Psalme
Koša ya Dafida ya go bula ntlo.
30 Ke tla go tumiša wena Jehofa, gobane o nkukile.
Ga se wa dumelela manaba a ka a thaba ge ke tlaišega.
2 Wena Jehofa Modimo wa ka, ke ile ka llela gore o nthuše gomme wena wa ntira gore ke boele ke be le matla.
3 Wena Jehofa, o nntšhitše Lebitleng.*
O dirile gore ke dule ke phela, wa dira gore ke se theogele moleteng.*
4 Lena bao le botegelago Jehofa, mo opeleleng koša ya go mo reta.
Lebogang leina* la gagwe le lekgethwa,
5 Ka gobane go galefelwa ke yena ke ga nakwana,
Eupša go amogelwa ke yena ke ga bophelo ka moka.
Go ka ba le sello mantšiboa, eupša mesong go ba le lethabo le legolo.
6 Ge ke be ke se na mathata, ke ile ka re:
“Dilo ka moka di tla sepela gabotse.”*
7 Wena Jehofa, ge o be o sa nkamogela, o ile wa dira gore ke tie go swana le thaba,
Eupša ge o be o se sa nkamogela, ke ile ka tšhoga.
8 Ke ile ka dula ke go bitša, wena Jehofa.
Ke ile ka dula ke go kgopela gore o nkamogele wena Jehofa.
9 O tla boelwa ke’ng ge ke hlokofala gomme ke theogela moleteng?
Na lerole le tla go reta? Na le tla bolela ka go tshepega ga gago?
10 Jehofa, hle ntheetše gomme o nkwele bohloko.
Wena Jehofa, nthuše.
11 O ntirile gore ke bine ke thabile go e na le gore ke lle.
O ntlhobotše lesaka leo ke bego ke le apere gomme wa ntira gore ke thabe tše ekego o nkapešitše diaparo tša monyanya,
12 E le gore ke go opelele koša ya go go tumiša gomme ke se homole.
Wena Jehofa Modimo wa ka, ke tla go reta go ya go ile.