “Wene o ntshwarele ga tso ke di sinnyeng.” Lentsu la Seheberu la gore “go tshwarela,” le ka rela “go tlosa” kela “go kakola.” Byalo, mo Jehova a tshwarela Dafita, Dafita o f’lo kwa nkare Jehova o tlusiye morwalo wa go roba ho gage wa gore ne a wo kakodiye a tshetsha nawo. Ke mokane Dafita o f’lo kwa a yimulugiye ga molato wa go roba wo ne a kene a wo rwele. (Pis. 32:2-4) Le rune re ka kwa go yimuluga ga mošaga wonone. Mo re sokologa tsa mannete ga tso re di sinnyeng, a di nyake re fo ya mahlong re roba ke molato wa gore Jehova o šele a wo kakodiye le go wo tlosa ho ga rune.

10-11. Mantsu yawa ya gore “o tikemisele go tshwarela,” ma re botsa ying ka Jehova? (Pisalema 86:5)

¹⁰ Bala Pisalema 86:5. Dafita howa o bolabola ka Jehova gore “o tikemisele go tshwarela.” Puku ye nngwana ya go bolabola ka Bhayibele, ga wona mantsu yawa, mo yi bolabola ka Jehova yi re: “[Ke] wa go ‘tshwarelana—di fo ba ho ‘mading.’” Ke ntaba di fo ba di le ho mading ga Jehova gore a tshwarelane? Sekopa sa go latela sa temanyana yowa se hlatolla ka gore: “O ba nyaka ka matla bo ba gore ba bitsa wene.” Ga hlogotaba ya go fela re tšhutiye gore Jehova o tshepisa go šupetsa bo ba mo nyakang ka matla gore le yene o ba nyaka tsa mannete fote a ka sa tsoge a ba lahliye. Ka taba la gore o nyakanana tsa mannete, o nyoko ba “tshwarela a sa kokole” ka mokana ga bona bo ba sokologang ba resa. (Jes. 55:7, setw.) Mo nkare di ya go thathafela gore o yamogele gore Modimo o go tshwarele, o ka tiputsisa gore: ‘Mara nje ke ya di tshepa tsa gore Jehova o tikemisele go tshwarela ka mokana ga bona ba gore baa sokologa ba boya ba mo rapela gore a ba kwele go baba? Mo nkare ke ya di tshepa, nka sa kamake le ka gonyana gore le nna o ntshwarele mo ke mo kgopela gore a nkwele go baba le gore a ntshwarele.

¹¹ Di ka re kgomoletsa go tšiba gore Jehova wa di kwisisa gore ke rune batho ba go sinya. (Pis. 139:1, 2) Taba yowa yi napa yi yela gabutši ga pisalema ye nngwana ya Dafita ya gore le yona yi ka re gelepa gore re thogo yamogela Jehova gore o re tshwarele.

O SA LEBALE TSO JEHOVA A DI GOPOLANG

12-13. Pisalema 103:14 yi re king sa gore Jehova aa se libale ka rune, fote tsotsone di mo tšhofa gore a make ying?

¹² Bala Pisalema 103:14. Dafita mo a bolabola ka Jehova o re “aa libale gore ke rune lerole.” Ka wona mantsu yawa, Dafita o hlatolla taba ye nngwana ya go šupetsa gore ke ntaba Jehova a tikemisele go tshwarela bo ba mo rapelang ba gore baa sokologa: O dula a di tseyela hlogong gore rune batho tsa go sinya di fo ba ho mading. Gore re thogo kwisisa taba yowa gabutši, tla re lebeleleneng mantsu yawa ya Dafita.

¹³ Dafita o re Jehova “o di tšiba gabutši gore re makiwwe byang.” O makiye Adamo “ka lerole la mo fase” fote o di tšiba gabutši gore batho ka hlago ba na le tso di ba kgerelang—mo re beyisa, re ya di hloka go ja, go yetsela le go wona. (Gen. 2:7) Mara mo Adamo le Efa ba sinya, taba ya gore ke lerole yi tokegele ka hlatollo ye nngwana. Ka taba la gore ke rune ditlogolwane tsa bona, tso tsa go sinya re f’lo belegiwa natso fote tsotsone di maka gore taba ya go maka tsa go tšwa pateng yi fo titlela. Jehova o di tšiba gabutši tsotsone. Mara mo Dafita a hlaya gore Jehova aa libale gore ke rune lerole, ke mo a rela le gore ka taba la gore Jehova wa di tšiba tsa gore re batho ba go sinya, o dula a re kwela go baba. Re ka fo beya tso mantsu ya Dafita ma di relang ka mokgo: Jehova wa di kwisisa tsa gore re ko fela re kekemisa go gongwana; byalo mo di ka makega, o fo kwa di mo tšhofa gore a re kwele go baba le go re tshwarela mo re sokologa tsa mannete.—Pis. 78:38, 39.

14. (a) Dafita o hlayye ying se sengwana ka mokgwa wo Jehova a re tshwarelang? (Pisalema 103:12) (b) Re ka tšhuta ying ga mokgwa wo Jehova a yyeng a tshwarela Dafita? (Lebelela lebhokisi la gore, “Ka Mokgo Jehova a Tshwarelanang a Boya a Lebala ka Tsona.”)

