Psalme
Maskile.* Thapelo ya Dafida ge a be a le ka leweng.
142 Ke bitša Jehofa gore a nthuše,
Ke kgopela Jehofa gore a nkwele bohloko.
2 Ke mmotša dilo tšeo di ntshwenyago,
Ke mmotša le dilo tšeo di nkwešago bohloko
3 Ge ke felelwa ke matla.
Wena o hlahla dikgato tša ka.
Manaba a ka a mpeetše molaba
Tseleng yeo ke sepelago go yona.
4 Lebelela ka mahlakoreng a ka
Gomme o bone gore ga go motho yo a nago le taba le nna.
Ga go mo nka tšhabelago gona.
Ga go na motho yo a tshwenyegago ka nna.
5 Ke bitša wena gore o nthuše, hle Jehofa.
Ke re: “O lefelo leo ke tšhabelago go lona.
Ke tshepile wena feela.”
6 Ntheetše ge ke llela gore o nthuše,
Ka gobane ke mathateng a magolo.
Mphološe go batho bao ba ntlaišago
Ka gobane ba mpheta ka matla.
7 Nntšhe lefelong leo le swanago le teronko
Gore ke rete leina la gago.
Anke baloki ba thabe le nna,
Ge ba bona gore o ntshwere ka botho.