Puku ya Pele ya Dikoronika

4 Barwa ba Juda e be e le Peretse, Hetserone, Karami, Huru le Shobala. 2 Reaya morwa wa Shobala o ile a ba tatago Jahathe. Jahathe a ba tatago Ahumai le Lahadi. A e be e le malapa a Batsorathe. 3 Barwa ba tatago Etama e be e le: Jeseriele, Ishima le Idibasha, (leina la kgaetšedi ya bona e be e le Haseleleponi), 4 gomme Penuele e be e le tatago Gedora, Esere e be e le tatago Husha. Ba e be e le barwa ba Huru e lego morwa wa mathomo wa Efurata le tatago Betlelehema. 5 Ashuhuru tatago Thekoa o be a na le basadi ba babedi, basadi bao e be e le Hela le Naara. 6 Naara a mmelegela Ahusama, Hefere, Temeni le Haahashetari. Ba e be e le barwa ba Naara. 7 Barwa ba Hela e be e le Tserethe, Itsehara le Ethane. 8 Kotsi o ile a ba tatago Anuba le Sobeba, le gona Kotsi ke rakgolokhukhu wa ditlogolo tša Aharahele morwa wa Haruma.

9 Jabese* o be a hlomphega kudu go feta banababo, le gona mmagwe o ile a mo reela leina a re ke Jabese, ka ge a be a re: “Ke mmelege ga bohloko.” 10 Jabese o ile a rapela Modimo wa Isiraele a re: “Ke kgopela o ntšhegofatše, o oketše naga ya ka gomme o be le nna o be o ntšhireletše gore ke se ke ka welwa ke masetlapelo.” Ka gona Modimo a mo direla seo a bego a se kgopetše.

11 Kelubu ngwanabo Shuha o ile a ba tatago Mehiri yo e bego e le tatago Eshitone. 12 Eshitone o ile a ba tatago Bethe-rafa, Pasea le Tehina yo e lego tatago Iri-nahashe. Ba e be e le badudi ba Reka. 13 Barwa ba Kenase e be e le Othiniele le Seraya gomme morwa wa* Othiniele e be e le Hathathe. 14 Meonothai o ile a ba tatago Ofura. Seraya a ba tatago Joaba yo a ilego a ba tatago Geharashime.* Ba be ba bitšwa bjalo ka gobane ba be ba tseba mošomo wa diatla.

15 Barwa ba Kalebe morwa wa Jefune e be e le Iru, Elaa le Naama. Morwa wa Elaa e be e le Kenase. 16 Barwa ba Jahalelele e be e le Tsifi, Sifa, Tiria le Asariele. 17 Barwa ba Etsera e be e le Jethere, Meredi, Efere le Jaloni. Ke moka yo mongwe wa basadi* ba Meredi a ima gomme a belega Miriamo, Shamai le Ishiba tatago Eshithemoa. 18 Mosadi wa gagwe wa Mojuda o ile a belega Jeredi tatago Gedora, Hebere tatago Soko le Jekuthiele tatago Tsanoa. Ba e be e le barwa ba Bithia morwedi wa Farao yo a bego a nyetšwe ke Meredi.

19 Barwa ba mosadi wa Hodia kgaetšedi ya Nahama, e be e le tatago Keila wa Mogarami le Eshithemoa wa Momaakati. 20 Barwa ba Shimone e be e le Aminone, Rina, Bene-hanana le Tilone. Barwa ba Ishi e be e le Sohethe le Bene-sohethe.

21 Barwa ba Shela morwa wa Juda e be e le Ere tatago Leka le Laada tatago Mareasha. Ditlogolo tša Ashibea tšeo di bego di tumile ka go dira mašela a mabotse le tšona e be e le ditlogolo tša Shela. 22 Banna ba ba latelago le bona e be e le ditlogolo tša Shela: Jokima, badudi ba Kotseba, Joashe le Sarafa yo a ilego a nyala basadi ba Bamoaba le Jashubi-lehema. Tše ke dipego tša mehleng ya kgale. 23 Ba be ba dula Netaima le Gedera e bile ba be ba bopa dilo ka letsopa. Le gona ba be ba dula moo gomme ba šomela kgoši.

24 Barwa ba Simeone e be e le Nemuele, Jamini, Jariba, Tsera le Shaulo. 25 Morwa wa Shaulo e be e le Shalume, morwa wa Shalume e be e le Mibisame gomme morwa wa Mibisame e be e le Mishima. 26 Wo ke moloko wa* Mishima. Morwa wa gagwe e be e le Hamuele, morwa wa Hamuele e be e le Sakuri gomme morwa wa Sakuri e be e le Shimei. 27 Shimei o be a na le barwa ba 16 le barwedi ba tshelelago, eupša banababo ba be ba se na barwa ba bantšhi le gona gare ga malapa a bona ga go na leo le ilego la ba le barwa ba bantšhi go swana le barwa ba Juda. 28 Ba be ba dula Beresheba, Molada, Hatsara-shuali, 29 Biliha, Etseme, Tholadi, 30 Bethuele, Horoma, Tsikilaga, 31 Bethe-marakabothe, Hatsara-susima, Bethe-birei le Shaaraima. Ye e be e le metse ya bona go ba go fihla ge Dafida a thoma go buša.

32 Metse yeo ba bego ba dula go yona e be e le Etama, Aini, Rimone, Thokena le Ashani, e be e le metse e mehlano 33 gotee le metsana ya yona yeo e bego e dikologile metse yeo go fihla ka Baali. A e be e le mafelo ao ba bego ba dula go ona le maina ao a begilwego go ya ka tatelano ya borakgolokhukhu ba bona. 34 Ditlogolo tše dingwe tša Simeone e be e le Meshobaba, Jamaleka, Josha morwa wa Amatsia, 35 Joele, Jehu morwa wa Joshibia, morwa wa Seraya, morwa wa Asiele, 36 le Elioenai, Jaakoba, Jeshohaya, Asaya, Adiele, Jesimiele, Benaya, 37 Tsitsa morwa wa Shifi, morwa wa Alone, morwa wa Jedaya, morwa wa Shimiri, morwa wa Shemaya. 38 Bona ba bao maina a bona a ngwadilwego e be e le baetapele ba meloko ya gabo bona, le gona malapa a borakgolokhukhu ba bona a ile a oketšega. 39 Ba ile ba ya tseleng ya go tsena Gedora, ka thoko ya bohlabela bja moedi, go yo nyakela mehlape ya bona mo e ka fulago gona. 40 Ba ile ba hwetša lefelo leo le bego le nonne e bile le na le mmu o mobotse, le gona naga yeo e be e le e kgolo, e bile e se na le mašata. Batho bao ba bego ba dula moo peleng e be e le ditlogolo tša Hama. 41 Bona ba bao maina a bona a ngwadilwego fase ba ile ba tla mehleng ya Kgoši Hesekia wa Juda gomme ba senya ditente tša Bahama le tša Bameuni tšeo di bego di le moo. Di sa senyegile go fihla le lehono. Ke moka bona ba dula lefelong la bona ka gobane go be go na le lefelo leo mehlape ya bona e ka fulago go lona.

42 Banna ba bangwe ba 500 (makgolo a mahlano) bao ba tšwago molokong wa Simeone ba ile ba ya thabeng ya Seire ba na le Pelatia, Nearia, Refaya le Usiele, e lego barwa ba Ishi yo a bego a ba etile pele. 43 Ba ile ba bolaya Baamaleke bao ba bego ba šetše bao ba bego ba phonyokgile, gomme ba dula moo go ba go fihla le lehono.