Sakaria
3 Ke moka a mpontšha Joshua moperisita yo a phagamego a eme pele ga morongwa wa Jehofa, gomme Sathane a eme ka letsogong la gagwe la le letona gore a mo ganetše. 2 Morongwa wa Jehofa a re go Sathane: “Anke Jehofa a go kgalemele, wena Sathane. Anke Jehofa, yena yo a kgethilego Jerusalema a go kgalemele! Na monna yo ga se legong leo le ntšhitšwego mollong?”
3 Bjale Joshua yena o be a apere diaparo tša ditšhila, gomme a eme pele ga morongwa. 4 Ke moka morongwa a re go bao ba bego ba eme pele ga gagwe: “Mo apoleng diaparo tšeo tša gagwe tša ditšhila.” Le gona a re go Joshua: “Bona, ke tlošitše molato wa gago, e bile o tla apešwa diaparo tše dibotse.”
5 Bjale nna ka re: “A ba mo rweše tuku e hlwekilego hlogong.” Bona ba mo rweša tuku e hlwekilego ba ba ba mo apeša le diaparo tše dingwe. Morongwa wa Jehofa o be a eme mo kgauswi. 6 Ka morago ga moo, morongwa wa Jehofa a re go Joshua: 7 “Jehofa wa madira o re: ‘Ge o ka sepela ditseleng tša ka wa ba wa dira mešomo yeo ke go laetšego gore o e dire, gona ke wena o tlago go ahlola batho ba ka, wa ba wa hlokomela ntlo ya ka.* E bile ke tla go dumelela gore o eme pele ga ka o lokologile, go no swana le bao ba emego mo.’
8 “‘Theetša hle, wena Joshua moperisita yo a phagamego, wena le baperisita bao ba dutšego pele ga gago, ka gobane banna ba, ba bjalo ka leswao leo le bontšhago seo se tlago go direga nakong e tlago. Bjale ke tliša mohlanka wa ka yo a bitšwago Lehlogedi! 9 Bonang leswika leo ke le beilego pele ga Joshua! Leswikeng leo, go na le mahlo a šupago. Ke tla le ngwala ka go le kgwara, gomme ke tla tloša molato wa naga yeo ka letšatši letee.’ Se ke seo Jehofa wa madira a se boletšego.
10 Jehofa wa madira o re: “Letšatšing leo, yo mongwe le yo mongwe wa lena o tlo bitša moagišane wa gagwe gore a tle a dule ka tlase ga mohlare wa gagwe wa diterebe le wa mogo.”