Puku ya Pele ya Dikgoši

7 Solomone o tšere mengwaga e 13 a aga ntlo ya gagwe ya mošate go ba go fihla a e fetša.

2 A aga Ntlo yeo e bitšwago Sethokgwa sa Libanoni ya botelele bja dimithara tše 45,* le bophara bja dimithara tše 22* le botelele bja dimithara tše 13,5* go ya godimo. A e aga godimo ga dilaene tše nne tša diphilara tša dikota tša metsedara. Godimo ga diphilara tšeo go be go na le dikota tša metsedara. 3 O ile a e rulela ka mapolanka a motsedara ao a bego a le ka godimo ga dikota tšeo di bego di le godimo ga diphilara, e be e le tše 45 gomme laene e nngwe le e nngwe e na le tše* 15. 4 Go be go na le dilaene tšeo di yago godimo tše tharo tša mafasetere ao a bego a na le diforeime, lefasetere le lengwe le le lengwe le be le lebane le le lengwe dilaeneng tšeo tše tharo. 5 Mejako ka moka le diforeime ka moka di be di na le mahlakore a mane ao a lekanago go swana le ge mafasetere ka moka ao a bego a lebane a be a na le mahlakore a mane ao a lekanago dilaeneng ka moka tše tharo.

6 O ile a aga moago wo o bitšwago Holo ya Diphilara wa botelele bja dimithara tše 22* le bophara bja dimithara tše 13,5* gomme go be go na le setupu ka pele ga yona seo se nago le diphilara le tlhaka.

7 O ile a aga holo yeo e bitšwago Holo ya Setulo sa Bogoši yeo a bego a tlo ahlolela ka go yona. Holo yeo gape e be e bitšwa gore ke Holo ya Kahlolo. A khupetša leboto la yona ka kota ya motsedara go tloga lebatong go fihla tlhakeng.

8 Ntlo ya mošate yeo a bego a tla dula go yona yeo e bego e le ka lapeng le lengwe e be e agilwe kgole le Holo ya Kahlolo eupša di be di agilwe go swana. Solomone o ile a aga ntlo e nngwe yeo e swanago le Holo ya Kahlolo gomme a e nea morwedi wa Farao yo a bego a mo nyetše.

9 Moago wo ka moka go tloga ka fantišene go fihla ka tlhaka le go tloga ka ntle ga moago go fihla lapeng le legolo, o be o agilwe ka maswika a go tura ao a bego a segilwe gabotse e bile a betliwe ka disaga tša maswika ka ntle le ka gare. 10 Fantišene e be e dirilwe ka maswika a magolo kudu ao a turago, maswika a mangwe e be e le a botelele bja dimithara tše 4,5* gomme a mangwe e le a botelele bja dimithara tše nne.* 11 Ka godimo ga maswika ao go be go na le maswika a go tura kudu ao a betlilwego gabotse, e bile go be go na le dikota tša metsedara. 12 Lapa le legolo le be le ageleditšwe ka leboto la dilaene tše tharo tša maswika a go betlwa le laene ya dikota tša motsedara, go swana le lapa la ka gare la ntlo ya Jehofa le setupu sa ntlo.

13 Kgoši Solomone a romela molaetša wa gore go bitšwe Hirama wa go tšwa Tiro. 14 E be e le morwa wa mosadi wa mohlologadi yo a tšwago molokong wa Nafutali. Tatago Hirama o be a e tšwa Tiro e bile a šoma ka koporo.* Hirama o be a na le bokgoni bja go dira dilo ka moka tšeo di bego di nyaka go dirwa ka koporo. Ka gona o ile a ya go Kgoši Solomone gomme a mo direla mešomo ka moka yeo a mo laetšego yona.

15 O ile a dira diphilara tše pedi tša koporo, philara e nngwe le e nngwe e be e le ya botelele bja dimithara tše seswai* go ya godimo, ge e nngwe le e nngwe ya tšona e metiwa ka thapo e be e dira dimithara tše hlano* ka botelele. 16 A dira dihlogwana tše pedi tša koporo gore a di bee godimo ga diphilara tšeo. Hlogwana e nngwe le e nngwe e be e le ya dimithara tše 2,5* go ya godimo. 17 Hlogwana e nngwe le e nngwe yeo e bego e le godimo ga philara e be e kgabišitšwe ka diketane, diketane tšeo le tšona di be di kgabišitšwe. Hlogwana e nngwe le e nngwe e be e na le dihlogwana tše šupa. 18 Go dikologa hlogwana e nngwe le e nngwe o ile a dira dilaene tše pedi tša digarenate gore di kgabiše dihlogwana tša diphilara. 19 Dihlogwana tša diphilara tšeo di bego di le setupung di be di bopegile go swana le mapolomo a dilili a botelele bja dimithara tše pedi.* 20 Dihlogwana di be di le godimo ga diphilara tše pedi, godimo ga dihlogwana tšeo tša nkgokolo go be go na le diketane tša go kgabišwa, le gona go dikologa hlogwana e nngwe le e nngwe go be go na le digarenate tše 200 (makgolo a mabedi) tšeo di bego di dutše ka laene.

