Lune ba Gore le Šele le Tsofele—Ke Lune Makolwane ka ho Phutegong

Nakwenngwana le wene a o sa kgona go maka dilo tsa go tlala tso ne o di maka mo o sa gola. Fote le mo nkare wa di tšiba tsa gore ne o dula o tshepega ga Jehova mengwaga ya go tlala mara mo o tshwanisa tso o di makeleng Jehova ku botala le tsa gana byalo, o ka fo kwa o thomisa go kgongwela. Mo nkare o lebeletsanne le seyemo sa mošaga wowa, o ka gelepa king mara gore o jabole?

NAGANA KA SO JEHOVA A SE NYAKANG HO GAGO

Tiputsise gore, ‘Jehova o yemele gore ke make ying?’ O ka kgomoletsa ke mantsu ya ma leng ga Dotoronoma 6:​5, ya gore: “O nyake Jehova Modimo wago ka pelo yago ka mokana ga yona, ka bowene byago ka mokana ga byona le ka matšhika yago ka mokana ga wona.”

Temanyana yone yi šupetsa gore Jehova o nyaka gore o mmerekele ka pelo yago ka mokana ga yona, bowene byago le ka matšhika yago. Taba yone ya gore ke mong nnete yi ka go gelepa gore o kganele kgole le go titshwanisa le batho ba bangwana—kela go tshwanisa tso o kgonang go di maka gana byalo le tsa ku botala.

Nakwela o sa gola, di ka makega gore o yye wa karakara gore o thogo makela Jehova so o se kgonang. King so gana byalo o kgonang go se makela Jehova? Tso o karakarang go di maka gana byalo, ke mong tsona tso o kgonang go di maka ka matšhika yago ka moka o kene o libelele seyemo sago. Mo o ka fo tseya taba yone ka mokgonone, o ka feleletsa o di bona tsa gore o sa na o mmerekela go tshwana le ku botala. Ku botala ne o karakara le gana byalo o sa na o yi tshwere wa tšiba.

TSO O DI TŠHUTIYENG HO LEPHELONG DI KA GELEPA BA BANGWANA

Taba ye nngwana ke yowa: O sa fo dulela go nagana ka dilo tsa gore a o sa kgona go di maka mara nagana ka mašuba ya gore ma go thulegele ya gore o thogo gelepa ba bangwana. Ke nnete gore Mokreste wa gore o šele a gudiye go na le dilo tso a ka kgonang go di maka gana byalo tsa gore mo a sa gola ke mo a sa kgone go di maka. Mo re beyisa, a ka maka dilo tsowa tsa go latela:

Botsa ba bangwana ka tso o gahlanneng natso. Nagana ka tso Bhayibele yi di hlayang ga ditemanyana tsa go latela:

Kgoši Dafita: “Ke yye ka ba ye monyana fote gana byalo ke gudiye, mara a ke soko bona Modimo a lahla motho wa go loka, kela bana bage ba nyakana le tsa go ja.”—Pis. 37:25.

Jošuwa: “Ke šele ke le thina le go kgwa, fote le di tšiba gabutši gore a go na le selo ka ssoši ga dilo ka mokana ga tsona tsa gabutši tso Jehova Modimo wa lune a di tshepisiyeng tsa gore a di ya makega. Ka mokana ga tsona di makegiye. A go na le lentsu ka lloši la gore a le ya makega.”—Još. 23:14.

Nakwenngwana mo o sa gola o yye wa hlaya dilo tsa go yelana le ditemanyana tsone gore o tiyise ba bangwana. Mara ka taba la gore Dafita le Jošuwa ba yye ba gahlana le dilo tsone mong nako ya go lefa, tso ba di hlayyeng dya kwagala.

Mo nkare le wene ke mong botala o berekela Jehova, le wene o ka bolabola ka dilo tso Jehova a go makeleng tsona le tso o bonneng a makela ba bangwana. O sa gopola mo o bona Jehova a rufa batho bage? Ye naa, mo nkare go ka mokgonone o sa tšhabe go botsa ba bangwana ka tsona! Tsotsone di ka ba le maphomela ya go bafala ka matla go fo tshwana le ho di makiye le gago. Phela o ka di kgona go tiyisa magageru ka go fo ma botsa ka tso o gahlanneng natso.—Marom. 1:​11, 12.

Mokgwa wo mongwana wo o ka tiyisang ba bangwana ka wona ke mo o ya mogahlanong wa phutego ka mokgo o ka kgonang. Mo o maka ka mokgonone o ko thogo tiyisa magageru fote le wene ba nyoko go tiyisa. Connie wa gore re šele re bolabodiye ka yene, o re: “Go ya mogahlanong go n’gelepa gore ke sa kgongwele. Phela a gona gore ke kgongwele mo magageru ka Holong ya Mmušo ma n’šupetsa gore ma nnyaka ka matla. Ke liketsa ka matla go šupetsa bangwana gore ke ya leboga ka go ba neya dijumbhane nyana. Fote ke maka so nka se kgonang gore ke tšhele letsogo gore ke make tso tsa Modimo ke na le magageru.”

