Psalme
Koša ya Dafida.
101 Ke tla opela ka lerato la gago le le botegago le ka go loka ga gago.
Wena Jehofa, ke tla go opelela dikoša tša go go reta.
2 Ke tla dira dilo ka bohlale le ka go tshepega.
O tlo tla neng go nna gore o tle o nthuše?
Ge ke le ntlong ya ka ke tla dira dilo tšeo di lokilego.
3 Nka se lebelele selo le ge e le sefe seo se se nago mohola.
Ke hloile dilo tšeo di dirwago ke batho bao ba tlogetšego go dira dilo tša go loka.
Nka se dire dilo tšeo ba di dirago.*
4 Ga ke nyake motho wa pelo ya bofora mo kgauswi le nna.
Ga ke tšee karolo ge go dirwa dilo tše mpe.
5 Motho yo a bolelago dilo tše mpe ka wa gabo ka sephiring,
Ke tla mo tswalela molomo.
Motho yo a ikgogomošago le go ikgantšha,
Nka se mo kgotlelele.
6 Ke tla lebelela bao ba botegago lefaseng,
E le gore ba dule le nna.
Yo a sepelago ka go hloka bosodi, o tla ntlhankela.
7 Motho wa go se tshepege a ka se dule ntlong ya ka.
Gomme motho wa go bolela maaka a ka se eme pele ga ka.
8 Mesong e mengwe le e mengwe ke tla tswalela melomo ya batho ba babe ka moka mo lefaseng,
Gore ke fediše batho ka moka bao ba dirago dilo tše mpe motseng wa Jehofa.