21 O ile a hloma diphilara pele ga setupu sa tempele.* A bea e nngwe ka letsogong le letona,* a e reela leina a re ke Jakine,* ke moka a bea e nngwe ka letsogong le letshadi* a e reela leina a re ke Boase.* 22 Dihlogwana tša diphilara di be di bopegile go swana le mapolomo ao a bitšwago dilili. Mafelelong modiro wa go dira diphilara o ile wa fela.

23 Ke moka a dira sebjana se segolo sa tšhipi seo se bitšwago Lewatle, e be e le sa nkgokolo go tloga lehlakoreng le lengwe la molomo go fihla lehlakoreng le lengwe e be e le dimithara tše 4,5* gomme botelele bja sona go ya godimo e be e le dimithara tše 2,5.* Le gona go be go nyakega thapo ya dimithara tše 13,5* gore e se dikologe. 24 Ka tlase ga molomo wa sona go be go na le dikgabiši tša sebopego sa maraka gomme disenthimithareng tše 45* tša molomo wa sebjana seo go be go na le dikgabiši tše lesome, di dikologile sebjana seo ka moka. Dikgabiši tšeo tša sebopego sa maraka e be e le dilaene tše pedi, di bopeletšwe sebjaneng seo. 25 Se be se dutše godimo ga diswantšho tša dipoo tše 12. Dipoo tše tharo di be di lebeletše ka leboa, tše tharo di lebeletše ka bodikela, tše tharo di lebeletše ka borwa gomme tše tharo di lebeletše ka bohlabela. Sebjana seo se be se dutše godimo ga tšona, gomme dipoo tšeo ka moka di be di furalelane. 26 Bokoto bja sona bo be bo lekana le bophara bja seatla.* Molomo wa sona o be o bopegile go swana le molomo wa komiki le go swana le lepolomo leo le bitšwago lili le le thuntšego. Se be se tšhela meetse ao a lekanago dilithara tše 44 000.*

27 Ke moka a dira dikoloyana* tše lesome tša koporo, e nngwe le e nngwe ya tšona e be e le ya botelele bja dimithara tše pedi,* bophara bja dimithara tše pedi le botelele bja dimithara tše 1,5* go ya godimo. 28 Dikoloyana tšeo di be di dirilwe ka tsela ye: Di be di na le diphaphathi ka mathoko a tšona. Diphapathi tšeo di be di dirilwe ka koporo gomme di tsentšwe ka gare ga diforeimi tša koporo. 29 Godimo ga diphaphathi tšeo di bego di tsentšwe diforeimeng go be go na le diswantšho tša ditau, dipoo le bakerubi, go be go dirilwe se se swanago le godimo ga diforeime tša koporo. Godimo ga ditau le dipoo tšeo le ka tlase ga tšona go be go na le mekgabišo ya dikgare tšeo di lekeletšego. 30 Koloyana e nngwe le e nngwe e be e na le maotwana a mane a koporo le ditšhipi tša koporo tšeo maotwana a bego a dikologa go tšona. Le gona dikhoneng tše nne tša koloyana yeo go be go na le dilo tšeo di thekgago maotwana le ditšhipi tša koporo tšeo maotwana a bego a dikologa go tšona. Ka tlase ga sebjana seo se bego se le koloyaneng ya meetse go be go na le dilo tša go se thekga tšeo di bego di kgabišitšwe ka dikgare mahlakoreng ka moka. 31 Molomo wa sebjana o be o le ka gare ga karolo ya godimo ya koloyana e bile e le wa nkgokolo gomme o tšweletše ka godimo ga koloyana ka disenthimithara tše 45.* Karolo ya godimo ya foreime le dilo tšeo di bego di e thekgile di be di dira disenthimithara tše 67,* le gona molomong wa yona go be go na le mekgabišo. Diphaphathi tša yona e be e se tša nkgokolo eupša di be di na le mahlakore a mane a go lekana. 32 Maotwana a yona a mane a be a le ka tlase ga diphaphathi tša ka mahlakoreng, gomme dilo tšeo di bego di thekgile maotwana ao di be di kgomagane le koloyana. Botelele bja leotwana le lengwe le le lengwe go ya godimo e be e le disenthimithara tše 67.* 33 Maotwana ao a be a dirilwe go swana le maotwana a kariki ya ntwa. Dithekgo tša ona, dirimi tša ona, ditšhipi tšeo di tlogago riming ya leotwana go fihla gare ga leotwana le bogareng bja ona, ka moka ga tšona di be di dirilwe ka tšhipi yeo e tološitšwego. 34 Mo dikhoneng tše nne tša koloyana e nngwe le e nngwe go be go na le dithekgo tše nne. Dithekgo tša koloyana yeo di be di kgomagantšwe le yona. 35 Karolo ya godimo ya koloyana e be e na le lepanta la nkgokolo leo botelele bja lona go ya godimo e bego e le disenthimithara tše 22,* karolo ya godimo ya koloi, dikarolwana tše dingwe tša yona gotee le diphaphathi tša mahlakore a yona di be di kgomagane. 36  Mo godimo ga diphaphathi tša ka mahlakoreng a yona o be a kgabišitše ka diswantšho tša bakerubi, tša ditau le tša mepalema, gohle moo go bego go na le sekgoba, a ba a e kgabiša le ka dikgare go e dikologa. 37 O dirile dikoloyana tše lesome ka wona mokgwa woo. Ka moka ga tšona di be di swana, di lekana e bile di swana ka sebopego.

