Puku ya Pele ya Samuele
18 Gateetee ge Dafida a feditše go bolela le Saulo, Jonathane le Dafida ya ba bagwera ba bagolo gomme Jonathane a thoma go rata Dafida bjalo ka ge a ithata. 2 Go tloga letšatšing leo, Saulo a tšea Dafida gore a dule le yena gomme a se mo dumelele gore a boele ntlong ya tatagwe. 3 Jonathane le Dafida ba dira kgwerano, ka gobane Jonathane o be a mo rata go etša ge a ithata. 4 Jonathane a apola seaparo sa gagwe sa go hloka matsogo seo a bego a se apere a se fa Dafida, a mo fa le seaparo sa gagwe sa ntwa, sabola ya gagwe, bora bja gagwe gotee le lepanta la gagwe. 5 Dafida a thoma go ya dintweng tšeo Saulo a bego a mo roma go tšona gomme o be a atlega. Ka gona, Saulo a mmea gore e be molaodi wa mašole gomme batho ka moka gotee le bahlanka ba Saulo, ba ile ba thabišwa ke seo.
6 Ge Dafida le mašole a mangwe ba boa go bolaya Bafilisita, basadi ba ile ba tšwa metseng ka moka ya Isiraele go tlo gahlanetša Kgoši Saulo, ba opela e bile ba bina ba swere meropa le diletšo tša metato e meraro. Ba be ba thabile. 7 Basadi bao ba bego ba thabile ba be ba opela ba re:
“Saulo o bolaile ba dikete,
Dafida yena o bolaile ba dikete tše masome.”
8 Saulo a galefa kudu gomme koša yeo ya mo tena, ka gobane o be a re: “Ba re Dafida o bolaile ba dikete tše masome eupša nna ba re ke bolaile ba dikete. Go šetše feela gore ba mo dire kgoši!” 9 Go tloga letšatšing leo, Saulo ga sa nka a hlwa a sa tshepa Dafida.
10 Letšatšing le le latelago, moya o mobe wo Modimo a o dumeletšego o ile wa tlela Saulo gomme yena a thoma go dira dilo tše di gakantšhago* a le ka ntlong, nakong ya ge Dafida a be a letša mmino ka harepa go swana le mehleng. Saulo o be a swere lerumo ka seatleng sa gagwe, 11 gomme a le foša ka ge a be a re: “Ke tla hlaba Dafida ka mo pataganya le leboto!” Eupša Dafida a le phema gabedi. 12 Saulo o be a boifa Dafida ka gobane Jehofa o be a thekga Dafida, eupša a tlogetše Saulo. 13 Ka gona, Saulo a romela Dafida kgole a ba a mo kgetha gore e be molaodi wa mašole a 1 000 (sekete). Dafida o be a eta mašole pele ge a eya ntweng. 14 Dafida o be a dula a atlega dintweng ka moka tše a bego a di lwa e bile Jehofa o be a na le yena. 15 Ge Saulo a bona gore Dafida o be a atlega kudu, o ile a thoma go mmoifa. 16 Eupša Baisiraele ka moka le Bajuda ba be ba rata Dafida, ka gobane o be a ba eta pele ge ba eya ntweng.
17 Ka morago Saulo a re go Dafida: “Morwedi wa ka yo mogolo Merabe šo. Ke tla go fa yena gore e be mosadi wa gago. Eupša wena o swanetše go tšwela pele o mpontšha gore o na le sebete gomme o lwe dintwa tša Jehofa.” Eupša Saulo o be a ipotša a re: “Nka se bolaye Dafida ka diatla tša ka, go e na le moo anke Bafilisita e be bona ba mmolayago.” 18 Dafida a re go Saulo: “Nna ke’ng, gona ba gešo bona ke’ng? Lapa la tate ga se selo mo Isiraele moo nka swanelwago ke go ba mokgonyana wa kgoši.” 19 Eupša ge nako ya gore Merabe morwedi wa Saulo a fiwe Dafida e fihla, Saulo o be a šetše a mo file Adiriele wa Mehola* gore e be mosadi wa gagwe.
20 Mikala morwedi wa Saulo o be a rata Dafida. Batho ba bangwe ba ile ba botša Saulo ka taba yeo gomme ya mo kgahla. 21 Ka gona, Saulo a re: “Ke tla tšea Mikala ka mo fa Dafida gore e be molaba go yena, e le gore Bafilisita ba mmolaye.” Ke moka Saulo a botša Dafida ka lekga la bobedi a re: “O tla ba mokgonyana wa ka lehono.” 22 Ke moka Saulo a laela bahlanka ba gagwe a re: “Botšang Dafida ka sephiring le re: ‘Tseba gore o kgahla kgoši e bile bahlanka ba yona ka moka ba a go rata. Bjale eba mokgonyana wa kgoši.’” 23 Ge bahlanka ba Saulo ba botša Dafida ditaba tšeo, Dafida a re: “Na le bona okare go ba mokgonyana wa kgoši go bonolo, mola ke le modiidi e bile ke nyatšega?” 24 Ke moka bahlanka ba Saulo ba mo anegela seo Dafida a se boletšego.
25 Saulo a re: “Botšang Dafida le re: ‘Kgoši ga e nyake tšhelete ya magadi, eupša e nyaka matlalwana a 100 a ditho tša botona tša Bafilisita gore e itefeletše go manaba a yona.’” Saulo yena o be a logile maano a gore Dafida a bolawe ke Bafilisita. 26 Bahlanka ba Saulo ba anegela Dafida seo Saulo a se boletšego gomme Dafida a kgahlwa ke taba ya gore e tlo ba mokgonyana wa kgoši. Pele nako yeo e fihla, 27 Dafida le mašole a gagwe, ba ile ba bolaya banna ba 200 (makgolo a mabedi) ba Bafilisita gomme Dafida a tliša matlalwana ale a a nea kgoši ka moka ga ona gore e be mokgonyana wa kgoši. Ka morago Saulo a tšea Mikala morwedi wa gagwe gomme a mo nea Dafida gore e be mosadi wa gagwe. 28 Saulo a lemoga gore Jehofa o be a ema le Dafida le gore morwedi wa gagwe Mikala o be a rata Dafida. 29 Taba yeo ya dira gore Saulo a boife Dafida le go feta gomme Dafida a ba lenaba la Saulo bophelo bja gagwe ka moka.
30 Baetapele ba Bafilisita ba be ba fela ba eya go lwa le Baisiraele, eupša nakong ka moka ya ge ba elwa, Dafida o be a atlega kudu go feta bahlanka ka moka ba Saulo. Ka gona, leina la gagwe la tuma kudu.