Ke ya Leboga Gore ke Kgetiye Mmereko wa Gabutši

Ke golele magayeng hala Australia. Babelegi baka le bokokwane baka ba tšhutiye nnete ka bo 1950. Ke thomisiye go tšhomayela ke na le 6 ya mengwaga ke mokane ka kolobetsiwa ke na le 13 ya mengwaga. Ne ke fela ke ba mošupatsela wa go gelepa mo dikolo di kwala. Ne ke nyaka Jehova ka matla fote ke nyaka go mmerekela go ya go yye.

Mo ke na le 15 ya mengwaga, bo ne ba re yetetsa ga tsa mekgano sekolong, ba yye ba di bona gore ke teya ke tshwarelele ga tsa mekgano. Ka taba la tsotsone, ba go yemela mokgano wa rakhbhi ba yye ba nneya maphephe gore ke ma tlatse ke thogo kganela mokgano wone. Ke yye ka kwana le taba yone, ka nyaka go liketsega gore ke be ye mongwana wa go tšibega wa go kgana rakhbhi mara ne ke šele ke tineyele ga Jehova. Papa o yye a mpotsa gore ke ghayele ka sepheto so ke se makiyeng mathomisong sa go tineyela, mo ke soko bane ke segelela sepheto sa go lelekisana le tsa mekgano. Ke yye ka maka tso papa a mputsiyeng tsona, ka di bona gore nka sa kgone go maka dilo ka dipedi ke mokane ke yye ka gana go tlatsa maphephe yane. Ka nthago ga dikgwedi, Mokgahlo wa tsa Mekgano wa Australia hala Canberra wo neyye mmereko wo mongwana wo nyaka go nlokotša ga tsa go taboga, gore ke yemele naga ya Australia ga Mekgano ya Diolimpiki. Fotefote, ke yye ka gana ke sa thogathoge ka taba la gore ne ke nyaka go makela Modimo so ke mo tshepisiyeng sona.

Ka nthagonyana, ke yye ka lisetsa sekolo ke mokane ka thomisa go ba mošupatsela, go leng selo so ne ke nyaka go segelela sona mathomisong. Mara, ku gaye ne re gayela sekwetše byalo ke yye ka lisetsa go ba mošupatsela ka ya ka nyaka mmereko wa nako ka moka wa go dhirayiva motšhini wa mašimong. Ne ke sa le ga mengwaga ya mo ke sa gola fote ke dula ke le ntoši. Ke mo ke kene ke sa berekela Jehova mara ne ke fo makela moyano. Senghana saka le Jehova ne se thomisa go kgwelakgwehla. Ke yye ka kgeta banghana ba go gaputlela mokgete ka matla fote ba sa phele ka melawo ya Modimo, ke mokane ke yye ka liketsega ka nyaka go maka tso ba di makang. Ke yye ka sinya senghana saka le Jehova ka taba la dilo tsa go fo tijabodisa tsa gore ke tsa senakonyana.

Ne ke nyaka go lukisa dilo, byalo ke yye ka rurela ga toropo ye nngwana ya kgole gore ke tšhabelele banghana bone baka. Ke yye ka thomisa go šutela thina le Jehova ka boyela ka ba mošupatsela fote. Ke mokane, ke yye ka gahlana le kgareba ya gore yi na le dihlong ya go tšwa magayeng yo ba reng ke Leann McSharry, wa gore ne go le mošupatsela ke mokane re yye ra ba banghana. Ne re dula re bolabodisana ka tso ne re nyaka go di segelela, ga gore ne go kena le taba ya go ba barumiwa. Re šadhiye ka 1993. Ka moka ga rune ne re nyaka gore Jehova go be yene ye a yetetsang maphelo ya rune.

Go Segelela Tso ne re Nyaka go di Segelela

Ke napiye ke ba mošupatsela wa nako ka moka go tshwana le Leann, mongwaga wonone. Re yye ra phela ka sosone re nang naso fote ra kganela kgole le dikoloto, ke mokane ra reka kharavane ya botala gore re dule ga yona. Re fetsiye kobodi ya mengwaga re ya go gongwana le go gongwana mo mokgahlo wa Jehova ne wo re romela gona, fote ne re bereka mmereko wo mongwana le wo mongwana gore re thogo tiphidisa. Ne re tšhomayela le diphutego tse dinyana ga dipoleke tse dikgolo, dipoleke tsa go se na meyedi le ga dipoleke tsa kgole tsa kgwaakgwa tsa magayeng tsa Queensland. Ga tlele, ne re hloma matente ga dipoleke tsa kgole, re tshwara megahlano mašahleng kela re ya ga holo ya thina ya gana hone. Ne re jabodiye. Mara ne re fela re tiputsisa gore, ‘Ayitsano re ka makela Jehova se sengwana sa go phala sowa?’ Re krayye phetolo ka go yakgoswa.

