Doiteronomio
33 Ye ke tšhegofatšo yeo Moshe monna wa Modimo wa nnete a ilego a e botša Baisiraele pele a ka hwa. 2 O ile a re:
“Jehofa o tlile a etšwa Sinai,
Gomme a phadimela Baisiraele a le Seire.
A ba a ba phadimela ka letago la gagwe a le dithabeng tša Parane,
A na le barongwa ba bakgethwa ba diketekete,
Ka letsogong la gagwe le letona go na le mašole a gagwe.
3 O be a rata batho ba gagwe,
Batho bao ba bakgethwa ka moka, ba be ba le ka letsogong la gago wena Modimo.
Bona ba be ba dutše maotong a gago,
Ba thoma go theetša mantšu a gago.
5 Modimo o ile a ba kgoši kua Jeshuruni,
Ge baetapele ba setšhaba ba be ba kgobokane,
Gotee le meloko ka moka ya Isiraele.
6 O ile a bolela ka Rubeni a re: Anke Rubeni a phele gomme a se ke a hwa,
Le gona, anke banna ba moloko wa gagwe e be ba bantšhi.”
7 O ile a bolela ka Juda a re:
“Hle Jehofa ekwa lentšu la Juda,
Anke o mmušetše setšhabeng sa gabo.
O dirišitše matla a gagwe go lwela seo e lego sa gagwe,
Anke o mo thuše gore a lwe le manaba a gagwe.”
8 O ile a bolela ka Lefi a re:
“Thumime ya gago le Urime* ya gago ke tša motho yo a go botegelago,
Yoo o mo lekilego kua Masa.
O lwele le yena kua meetseng a Meriba,
9 Banna ba moloko wa Lefi bao ba boditšego botatago bona le bommago bona ba re: ‘Ga re na taba le lena.’
E bile ga se ba ka ba ba le taba le banababo bona,
Ba ba ba se be le taba le bana ba bona.
Ka gobane ba ile ba kwa lentšu la gago,
E bile ba botegela kgwerano ya gago.
10 Anke ba rute Jakobo ditaelo tša gago
Gomme Isiraele ba mo rute molao wa gago.
Anke ba go neele diorelo tšeo di nkgago bose,
Gomme aletareng ya gago ba neele sebego se se feletšego.
11 Hle Jehofa, mo šegofatše ka go mo nea matla,
Gomme o kgahlwe ke mošomo wo a o dirago.
Roba maoto a manaba a gagwe,
E le gore a se sa kgona go emelela.”
12 O ile a bolela ka Benjamini a re:
“Anke motho yo yo Jehofa a mo ratago, a dule a šireletšegile kgauswi le yena,
A mo šireletše letšatši ka moka,
Gomme a dule a le magetleng a gagwe.”
13 O ile a bolela ka Josefa a re:
“Anke Jehofa a šegofatše naga ya gagwe
Ka dilo tše botsebotse tša legodimong,
Ka phoka, le ka meetse ao a tšwago ka tlasetlase.
14 Ka dilo tše botsebotse tšeo di tšweletšwago ke letšatši,
Le ka tše botsebotse tšeo di tšweletšwago kgwedi e nngwe le e nngwe.
15 Ka tše botsebotse tša dithabeng tša kgale,
Le ka tše botsebotse tša mebotong yeo e tlago go dula e le gona go ya go ile.
16 Ka dilo tše botsebotse tšeo di tšweletšwago ke lefase le tšeo di tletšego go lona,
Le ka go šegofatšwa ke yo a kilego a iponagatša mohlareng wa meetlwa.
Anke ditšhegofatšo tše di dule hlogong ya Josefa,
Di dule hlogong ya yena yoo a ilego a kgethwa gare ga banababo.
17 Bogolo bja gagwe bo swana le bja poo ya leitšibulo,
Gomme manaka a gagwe ke manaka a poo ya naga.*
O tla kgorometša batho ba ditšhaba ka manaka a gagwe
Go ba go fihla mafelelong a lefase.
Manaka a ke banna ba dikete tše masome ba mašole a moloko wa Efuraime,
Le gona ke banna ba diketekete ba mašole a moloko wa Manase.”
18 O ile a bolela ka Sebulone a re:
“Sebulone a thabe ge a etšwa a yo dira kgwebo,
Gomme Isakara a thabe ditenteng tša gagwe.
19 Ba tla biletša ditšhaba thabeng.
Gona moo, ba tla dira dihlabelo tšeo Modimo a di amogelago.
Ka gobane ba tla ja mahumo a mantšhi a mawatleng
Le dilo tše bohlokwa tšeo di utilwego santeng.”
20 O ile a bolela ka Gada a re:
“A go šegofatšwe yo a oketšago moo naga ya Gada e felelago gona.
O dula moo go swana le ge tau e laletše phoofolo,
O nyaka go kgaola letsogo, le yona hlogo.
21 O tla ikgethela karolo e kaonekaone ya naga,
O tla tšea karolo yeo e bego e beetšwe ka thoko ke yoo a neago molao.
Baetapele ba setšhaba ba tla kgobokana gotee.
O tla phetha melao ya go loka ya Jehofa
Le ditaelo tša gagwe a na le Baisiraele ka moka.”
22 O ile a bolela ka Dani a re:
“Dani ke tawana.
O tla hlasela a etšwa Bashani.”
23 O ile a bolela ka Nafutali a re:
“Nafutali o kgotsofaditšwe ke go amogelwa ke Jehofa
E bile o mo šegofaditše kudu.
Anke a tšee naga ya ka bodikela le ya ka borwa e be tša gagwe.”
24 O ile a bolela ka Ashere a re:
“Modimo o šegofaditše Ashere ka bana ba bantšhi.
Anke a amogelwe ke banababo,
Le gona anke a ine leoto la gagwe ka gare ga makhura.
25 Tšhipi le koporo ke dinotlelo tša keiti ya gagwe,
E bile o tla sepela ka go iketla bophelo bja gagwe ka moka.
26 Ga go na yo a swanago le Modimo wa nnete wa Jeshuruni,
Yo a go thušago a le legodimong
Le yo a fetago marung ka bogolo bja gagwe.
27 Ke go tloga kgale Modimo a go šireletša,
Matsogo a gagwe ao a dulago a le gona a tla go swara.
Yena o tla raka manaba nageng yeo le yago go yona,
Gomme o tla re: ‘A fedišeng!’
28 Isiraele o tla dula a šireletšegile,
Gomme ditlogolwana tša Jakobo di tla dula di nnoši
Nageng ya mabele le ya beine e mpsha,
Yeo magodimo a yona a tlago go rothiša phoka.
29 Wena Isiraele, o thabile!
Ke mang yo a swanago le wena,
Wena setšhaba seo se phološwago ke Jehofa,
Yena kotse yeo e go thušago,
E lego yena tšhoša ya gago e kgolo?
Manaba a gago a tla boifa a le pele ga gago,
Gomme wena o tla gatakela mafelo a ona a godimo.”