Jesaya

5 E re ke opelele motho yo ke mo ratago koša.

Koša yeo e mabapi le yena le tšhemo ya gagwe ya diterebe.

Gomme a bjala diterebe tše dibotse tše dikhwibidu,

A ba a aga moago o motelele gare ga yona gore a bone seo se diregago.

Le gona o ile a dira lefelwana leo go lona go ka gatelwago diterebe.

O be a holofetše gore tšhemo yeo e tla enywa diterebe tše dibotse,

Eupša e ile ya enywa diterebe tša naga feela.

 3  “Bjale lena badudi ba Jerusalema le batho ba Juda,

Hle ahlolang magareng ga ka le tšhemo ya ka ya diterebe.

 4  Kgane go na le se sengwe seo nka se direlago tšhemo ya ka,

Seo ke sego ka tšwa ke se dira?

Ke ka baka la’ng go metše diterebe tša naga feela

Mola ke be ke nagana gore go tla mela diterebe tše dibotse?

 5  E re ke le botšeng gore ke tlo dira eng

Ka tšhemo ya ka ya diterebe.

Ke tla hlahlamolla legora la yona,

Gomme le tla tšhungwa.

Ke tla phušola leboto la yona leo le agilwego ka maswika,

Gomme e tla gatakelwa.

 6  Ke tla e senya.

E ka se hlagolwe e bile makala a mehlare ya yona a ka se ke a ripiwa.

E tla mela meetlwa le ngwang,*

E bile ke tla laela maru gore a se ke a neša pula mo go yona.

 7  Tšhemo ya diterebe ya Jehofa wa madira ke setšhaba sa Baisiraele,

Ge e le batho ba Juda ke tšhemo yeo a bego a e rata.

O be a dutše a holofetše gore ba tla ahlola ka toka,

Eupša bona ba roba molao.

Le gona o be a holofetše gore ba tla dira dilo tša go loka,

Eupša o be a ekwa dillo tša bao ba bego ba swarwa gampe.”

 8  Go madimabe lena batho bao ba itšeelago dintlo tše dintšhi,

Le lena bao ba ikokeletšago mašemo,

Go fihlela go se na selo seo batho ba bangwe ba ka se hwetšago,

E bile le dula le nnoši nageng.

 9  Ke kwele Jehofa wa madira a ena a re

Le ge dintlo tše dintšhi e le tše dikgolo e bile e le tše dibotse,

Di tlo fetoga marope,

E bile gwa se dule motho go tšona.

10  Ka gobane tšhemo e kgolo ya diterebe e tla ntšha dilithara tše 22 feela tša beine,

Gomme peu ya korong yeo e imelago dikhilograma tše e ka bago tše 160* e tla tšweletša korong yeo e imelago dikhilograma tše e ka bago tše 16* feela.

11  Go madimabe bao ba tsogelago bjaleng,

Bao ba dulelago go nwa gore ba tagwe go fihlela e eba bošego.

12  Menyanyeng ya bona go letšwa diharepa,

Diletšo tša metato, meropa le dinaka gomme ba nwa beine.

Eupša ga ba nagane ka modiro wa Jehofa,

E bile ga ba bone dilo tšeo a di dirilego ka diatla tša gagwe.

13  Ka baka leo setšhaba sa ka se tla ya bothopša

Ka ge se sa ntsebe.

Batho bao ba hlomphegago mo setšhabeng ba tla bolawa ke tlala,

Gomme batho ba bangwe ka moka ba bolawa ke lenyora.

14  Ka gona Lebitla* le ikokeditše

E bile le ahlame go feta tekano.

Batho bao ba hlomphegago mo motseng,

Bao ba dirago mašata le bao ba ratago go ya menateng ba tla theogela go lona.

15  Motho o tla inamela fase

Gomme a kokobetšwa.

Bao ba ikgogomošago ba tla inamiša difahlego ba lewa ke dihlong.

16  Jehofa wa madira o tla retwa ka baka la kahlolo yeo a e dirago.

Modimo wa nnete, yena Modimo yo Mokgethwa o tla bontšha gore ke yo mokgethwa ka baka la ge a lokile.

17  Dikwana di tla fula go swana le ge di fula mafulong a tšona.

Batho bao e sego Baisiraele ba tla ja dilo tšeo di tšwago moo diphoofolo tše di nonnego di kilego tša fula gona.

18  Go madimabe bao ba bolelago maaka, ba bofeletšwe phošong ya bona le sebeng sa bona.

Ba swana le phoofolo yeo e bofeletšwego kariking yeo e e gogago ya e iša kae le kae mo e yago gona.

19  Bao ba rego: “Anke a dire mošomo wa gagwe ka pela.

Anke o tle kapejana gore re o bone.

Anke Modimo yo Mokgethwa wa Isiraele

A dire seo a nyakago go se dira gore re kgone go se tseba.”

20  Go madimabe bao ba rego selo se sebotse ke se sebe gomme ba re se sebe ke se sebotse,

Bao ba rego leswiswi ke seetša gomme ba re seetša ke leswiswi.

Le bao ba rego selo se se galakago se bose gomme se se bose ba re se a galaka.

21  Go madimabe bao ba iponago ba hlalefile

E bile ba nagana gore ba na le temogo!

22  Go madimabe bao ba tumilego ka go nwa beine

Le bao e lego ditsebi tša go hlakanya bjala.

23  Bao ba rego motho yo mobe ga a na molato ka ge a ba file pipamolomo,

Gomme motho yo a lokilego ba mmona molato.

24  Ka gona, go no swana le ge mollo o fiša mahlaka

Gomme bjang bjo bo omilego bja swa bja felela kgabong ya mollo,

Le medu ya bona e tla bola.

Mapolomo a bona a tla omelela gomme a tšewa ke phefo go swana le lerole,

Ka gobane ba ganne molao wa Jehofa wa madira

E bile ba nyatša Lentšu la Modimo yo Mokgethwa wa Isiraele.

25  Ke ka lebaka leo Jehofa a galefetšego batho ba gagwe,

O tla otlolla seatla sa gagwe gomme a ba otla.

Dithaba di tla šikinyega

Gomme ditopo tša bona di tla swana le ditšhila diterateng.

Ka baka la dilo tše ka moka, o sa galefile

E bile o sa dutše a otlolotše seatla sa gagwe gore a ba otle.

26  O emišeditše setšhaba sa kgole folaga,

A se leletša molodi, a se bitša gore se tle se etšwa mafelelong a lefase.

Bonang setšhaba seo se tla ka lebelo.

Mapanta a lego mathekeng a bona ga a bofologe,

E bile marala* ao a lego dieteng tša bona ga a kgaoge.

28  Mesebe ya bona ka moka e louditšwe,

Gomme bora bjo bongwe le bjo bongwe bja bona bo ngangegile.

Ditlhako tša dipere tša bona ke tše thata go swana le leswika,

Gomme maotwana a dikariki tša bona a kitima go swana le ledimo le matla.

29  Ba bopa go swana le tau yeo e rorago,

E bile ba bopa go swana le ditawana.

Ba tla bopa ba swara selo seo ba nyakago go se bolaya,

Gomme ba sepela le sona gwa se be le yo a se hlakodišago.

30  Letšatšing leo ka morago ga gore ba se sware,

Ba tla hlaba lešata go swana le lewatle ge le duma.

Motho le ge e le ofe yo a ka lebelelago nageng o tla bona leswiswi leo le tšhošago,

E bile seetša sona se tla swiswatšwa ke maru.