¹⁴ King se sengwana so se ka re gelepang gore re sa kamake gore Jehova o re tshwarele? (Bala Pisalema 103:12.) Dafita o re mo Jehova a re tshwarela, tso re di sinnyeng O di tlatega ku kgole “go fo tshwana le mo bohlabela bo le kgole le bodikela.” Gabutšibutši, bohlabela bo dula bo le kgole ka matla le bodikela; di ka sa ro tsoga di gahlanne. Taba yowa yi re botsa ying mara ka tsa go sinya tso Jehova a di tshwarelang? Puku ye nngwana mo yi bolabola ka temanyana yowa yi yi beya ka mokgo: “Mo nkare tso tsa go sinya ba di tlatega kgole ka mokgo, di ra gore re ka sa kamake gore monkgelo wa tsona, mo di fitiyeng gona le mong tsa go re gopotsa tsona, di ko ba di nyamalele.” Ka dinako tse dingwana, monkgelo wa tsa go ja kela tse dingwana wo ka re gopotsa ka dilo tsa gore di makegiye botala. Mara mo Jehova a tshwarela, di fo ba nkare a go na le mong monkgelo wa gore wo ka mo gopotsa ka tso re di sinnyeng ke mokane dya maka gore a berekise tsona gore a re lukise.—Hezek. 18:21, 22; Meber. 3:19.

15. Re ka maka ying mo nkare re dulela go kikita ke lekwalo ka taba la tso re di sinnyeng botala?

¹⁵ Mantsu ya Dafita ya gore ma ho ga Pisalema 103 ma ka re gelepa ka mokgo mang gore re thogo yamogela gore Jehova o re tshwarele? Mo nkare re dulela go kikita ke lekwalo ka taba la tso re di sinnyeng botala, re ka tiputsisa gore: ‘Ayitsano ke lebala tso Jehova a di gopolang—gabutšibutši, ayitsano ke lebala gore Jehova o yi tseyela hlogong taba ya gore tso tsa go sinya di ho mading fote o nyoko tshwarela motho wa go fo titshwanela le nna wa gore wa sinya mara a sokologa? Ayitsano ke boya ke gopola le taba ya gore Jehova o kgeta tso a nyakang go di lebala—gabutšibutši, ayitsano ke gopola dilo tso ke di sinnyeng tsa gore Jehova o šele a ntshwarele ga tsona fote a ka tsoge a yi tsusiye taba yonone?’ Jehova aa dulele go nagana ka dilo tso o di sinnyeng botala. Barena, le wene o sa di make tsotsone. (Pis. 130:3) Mo re yamogela gore Jehova o re tshwarele, re ko thogo titshwarela le rune beng ga tso re di sinnyeng botala ke mokane ra ya mahlong ka lephelo.

16. Re beyisele mošupetso wa kotsi ya go dulela go nagana ka tso re di sinnyeng botala. (Lebelela le sethombhe.)

¹⁶ Tseya ka mošupetso ke wowa. Mo motho a dhrayiva koloyi, a ka lebelela seboki sa go šupetsa tso di tlang ka nthago gage. A ka fela a se lebelela, mara go ka ba kotsi mo a ka fo dulela go se lebelela ka moka nako. Gore a dhrayive gabutši, di nyaka a dule a lebelele mahlong ga pata yo a yi sepelang. Byalo, di fo tshwana le tso re di kekemisiyeng, di gabutši mo re fela re nagana ka tsona. Tsotsone di ka re gelepa gore re sa sa di boyelela. Mara mo re dulela go nagana ka tsona, re ka sa sa jabola fote re ko šitega le go berekela Jehova ka mokgo re ka kgonang. Koriyeneng mahlong re tshwaraganne ka taba ya go berekela Jehova le go nagana ka tsa ku mahlong tso a re tshepisiyeng tsona tsa gore dilo tsa go baba “di ka sa sa gupudiwa.”—Jes. 65:17; Diy. 4:25.

ARIYE MAHLONG O SA KAMAKE GORE BA GO TSHWARELE

17. Ke ntaba di nyaka re dula re sa kamake gore Jehova o re nyaka ka matla le gore o re tshwarele?

¹⁷ Di nyaka re sa kamake le ka gonyana gore Jehova o re nyaka ka matla fote o dula a tikemisele go re tshwarela. (1 Joh. 3:19) Ke ntaba? Ka taba la gore Sathane aa yetsele, o nyoko fo ya mahlong a liketsa go maka gore re tshepe gore ke rune batho ba go sinya la mafelelo la gore Jehova a ka sa tsoge a re nyakiye re ra le mong go re tshwarela. So se šalang ke gore, taba yo a nyakang go yi segelela nka yyoši—o nyaka go re lisisa gore re berekele Jehova. Di nyaka re dula re di yemele tsa gore Sathane o nyoko ro boya ka masaka ka taba la gore wa di tšiba gore aa sa na nako. (Kut. 12:12) Ye naa, re sa mo lisetse a hlula!

18. O ka maka ying gore o sa kamake le ka gonyana gore Jehova o go nyaka ka matla fote o tikemisele go go tshwarela?

¹⁸ Hlogotaba ya go fela yi go šupetsiye tso o tshwaneleng o di make gore o sa kamake gore o go nyaka la go sa hlayisege. Hlogotaba yowa yi go tšhutisiye gore o ka maka byang gore o sa yi kamake taba ya gore Jehova o go tshwarele. Mo re beyisa, nagana ka mokgo Jehova a hlatollang gore ke yene wa mošaga mang. Ghayela ka tso a hlohletseleng bo ba ngwadiyeng Bhayibele gore ba di hlaye ga taba ya go tshwarela. O sa lebale gore Jehova o yi tseyela hlogong taba ya gore tso tsa go sinya di fo ba ho mading fote o nyoko go kwela go baba. Fote o sa lebale gore mo a re wa go tshwarela, aa tshwarele dihafo—o tshwarela ka go felegelela. Phela o nyoko tikwa o jabodiye ka taba la gore a o kamake ka gonyana gore Jehova o go šupetsa gore o go kwela go baba fote go fo tshwana le Dafita, o ko thogo hlaya le gore, “Ke ya leboga Jehova, gore o ntshwarele ‘ga tso ke di sinnyeng’!”—Pis. 32:5.