Puku ya Bobedi ya Dikgoši
3 Jehorama morwa wa Ahaba, e bile kgoši ya Isiraele kua Samaria ka ngwaga wa bo-18 wa ge Kgoši Jehoshafate wa Juda a buša gomme o bušitše mengwaga e 12. 2 O ile a dira dilo tše mpe pele ga Jehofa, eupša ga se a di dira kudu go swana le tatagwe goba mmagwe ka gobane o ile a tloša philara e kgethwa ya Baali yeo tatagwe a bego a e dirile. 3 Eupša o ile a dula a dira dibe tšeo Jeroboama morwa wa Nebata a di dirišitšego Isiraele. Ga se a ka a di tlogela.
4 Mesha kgoši ya Moaba o be a ruile dinku. Le gona o be a dula a išetša kgoši ya Isiraele sebego sa dikwana tše 100 000 (dikete tše lekgolo) le dinku tše tona tšeo di sego tša kotwa tše 100 000 (dikete tše lekgolo). 5 Ge Ahaba a se na go hlokofala, kgoši ya Moaba e ile ya thoma go lwa le kgoši ya Isiraele. 6 Ka gona Kgoši Jehorama a tšwa Samaria letšatšing leo gomme a kgoboketša Baisiraele ka moka. 7 Kgoši Jehorama a romela le molaetša go Kgoši Jehoshafate wa Juda a re: “Kgoši ya Moaba e ntlhanogetše. Na o tla ya le nna go yo lwa le Bamoaba?” Ge a realo Jehoshafate a re: “Ke tla ya. Nna le wena re selo setee. Setšhaba sa ka le sa sa gago ke selo setee. Dipere tša ka go no swana le ge e le tša gago.” 8 Jehoshafate a re: “Re sepele ka tsela efe?” Jehorama a re: “Ka tsela ya lešoka la Edomo.”
9 Kgoši ya Isiraele, kgoši ya Juda le kgoši ya Edomo ba tloga. Ka morago ga gore ba sepele matšatši a šupago, ba ile ba lemoga gore go be go se na meetse ao mašole a bona a bego a ka a nwa le ao diruiwa tša bona tšeo ba bego ba sepela le tšona di bego di ka a nwa. 10 Kgoši ya Isiraele ya re: “Go tloga go nyamiša gore Jehofa o biditše rena dikgoši tše tharo e le gore a tle a re tlogele gore Bamoaba ba re fenye!” 11 Ge a realo Jehoshafate a re: “Na mo ga go na moporofeta wa Jehofa yoo a ka re thušago go kwa gore Jehofa o reng?” Yo mongwe wa bahlanka ba kgoši ya Isiraele a re: “Go na le Elisha morwa wa Shafata yoo e bego e le mohlanka* wa Eliya.” 12 Ke moka Jehoshafate a re: “O dula a bolela seo Jehofa a se bolelago.” Ke moka kgoši ya Isiraele, Jehoshafate le kgoši ya Edomo ba ya go yena.
13 Elisha a re go kgoši ya Isiraele: “Ke ka baka la eng o etla go nna?* Sepela o ye go botšiša baporofeta ba tatago le baporofeta ba mmago.” Eupša kgoši ya Isiraele ya re go yena: “Aowa, ke tlile go wena ka gobane Jehofa o biditše rena dikgoši tše tharo e le gore a re tlogele gore Bamoaba ba re fenye.” 14 Ge a realo Elisha a re: “Ke ikana ka Jehofa wa madira yo a phelago yo ke mo hlankelago,* ge nkabe ke sa hlomphe Kgoši Jehoshafate wa Juda, wena ke be nka se be le taba le wena. 15 Bjale ntlišetšeng motho wa go letša harepa.” Ge motho yoo a se na go thoma go letša harepa, moya* wa Jehofa wa ba godimo ga Elisha. 16 Elisha a re: “Jehofa o re: ‘Dirang mekero ka mo moeding, 17 ka gobane Jehofa o re: “Go ka se be le moya e bile go ka se be le pula, eupša moedi wo o tla tlala ka meetse gomme le tla nwa meetse ao, lena gotee le diruiwa tša lena le diphoofolo tša lena tše dingwe.”’ 18 Eupša go dira seo ke selo se senyenyane go Jehofa ka gobane o tla le thuša gore le fenye Bamoaba. 19 Le hlasele metse ka moka yeo e šireleditšwego le metse ka moka e mebotse, le reme mehlare e mebotse ka moka, le tswalele didiba tša meetse ka moka le be le lahlele maswika ka mašemong ka moka a mabotse e le gore go se sa bjalwa selo.”
20 Le gona mesong nakong ya ge go neelwa sebego sa mabele, meetse a ile a elelela a etšwa ka thoko ya Edomo, ke moka naga ya tlala meetse.
21 Bamoaba ka moka ba kwa gore dikgoši di tlile go tlo lwa le bona. Ka gona ba kgoboketša banna ka moka bao ba bego ba ka kgona go swara dilo tša go lwa, gomme ba ema mollwaneng. 22 Ge Bamoaba ba tsoga mesong, letšatši le be le phadimela meetseng gomme ka lehlakoreng leo ba bego ba le ka go lona, meetse a be a bonagala e le a mahwibidu okare ke madi. 23 Ba re: “A ke madi! Dikgoši tšela di bolayane ka sabola. Bjale lena Bamoaba, sepelang le yo ba tšeela dilo tša bona!” 24 Ge Bamoaba ba fihla kampeng ya Baisiraele, Baisiraele ba ile ba tsoga ba thoma go hlasela Bamoaba gomme Bamoaba ba tšhaba. Ke moka Baisiraele ba ile ba ba kitimiša ba ba ba tsena Moaba ba tšama ba ba bolaya. 25 Ba ile ba phušola metse ka moka. Ke moka monna yo mongwe le yo mongwe a lahlela leswika ka mašemong ka moka a mabotse. Ba tlatša mašemo ao ka maswika. Ba thiba didiba ka moka tša meetse ba ba ba rema mehlare ka moka e mebotse. Mafelelong go ile gwa šala feela maboto ao a bego a dirilwe ka maswika a Kiri-haresethe gomme batho ba go betša maswika ka diragamabje, ba ile ba rarela motse woo gomme ba o hlasela.
26 Ge kgoši ya Moaba e bona gore e a fenywa, e ile ya tšea mašole a 700 (makgolo a šupago) ao a bego a swere disabola gore ba tšhabe ntweng ba lebile ka thoko yeo go bego go na le kgoši ya Edomo, eupša ba ile ba palelwa. 27 Ka gona kgoši ya Moaba ya tšea morwa wa yona wa mathomo yo a bego a tlo ba kgoši ka morago ga yona gomme ya dira sehlabelo sa go fišwa ka yena godimo ga leboto. Ke moka mašole a ile a galefela Isiraele kudu. Ke ka baka leo mašole a Baisiraele a ilego a tloga moo gomme a boela nageng ya gabo ona.