Genesi

18 Ka morago ga moo, Jehofa o ile a iponagatša go Aborahama mehlareng e megolo ya kua Mamure nakong ya ge Aborahama a be a dutše mojakong wa tente ya gagwe ge go be go fiša mosegare. 2 Eitše ge a lebelela a bona banna ba bararo ba eme kgojana le yena. Ge a ba bona, a tloga mojakong wa tente a kitima a yo ba gahlanetša gomme a inamela fase. 3 Ke moka a re: “Jehofa,* ge e ba o nkamogela, hle anke o nketele. 4 E re re le tlišetšeng meetsana re le hlapišeng maoto, gomme le khutšeng kua tlase ga mohlare. 5 Ka ge le tlile mo go nna mohlanka wa lena, e re ke le feng senkgwanyana gore le kgone go hwetša matla. Ka morago ga moo le ka fetela pele.” Ke moka bona ba re: “Go lokile. O ka dira seo o se boletšego.”

6 Ke moka Aborahama a kitimela tenteng go Sara a re: “Dira kapela o tle le flouru ya dikhilograma tšeo e ka bago tše 12,* o e dube gomme o apee dinkgwa.” 7 Ke moka Aborahama a kitimela mohlapeng a kgetha powana e kgahlišago, gomme a e nea mohlanka wa gagwe gore a e hlabe a e apee kapejana. 8 Ka morago ga moo a tšea potoro, maswi le powana yeo a bego a e apeile gomme a di nea banna bao. Ke moka a ema kgauswi le bona ka fase ga mohlare ge ba be ba dutše ba eja.

9 Bjale ba re go yena: “Sara mosadi wa gago o kae?” Yena a re: “O ka mola tenteng!” 10 Ke moka yo mongwe wa bona a re: “Ke tla boa go wena ngwaga o tlago ka yona nako ye, gomme Sara mosadi wa gago o tla be a na le morwa.” Sara o be a theeditše a le mojakong wa tente yeo e bego e le ka morago ga monna yoo. 11 Aborahama le Sara ba be ba tšofetše, ba godile kudu. Sara o be a fetile mengwaga ya go belega bana. 12 Ka gona Sara a segela ka pelong a re: “Na nkare ke tšofetše ka tsela ye le mong wa ka le yena a tšofetše, ka tla ka thabela go ba le ngwana?” 13 Jehofa a re go Aborahama: “Ke ka baka la’ng Sara a ile a sega a re: ‘Na ruri nka belega le ge ke tšofetše?’ 14 Na go na le seo se ka palelago Jehofa? Ke tla boa go wena ngwaga o tlago ka yona nako ye, gomme Sara o tla be a na le morwa.” 15 Eupša Sara a gana a re: “Ga se ka sega!” ka gobane o be a boifa. Morongwa a re go yena: “Ee, o segile.”

16 Ge banna bao ba emelela gore ba sepele ba lebelela thoko ya Sodoma, gomme Aborahama a sepela le bona gore a ba felegetše. 17 Jehofa a re: “Nka se utele Aborahama seo ke tlago go se dira. 18 Bana ba Aborahama e tla ba setšhaba se segolo le se matla, gomme ditšhaba ka moka tša lefase di tla šegofatšwa ka baka la gagwe. 19 Ka gobane ke mo kgethile gore a rute barwa ba gagwe le ditlogolo tša gagwe ka moka gore ba kwe Jehofa ka go dira se se lokilego le go phetha toko, e le gore nna Jehofa ke tle ke nee Aborahama dilo ka moka tšeo ke mo tshepišitšego tšona.”

20 Ke moka Jehofa a re: “Ke kwele batho ba bantši ba lla ka Sodoma le Gomora, e bile dibe tša batho ba moo ke tše dikgolo kudu. 21 Ke tla theogela moo gore ke bone ge e ba dilo tšeo batho ba llago ka tšona e le nnete, le go bona ge e ba ditiro tša batho ba moo e tloga e le tše mpe. Ke nyaka go tseba seo.”

22 Banna bao ba babedi ba tloga moo ba ya Sodoma, eupša Jehofa yena a šala le Aborahama. 23 Ke moka Aborahama a batamela gomme a re: “Na ruri o ka fediša batho ba ba lokilego le ba babe? 24 A re re motseng woo go na le batho ba 50 ba ba lokilego, na o tla fediša batho ba motseng woo ka moka? Na o ka se ba lebalele ka baka la batho ba 50 bao ba lokilego bao ba dulago moo? 25 Ga ke tshepe gore o ka bolaya motho yo a lokilego le yo mobe, e le gore motho yo a lokilego a diragalelwe ke seo se diragalelago yo mobe. Ga ke tshepe gore o ka dira seo. Na Moahlodi wa batho lefaseng ka moka a ka se dire se se lokilego?” 26 Ke moka Jehofa a re: “Ge nka hwetša batho ba 50 bao ba lokilego motseng wa Sodoma, gona ke tla lebalela batho ba motseng woo ka moka ka baka la bona.” 27 Eupša Aborahama a bolela gape a re: “Ke nna yo ke na le sebete sa go bolela le wena Jehofa mola e le gore ke motho wa go se re selo* pele ga gago. 28 A re re mo motseng go na le batho ba 45 ba ba lokilego, na o tla fediša motse woo ka moka?” Yena ge a araba a re: “Nka se ke ka o fediša ge e ba nka hwetša go na le batho ba 45 ba ba lokilego go wona.”

29 Eupša Aborahama a bolela le yena gape a re: “A re re moo motseng go hwetšwa batho ba 40 ba ba lokilego.” Modimo a re: “Nka se ke ka o fediša ka baka la batho bao ba 40.” 30 Eupša Aborahama a tšwela pele a re: “Jehofa, o se ke wa nkgalefela hle, e re ke tšwele pele ke bolele. Bjale o tla dira eng ge o ka hwetša batho ba 30 bao ba lokilego mo motseng?” Yena a re: “Nka se o fediše ge e ba nka hwetša batho ba 30 bao ba lokilego mo go wona.” 31 Eupša Aborahama a tšwela pele a re: “Ke nna yo ke na le sebete sa go bolela le wena Jehofa. Bjale o tla dira eng ge o ka hwetša batho ba 20 bao ba lokilego mo motseng?” Yena a re: “Nka se o fediše ka baka la batho bao ba 20.” 32 Mafelelong Aborahama a re: “Jehofa, o se ke wa nkgalefela hle, e re ke bolele la mafelelo. Bjale o tla dira eng ge o ka hwetša batho ba lesome bao ba lokilego mo motseng?” Yena a re: “Nka se o fediše ka baka la batho bao ba lesome.” 33 Ke moka ge Jehofa a feditše go bolela le Aborahama a sepela, gomme Aborahama yena a boela gae.