38 O ile a dira dibjana tše lesome ka koporo. Sebjana se sengwe le se sengwe se be se ka tšhela meetse ao a lekanago dilithara tše 880 (makgoloseswai-masomeseswai).* 39 Ke moka a bea dikoloyana tše hlano ka lehlakoreng le letona la tempele gomme tše dingwe tše hlano a di bea ka lehlakoreng le letshadi la tempele. A ba a bea sebjana se segolo ka lehlakoreng le letona la tempele go yela ka borwa-bohlabela.

40 Hirama o ile a dira le dibjana, digarafo gotee le dibjana tše dinyenyane.

Ka gona a fetša go direla Kgoši Solomone mošomo ka moka wo a bego a o dira ntlong ya Jehofa. O be a dirile dilo tše di latelago: 41 Diphilara tše pedi le dihlogwana tše pedi tšeo di bego di bopegile go swana le dibjana tše dinyenyane tšeo di bego di le godimo ga diphilara tšeo, dilaene tše pedi tša diketane tšeo di bego di diretšwe go kgabiša dihlogwana tšeo di bego di le godimo ga diphilara, 42 digarenate tše 400 (makgolo a mane) tšeo di bego di le godimo ga dilaene tše pedi tša diketane tšeo di bopegilego bjalo ka sefo, laene e nngwe le e nngwe ya ketane o be a e diretše dilaene tše pedi tša digarenate gore a di bee godimo ga dihlogwana tše pedi tšeo di bego di le godimo ga diphilara tše pedi, 43 dikoloyana tše lesome le dibjana tše lesome tšeo di bego di le godimo ga dikoloyana tšeo, 44 sebjana se segolo seo se bitšwago Lewatle le dipoo tše 12 tšeo di bego di le ka tlase ga sebjana seo, 45 a dira le ditšhitswana tša go olela molora, digarafo, dibjana tše dinyenyane le dilo ka moka tšeo di ka dirišwago. Hirama o ile a dira dilo tše ka moka ka koporo ye e phadimišitšwego go ya le kamoo Kgoši Solomone a bego a mmoditše gore a di direle ntlo ya Jehofa. 46 Kgoši Solomone a laela gore dilo tšeo ka moka di dirwe ka foromo ya letsopa tikologong ya Noka ya Jorodane, magareng ga Sukothe le Tsarethane.

47 Solomone a se kale dibjana tšeo ka moka ka gobane e be e le tše dintšhi kudu. Go be go sa tsebje gore koporo ya gona e be e imela bokae. 48 Dilo ka moka tšeo Solomone a bego a di diretše ntlo ya Jehofa ke tše di latelago: Aletare ya gauta, tafola ya gauta yeo go bego go tlo bewa senkgwa seo se neetšwego Modimo,* 49 dihlomelamabone tša gauta yeo e sego ya tswakwa le selo. Tše hlano a di bea ka go le letona gomme tše dingwe tše hlano a di bea ka go le letshadi pele ga phapoši ya ka garegare, le diswantšho tša mapolomo ao a thuntšego, mabone le dilo tša go swara dithapo tša mabone, dilo tše ka moka di be di dirilwe ka gauta, 50 dibjana, dilo tša go tima mollo, dibjana tše dinyenyane, dikomiki le dilo tša go swara magala, dilo tše ka moka di be di dirilwe ka gauta. Mabati a phapoši ya ka garegare, e lego Sekgethwakgethwa o be a a diretše ditšhipi tša go a dira gore a kgone go bulegela ka ntle le ka gare e bile a dirile le ditšhipi tša go thuša gore mabati a ntlo ya tempele a kgone go bulegela ka ntle le ka gare, le tšona di be di dirilwe ka gauta.

51 Ka gona, Kgoši Solomone a fetša mošomo ka moka woo a bego a swanetše go o dira ntlong ya Jehofa, ke moka a tliša dilo tšeo Dafida tatagwe a bego a di kgethagaditše. A tšea silifera, gauta le dilo tše dingwe gomme a di bea moo go bewago dilo tše bohlokwa ka ntlong ya Jehofa.