Puku ya Bobedi ya Samuele
8 Ka morago ga nako, Dafida o ile a lwa le Bafilisita gomme a ba fenya, ke moka a ba tšeela Methegeama.
2 A fenya Bamoaba, a ba robatša fase gomme a ba arola ka dihlopha tše tharo.* Tše pedi di be di swanetše go bolawa gomme se setee se se bolawe. Ke moka Bamoaba ya ba bahlanka ba Dafida gomme ba mo tlišetša dimpho.
3 Dafida a fenya Hadadesere morwa wa Rehobo kgoši ya Tsoba, ge a be a eya go tsošološa mmušo wa gagwe Nokeng ya Eforate. 4 Dafida o ile a thopa banamedi ba dipere ba 1 700 le mašole a 20 000 ao a sepelago ka maoto. Ke moka a kgaola mešifa ya maotong ya dipere tše dingwe ka moka tšeo di gogago dikariki tša ntwa, eupša a šadiša dipere tše 100 feela.
5 Ge Basiria ba Damaseko ba etla go thuša Hadadesere kgoši ya Tsoba, Dafida o ile a bolaya banna ba Basiria ba 22 000 6 Ke moka Dafida a bea mašole kua Siria ya Damaseko. Basiria ya ba bahlanka ba Dafida gomme ba mo tlišetša dimpho. Jehofa o be a dula a thuša Dafida go fenya kae le kae moo a bego a eya gona. 7 Le gona, Dafida a tšea dikotse tša gauta tša dinkgokolo tšeo di bego di swerwe ke bahlanka ba Hadadesere gomme a di tliša Jerusalema. 8 Kgoši Dafida o ile a tšea koporo e ntšhi kudu metseng ya Hadadesere e lego Beta le Berotha.
9 Kgoši Toi wa Hamathi a kwa gore Dafida o bolaile mašole ka moka a Hadadesere kgoši ya Tsoba. 10 Ke moka Toi a roma Jorame morwa wa gagwe go Kgoši Dafida gore a yo mmotšiša gore bophelo bo ya bjang le go mo lebogiša ka gobane o lwele le Hadadesere a ba a mo fenya, (ka gore Hadadesere o be a kile a lwa gantšhi le Toi). Le gona o ile a mo tlišetša dilo tše dintšhi tša silifera, tša gauta le tša koporo. 11 Kgoši Dafida o ile a tšea dilo tšeo gomme a di nea* Jehofa, gotee le silifera le gauta tšeo a di tšerego ditšhabeng ka moka tšeo a bego a di fentše, 12 dilo tšeo di tšwago Siria le Moaba, go Baamoni, go Bafilisita, go Baamaleke le dilo tšeo a di hweditšego ka morago ga go lwa le Hadadesere morwa wa Rehobo kgoši ya Tsoba. 13 Dafida a itirela leina ge a boa go bolaya Baedomo ba 18 000 Moeding wa Letswai. 14 O ile a bea mašole kua Edomo. O ile a bea mašole nageng ya Edomo ka moka gomme Baedomo ka moka ya ba bahlanka ba gagwe. Jehofa a dula a thuša Dafida go fenya kae le kae moo a bego a eya gona.
15 Dafida a buša Isiraele ka moka, gomme a kgonthišetša gore setšhaba sa gagwe ka moka se swarwa ka toka le ka go loka. 16 Joaba morwa wa Tseruya e be e le molaodi wa mašole, gomme Jehoshafate morwa wa Ahiludi o be a ngwala dilo tšeo di diregago. 17 Tsadoko morwa wa Ahitubo le Ahimeleke morwa wa Abiathara e be e le baperisita, gomme Seraya e le mongwaledi. 18 Benaya morwa wa Jehoyada e be e le molaodi wa Bakereta le Bapelethe. Barwa ba Dafida bona ba ile ba ba le maemo a godimo.*