JEHOVA O DI TSEYELA GEDIMO DILO TSO O MO MAKELANG TSONA

Go na le mešupetso ya go tlala ka ho Bhayibeleng ya batho ba gore Jehova o f’lo ya mahlong a ba nyaka ka matla le mo yi le gore ne ba sa sa kgona go mmerekela go tshwana le mathomisong. Nagana ka Simiyoni wa Leisrayele wa gore ke mo a šele a tsofele wa gore fote ke mo a sa phela mo Jeso a belegiwa. Nakwela Simiyoni a vakašele tempeleng di ka makega gore o yye a bona masogana ma maka mmereko wa go tseyediwa gedimo ka matla gana hone. Mara Simiyoni gee? Fote di ka makega gore Simiyoni ne a ka fo ba a nagana gore ga Jehova a go sa le mong yene wa selo ka taba la gore aa sa kgona go berekela Jehova go tshwana le masogana yane. Mara Jehova ne a sa tseye dilo ka mokgonone. Ga Jehova, Simiyoni ne go le lelata la go tshepega ka matla fote Jehova o yye a mo thulela lešuba la go bona Jeso go sa le mong meetši. Phela Jehova o yye a berekisa Simiyoni fote, gore a sabalatse seporofeto sa go bolabola ka Mesiya wa gore o sa ga tla! (Lluk. 2:​25-35) Di fo ba lekgwaying gore Jehova ne a sa lebelela taba ya gore Simiyoni o sa na le matšhika naa. Mara Jehova ke mo a lebelele tumelo ya Simiyoni ya gore yi tiyye, “fote ke mo a hlawolegiye.”

Le wene o ka tshepa o tiyisiye gore Jehova o yi tseyela gedimo ka matla taba ya gore o mmerekela o kene o tshepega le mo go kene go na le tsa go go kgerela. Mara “Modimo wa di yamogela ka taba la gore Modimo aa nyake gore motho a neyele ka tsa gore a ka sa di kgone, mara o nyaka gore a neyele ka tso a di kgonang.”—2 Makor. 8:12.

Byalo, wene o fo hlupega ka tso o kgonang go di maka. Mo re beyisa, nagana ka mekgwa ye mengwana yo o ka yi berekisang gore o thogo tšhomayela le mo nkare a o tseye nako ya go lefa. Ayitsano o ka kgona go tiyisa ba bangwana o berekisa fowunu kela lekhate? Dilo tse dinyana tso o di makang tsa go šupetsa gore wa nyakanana di ka tiyisa magageru, ka matlamatla mo di maka ke motho wa go tshwana le wene wa gore o berekele Jehova mengwaga ya go tlala ka matla.

Le mo yi le gore bo ba gore ba šele ba tsofele ba na le tsa go ba kgerela mara ba ka di kgona go berekela Jehova ka matla. Lebelela tso di makegeleng mogageru wa mosadi wa hala Bohlabela bya Afrikha ga lebhokisi la go latela la gore, “Mogageru wa Mosadi o Berekisiye Bhayibele Gore a Phonise Lephelo la ye Mongwana.”

O sa lebale gore mošupetso wago wa gore o berekele Jehova mengwaga ya go tlala fote o sa na o ya mahlong o mmerekela o kene o tshepega, wo ka tiyisa ba bangwana ka matla. Phela mo ba bolabola ka batho ba go tiyisela ba ra lune, fote o ka yi tshepa o tiyisiye taba ya gore “Modimo aa na pelo ye phifadu fote a ka sa libale tso le di makiyeng, le ka mokgo le šupetsiyeng ka gona gore le kwana le lebitso lage ka go berekela bo ba go hlawolega fote le kene le ya mahlong le ba berekela.”—Maheb. 6:10.

DULA O TSHWARAGANNE O GELEPA BA BANGWANA

Bo ba go tšhutega ba hlaya gore batho ba go tlala ba gore ba šele ba gudiye ba gore ba gelepa ba bangwana a ba nape ba lwala-lwala, ba nagana gabutši fote ba phela nako ya go lefa.

Ke nnete gore mo o makela ba bangwana dilo tsa gabutši tsotsone a di rele gore di nyoko tlosa go tsofala hone. Ke Mmušo wa Modimo fela wa gore wo nyoko maka tsotsone ka go tlosa selo sa go maka gore re tsofale le go kgwa—go leng taba ya go sa yenela ya gore re yi yanngwe ga Adamo.—Marom. 5:12.

Mara le gana byalo lowa, mo o maka tso Jehova a go kgopelang gore o di make, gana hone go kena le taba ya go gelepa ba bangwana gore ba mo tšibe, tsotsone di nyoko maka gore tumelo yago yi tiyelele fote dya maka gore o phelege. Lune ba gore le šele le gudiye, barena di tšibeneng tsa gore Jehova o wo tseyela gedimo mmereko wo le wo makang fote phutego yi tseyela gedimo mošupetso wa lune wa go ba le tumelo.