Mokgahlo wa Jehova wo yye wa re kgopela gore re be barumiwa, re ye re bereke ga naga ye nngwana! Mara, ne re tšhugiye fote re tikwa re sa tshwanelege gore re be barumiwa ka taba la gore a sanka ra ya Sekolong sa Gilead gore ba ye ba re lokotše. Ne re kwana ka matla le mmereko wa borumiwa mara ka taba la gore ne re se na ditšhuto tsa go tlala tsa Bhayibele ga tšhomo yela ne re yi bereka ya kgole, ne re bona nkare a yi rune mathitšere ya gabutši.

Taba yowa ne yi re kokona ke mokane re yye ra botsa mogageru Max Lloyd, wa Komiti ya Lekala.a O yye a re botsa gore mo re maka gore re krayege le mo re tikwa nkare a re na mokgola, Jehova o nyoko re lokotša a maka gore re segelele se sengwana le se sengwana so a se kgopelang ga rune. O yye a re tiyisa ka matla go tshwana le papa wa go nyakanana, ke mokane ra yamogela mmereko wa rune ka matsogo ka mabedi ra ya Sri Lanka.

Mmereko wa Gore a wo Lula

Ka 1999, re segele hala Colombo toropong ye kgolo ya Sri Lanka. Ne yi sa tshwane le poleke yo ne re tšwa ga yona ya magayeng ya gore yi bebiye hala Australia! Gana hone ga poleke yone ne go na le mekurukuru, mehlupego, batho ba go tlala, batho ba go kgopela bangwana gore ba ba gelepe le mebolabolo ya mehlobohlobo. Mara, ne go na le dilo tsa gabutši hala Sri Lanka—magageru ya go bafala le batho ba go tlala ba go tinyanafatsa ba gore ne ba sa tšibi Jehova.

Ba yye ba re romela Kandy, ga poleke ya go bafala ya gore yi dukulugele ke dimelane tsa tiya le maropho. Toropo yone ne yi tšibega ka ditempele tsa go tlala tsa medimo ya dithombhe tsa Buddhi. Fote ne go fo ba paranyana ya batho bo ne ba tšiba ka ye a Makiyeng dilo. Phutego ya rune ne yi na le magageru ya go bolabola Sesinhala le Setamil, byalo megahlano ne yi tshwariwa ka mebolabolo yone ka mmedi. Go tšhuta Sesinhala ne go le ntshitshire mara phutego le bo ne ba tšhuta Bhayibele ne ba jabola mo ba kwa re tilomaloma le mo re fambhola ga go tlala, ba fela ba re tshega!

Le mo go le ka mokgonone, mmolabolo ne go se wona wo ne wo re hlupa ka matla. Ne go ro ba mong la mathomo re phigisiwa go baba ho lephelong. Tšatši le lengwana re yye ra dukulugela ke mogoba wa batho wa gore ne wo kwatiye ka matla. Ba bangwana ba yye ba tšhuba dipuku tsa rune mo la ba bangwana ba kene ba tula nna le mogageru ye mongwana ba boya ba re raga. Ka nako yonone re yye ra rapela Jehova gore a make gore re bebe fote a re gopole mo re ka kgwa. Re yye ra kwa re yimulugiye mo mogoba wone wo sepela. Ne re hlagasela mo re tloga hone polekeng fote re yye ra leboga Jehova gore o re tšhireletsiye.

Mo nako yi kene yi ya re yye ra tseya Sri Lanka go le gaye. Le mo go na le dintwa tsa go yahluganya setšhaba, re yye ra jabola mo re bona ka mokgo Jehova a yye a goga batho ba dipelo tsa go bafala gore ba tle ka mutšing wage wa batho ba gore ba mamarelanne. Fote ne re jabolela go bona poleke ya go bafala ya go dukuluga ke meetši. Mara, ka nthago ga mengwaga ka mmedi, bo ba go lawola ba yye ba dumelela gore bo ba go yeta dikereke mahlong ba ba goge ka nko ke mokane barumiwa ba go tlala ba yye ba tloga hone nageng.

Mo mabeke ma kene ma takamela, ne re sa sa tšiba ditaba tsa rune fote re šekela. Re feleletsiye kaye? Mogoba wa go Lawola wo yye wa re romela Papua New Guinea. Re segele toropong ye kgolo ya Port Moresby, ka September 2001.

Papua New Guinea—Poleke ya go ba le Dilo Tsa Mehlobohlobo

Le mo Papua New Guinea yi le thina le Australia mara maphelelo ya bona le ditšo tsa bona ne di sa tshwane. Fote ne di nyaka gore re kene fase re tšhute. Re yye ra tšhuta Setok Pisin, go leng mmolabolo wo wo bolabodiwang ka matla hone nageng gare ga mebolabolo ya go teya ka ku ga 800!

