Psalme
Ditaelo tšeo di yago go mohlahli. Koša ya Dafida.
64 Wena Modimo, ke kgopela o nkwe ka gobane ke tshwenyegile.
Ntšhireletše ge lenaba la ka le ntlhasela.
2 Ntšhireletše go batho ba babe bao ba ntogelago maanomabe,
O ntšhireletše le go batho ba babe bao ba ntikologilego,
3 Mantšu a bona a hlaba bjalo ka tšhoša,
Mantšu a bona a mabe a hlaba bjalo ka mesebe,
4 E le gore ba thuntšhe motho yo a se nago molato ba ikutile.
Ba mo thuntšha kapelapela ba sa tšhabe selo.
5 Ba itlwaeditše go bolela dilo tše mpe.
Ba loga maano a go rea melaba.
Ba re: “E ka se bonwe ke motho.”
6 Ba tsoma ditsela tše diswa tša go dira dilo tše mpe.
Ba loga maanomabe ka sephiring,
Le gona dilo tšeo ba di naganago ka dipelong tša bona ga di kwešišege.
7 Eupša Modimo o tla ba thuntšha ka mosebe.
Ba tlo gobala kapelapela.
8 Maleme a bona a tla dira gore ba fedišwe.
Batho ka moka bao ba ba lebeletšego ba tla šikinya dihlogo.
9 Ke moka batho ka moka ba tla tšhoga.
Ba tla tsebiša ba bangwe seo Modimo a se dirilego,
Gomme ba tla kwešiša dilo tšeo Modimo a di dirilego.
10 Moloki o tla thabišwa ke Jehofa gomme a tšhabela go yena.
Ke moka batho ka moka ba go loka ba tla ikgantšha ka Modimo.