Psalme
Tumišang Jehofa lena bao le lego magodimong,
Mo tumišeng lena le lego mafelong a phagamego.
2 Mo tumišeng lena barongwa ba gagwe ka moka.
Mo tumišeng lena madira a gagwe ka moka ao a lego legodimong.
3 Mo tumišeng lena letšatši le ngwedi.
Mo tumišeng lena dinaledi ka moka tše di phadimago.
4 Mo tumišeng lena magodimo ao a lego godimodimo,
Le lena maru ao a lego magodimong.
5 Anke dilo tše di tumiše leina la Jehofa,
Ka gobane o ile a ntšha taelo gomme tšona tša bopega.
6 O dira gore di dule di le gona go ya go ile.
O ntšhitše taelo yeo e tla dulago e le gona go ya go ile.
7 Tumišang Jehofa lena le lego lefaseng,
Lena diphedi tše dikgolo tša ka lewatleng le lewatle ka moka.
8 Wena legadima le sefako, kapoko le maru a maso,
Wena phefo e matla yeo e phethago lentšu la gagwe, mo tumišeng.
9 Lena dithaba le lena meboto ka moka,
Lena mehlare ya dienywa le lena mehlare ya metsedara ka moka, mo tumišeng.
10 Lena diphoofolo tša naga le lena diruiwa ka moka,
Lena digagabi gotee le dinonyana, mo tumišeng.
11 Lena dikgoši tša lefase le lena ditšhaba ka moka,
Lena baetapele le lena baahlodi ka moka ba lefase, mo tumišeng.
12 Lena masogana le lena dikgarebe,
Lena bakgalabje gotee le lena baswa, mo tumišeng.
13 Tumišang leina la Jehofa,
Gobane leina la gagwe ke lona le nnoši le phagamego kudu.
Seriti sa gagwe ke se segolo go feta legodimo le lefase.
14 O tla dira gore batho ba gagwe ba be le matla a magolo,
E le gore batho bao ba mmotegelago ba retwe,
Bona bana ba Isiraele, e lego batho bao ba lego kgauswi le yena.
Tumišang Jah!*