Ka nthago ga kararo ya mengwaga re bereka toropong ya Popondetta, ba yye ba re kgopela gore re make mmereko wa go putuluga. Ne re sa di nagana gore Jehova a ka re berekisa ka mokgwa wowa! Ne ke tseyela gedimo mmereko wa bapotulugi ka gore ba re yetetsa, ba teya ba tshwarelele mo ba tšhutisa fote ba butšwiye mara ne ke tikwa ke sa tshwanelege gore ke sepele ke gelepa diphutego. So ne ke nyaka go se segelela ke go ba morumiwa. Tsa go ba mopotulugi ne ke sa di nagane le ka gonyana! Ke f’lo šala ke yahlamme mo ke bona gore Jehova o nthulele lešuba lowa.

Ga ditoropo tso ne re vakašela ga tsona, ne re tlwayele gore di na le mohlagase, meetši le kamara ya gore yi na le mpeto. Ga dipoleke tsa magayeng a di šiyo dilo tsone. Ne re yetsela dintlong tse dinyana, re yapega tawong ka mollo re boya re hlapa nokeng le meyeding—mara mo nkare dikwena di ho thina ne re ga meetši ka pakete re ye hlapela ntlong.

Ga mmereko wowa, ne di nyaka re tiyisele go phala ka mokgo ne re tiyisela ka gona ku mathomisong. Mara ne re sa kamake gore mo re ka berekisa ‘matšhika ya re nang nawo,’ Jehova o nyoko maka gore re phomelele. (Bayahludi 6:14) Diphutego tsa go tlala le megoba tso ne re di vakašele ne di se lula go di kraya, ka taba la gore di sabalele ka teng ga mašahla ya gore ma rokanne, madhamo le dithaba. Ne re sepela ka dikoloyi, dikepe, dielebhreyi le ka mawoto gore re thogo kraya magageru.b

Mo re vakašela phutego ya gore yi thina le mo go kgerang naga ya Indonesia, ne re sepela dikhilomitha tsa go teya ka ku ga 350 ga dipata tsa gore a di na sekontiri. Ga mayeto ya go teya ka ku ga 200, ne re tshela meyedi ya go yela meetši le dinoka tsa go ba le mabhrogo ya manyana. Mo mengwaga yi kene yi takamela, ne re fetsa diawara tsa go tlala re kene re yepa le go tšhofa koloyi ya rune ya gore ne yi potlomele ka teng ga maraga, mafelelong re yye ra segela ga magageru ya gore ne ma re yemele ma kene ma ngwalangwala ma tshwere tsa go ja.

Ke mo re berekisa dielebhreyi tse dinyana mo re ya ga dimitšane tsa gore di dithabeng, ga go tlala ke mo di nyaka gore ye wa go dhrayiva elebhreyi a yeme ku sebakabakeng gore a kraye mo a nyoko yi yemisang gona. Byalo mo a nyaka go yema, o thomisa ka go lebelela gore a gona bananyana kela dipholwane. Ke mokane re tilukiselela go yema ga poleke ya go ba le leraga ya gore yi kotsi fote a ya yemega, ya gore yi gedimo ga thaba ya gore yi lefiye dimitha tsa go teya ka ku ga 2 100 kela (7 000 ya mafiti). Ka dinako tse dingwana, mo re šele re nyaka go tloga ga dipoleke tsone tsa kgole tsa magayeng ne di nyaka re kalama dithaba re sepela ku gedimo ga tsona.c

Ka dinako tse dingwana ne re rotoga dithaba, re sepela ga dipoleke tsa go fisa tsa go ba le meetši le ga dipoleke tsa go ba le mogudi fote re kene re rwele dikhwama tsa rune tsa gore di tlele ka dipuku le dilo tse dingwana tso re nyoko di berekisang. Ka taba la gore ne re na le magageru ya gore ne ma tlalele ga tso tsa Modimo, mayeto yane ma re thulele mašuba ya gore re kgone go bolabodisana nawo re boya re tshegelela.

Re dumelelana le mantsu ya Pawulo wa lepostola ya ma leng ga 1 Mathesalonika 2:8 mo a re: “Ka taba la gore re le nyaka ka matla, di re jabodisa ka matla . . . mo re neyela ka maphelo ya rune gore re thogo le gelepa.” Le rune re di bonne gore magageru ne ma tikemisele go maka tsotsone le ga rune, fote ne ma tikemisele go re kgwela gore ma re tšhireletse ga dikgohlane tsa gore di na le dilo tsa go lwa ka tsona. Tšatši le lengwana, Leann o yye a tshosetsa ke monna wa gore o tshwere thipa. A ke ya kgona go mo gelepa ka taba la gore ne ke le ga mitši ye mengwana. Mogageru o yye a yema segareng ga Leann le morenela ka go yakgoswa. Mogageru o yye a kwalela ka go nyana fote a kgona go tšhaba mola ba bangwana ba yye ba tabogela ga morenela wa gore o kwatiye gore ba ye ba lamole. Jehova ne a dula a re gelepa tšatši le lengwana le le lengwana, gore re thogo ya mahlong re tiyisa magageru ga poleke yowa ya gore ne yi fo ya yi yeketsega ka bokgohlane.

