Genesi

20 Bjale Aborahama a hudugela Negebe, ke moka a dula magareng ga Kadeshe le Shuri. Ge Aborahama a be a dula Gerara, 2 o be a bolela gantši gore Sara mosadi wa gagwe ke kgaetšedi ya gagwe. Ke moka Abimeleke kgoši ya Gerara o ile a roma bahlanka ba gagwe gore ba tliše Sara go yena. 3 Bošegong bjo bongwe Modimo o ile a bolela le Abimeleke torong a re: “O tlo hwa, ka gobane o tšere mosadi wa monna yo mongwe.” 4 Eupša Abimeleke o be a se a ka a robala le Sara. Ka gona a re: “Jehofa, na ruri o tla bolaya setšhaba seo se se nago molato? 5 Aborahama ke yena a mpoditšego gore Sara ke kgaetšedi ya gagwe, le Sara o mpoditše gore Aborahama ke kgaetšedi ya gagwe. Ka gona ga ke na molato, ka gore ke be ke sa tsebe gore seo ke se dirago ke phošo.” 6 Ke moka Modimo wa nnete a re go yena: “Le nna ke a tseba gore ga o na molato, ke ka baka leo ke sa kago ka go dumelela gore o robale le yena, e le gore o se ke wa ntirela sebe. 7 Bjale bušetša mosadi wa monna yoo go yena, ka gobane ke moporofeta wa ka gomme o tla go rapelela, ke moka o tla tšwela pele o phela. Eupša ge e ba o sa mmušetše, tseba gore wena le bohle ba lapeng la gago le tlo hwa.”

8 Ka gona Abimeleke a tsoga e sa le mesong gomme a bitša bahlanka ba gagwe ka moka a ba botša ka toro ya gagwe, ke moka ba tšhoga kudu. 9 Abimeleke a bitša Aborahama gomme a re go yena: “Ke ka baka la eng o re dirile selo se se sebe? Ke go dirile eng moo e lego gore o tlišeditše nna le setšhaba sa ka sebe se segolo ka tsela ye? Dilo tšeo o ntirilego tšona ga se tša loka.” 10 Abimeleke a tšwela pele a re go Aborahama: “O be o naganne’ng ge o be o dira tšona tše?” 11 Aborahama a re: “Ke ka gobane ke be ke nagana gore batho ba mo ga ba boife Modimo gomme ba tla mpolaya gore ba tšee mosadi wa ka. 12 Le gona, ka nnete ke kgaetšedi ya ka ka ge e le morwedi wa tate, eupša ga se morwedi wa mma, gomme ke mo nyetše gore e be mosadi wa ka. 13 Ge Modimo a be a re ke tloge ntlong ya tate ke sepele le naga, ke ile ka botša mosadi wa ka gore: ‘Ke kgopela o mpontšhe gore o a nthata ka gore kae le kae mo re yago gona o ba botše gore ke nna kgaetšedi ya gago.’”

14 Ke moka Abimeleke a tšea dinku, dikgomo le bahlanka ba banna le ba basadi a ba nea Aborahama gomme a bušetša Sara mosadi wa gagwe go yena. 15 Le gona Abimeleke a re: “Naga ye ka moka ke ya ka. O ka dula mo o ratago.” 16 Ke moka a re go Sara: “Bjale ke nea kgaetšedi ya gago ditšhelete tše 1 000 (sekete) tša silifera, go bontšha batho ka moka bao ba nago le wena le ba bangwe gore ga o na molato.” 17 Aborahama o ile a rapelela Abimeleke go Modimo wa nnete. Ke moka Modimo a fodiša Abimeleke le mosadi wa gagwe le makgoba a gagwe a basadi, gomme ba thoma go ba le bana. 18 Ka gobane Jehofa o be a dirile gore basadi ka moka ba ntlong ya Abimeleke ba se ke ba kgona go ba le bana, ka ge Abimeleke a be a tšere Sara mosadi wa Aborahama.