Ka taba la gore Papua New Guinea ne go se na dipoleke tsa go tlala tso ba yalafelang batho ga tsona, ne go le ntshitshire gore re dule re philegiye. Ka 2010, Leann o yye a kena ke bolwele bya kotsi bya gore ne bo nyoko feleletsa bo mmolayye, byalo re yye ra ya Australia gore ba ye ba mo yalafe. Jehova o yye a maka gore re kgibe. Mafelelong, ditogotela di yye dya kraya dihlare tsa go yalafa bolwele byone. Togotela ye nngwana yitseri: “Ne le berekela Modimo. Gana byalo wa le berekela.” Ka nthago ga dikgwedi tsa go tlala, re yye ra boyela mmerekong wa rune.

Dilo Tsa go Tlala Tso re Tshwaneleng re di Make Gaye Australia

Re fetsiye mongwaga le go feta gana hone re kene re lata dihlare tsa Leann hala Australia. Mafelelong, ka 2012 lekala le yye la re botsa gore re dule gana hone gore re thogo kraya ditogotela ka bo thina. Ka nthago ga mengwaga ya go tlala re tlugiye howa, ntshitshire ne yi se gore re nyaka go fola ho mmeleng mara ne re nyaka gore re tšhentšhe ka mokgo re naganang le ka mokgo re tikwang. Ne re kgongwele mo re šiya mmereko wa rune le magageru ya gore re ma nyaka ka matla. Re yye ra tikwa nkare re šitegiye fote a re sa na mokgola ga Jehova. Ka taba la gore ne go le botala re tlugiye Australia, ne re sa sa go tlwayele gore ke gaye. Ka nako yonone, ne re nyaka gore magageru ma re gelepe.

Ka nthago ga gore Leann a be kawone, re yye ra bereka re le mašupatsela ya go hlawolega hala Wollongong, ka borwa bya Sydney, New South Wales. Ka nthago ga mongwaga kela go feta hone, ne re jabodiye ka matla mo ba re mema ga Sekolo sa Bhayibele sa Makreste ya Gore ma Šadhiye (gana byalo ba re ke Sekolo sa Batšhomayedi ba Mmušo). Ke mokane lekala la Australasia le yye la re romela gore re ye re make mmereko wa boputulugi. Re fetsiye mengwaga ya go tlala re vakašela diphutego le megoba ya gore yi ditoropong tse dikgolo tsa gore batho ba dula ba tshwaraganne, ditoropo tsa kgwaakgwa le dipoleke tsa magayeng tsa gore ba loba dihlapi ga tsona. Mmereko wa rune wa gana byalo ne re ya le ga poleke ya kgwaakgwa ya lebowa-bodikela bya Australia le dipoleke ka moka tsa Timor-Leste.

Ke bereka le mosadi waka fote o dula a nthega aa šepise, go ro ba lekolwane la gore ke le neyye ke Jehova. A gona mmereko wo Leann a yyeng a wo gana, le mo wo thathafa kela go le mmereko wa gore a o tiketli. Mo ba mmutsisa gore o kgona byang go tiyisela seyemo sone sa go thathafa, o yitseri, “Ke botsa Jehova dilo ka moka.” Ke mokane mo a bala Lentsu la Modimo, o dumelela Jehova gore go be yene ye a mo yetetsang ka mokgo a tikwang, ka mokgo a naganang le ka mokgo a makang dilo ka gona.

A ke tisole le ka gonyana mo ke lisetsiye Jehova gore go be yene ye a yetetsang lephelo laka, go na le go nyaka go tšibega le go lelekisana le mekgano ya lefase lowa. Ke di bonne gabutši gore Jehova a ka re lokotša gore re segelele se sengwana le se sengwana so a nyakang re se segelela, mo re yamogela mmereko wo a re neyang wona. Ke tšhutiye gore mo ke na le mathatha le mo ke nyaka go segelela sepheto di nyaka ke thomisa ka go rapela, ke kgopele Modimo gore a nhlalefise fote a nneye moya wage tšatši le lengwana le le lengwana. Papa wa rune wa go nyakanana Jehova, o re rufiye la go sa hlayisegi, fote re di yemele ka maahlo ya makhubedu go bona tso a sa nyakang go di segelela a berekisa “ditša tsa botsopa” tsa go tshwana le rune.—2 Makorente 4:7.