Puku ya Bobedi ya Samuele
9 Ka morago, Dafida a re: “Na go na le motho yo a šetšego go ba ntlo ya Saulo yo nka mmontšhago botho* ka baka la Jonathane?” 2 Ntlong ya Saulo go be go na le mohlanka yo leina la gagwe e bego e le Tsiba. Ba mmitša gore a ye go Dafida, ke moka Dafida a re go yena: “Na ke wena Tsiba?” Yena a re: “Ee ke nna mong wa ka.” 3 Kgoši ya re: “Na go na le motho yo a šetšego go ba ntlo ya Saulo yo nka mmontšhago lerato le le botegago la Modimo?” Tsiba a re: “Go sa na le morwa wa Jonathane yo a golofetšego maoto.” 4 Kgoši ya mmotšiša ya re: “O kae?” Tsiba a re: “O ntlong ya Makiri morwa wa Amiele kua Lodibara.”
5 Gateetee Kgoši Dafida a roma batho ba yo mo tšea ntlong ya Makiri morwa wa Amiele kua Lodibara. 6 Ge Mefiboshethe morwa wa Jonathane morwa wa Saulo a fihla go Dafida, gateetee a khunama gomme sefahlego sa gagwe se kgwathile fase go bontšha gore o a mo hlompha. Ke moka Dafida a re: “Mefiboshethe!” Yena a re: “Ke nna yo, nna mohlanka wa gago.” 7 Dafida a re go yena: “O se ke wa tšhoga ka gobane ke tla go bontšha botho ka baka la Jonathane tatago. Ke tla go nea tšhemo ka moka ya Saulo rakgolo wa gago gomme wena o tla dula o eja tafoleng ya ka.”
8 Ge Mefiboshethe a ekwa seo, a khunama gomme a re: “Nna mohlanka wa gago ke eng ge o bile o ntlhokomela mola ke le bjalo ka mpša e hwilego?” 9 Kgoši ya bitša mohlanka wa Saulo e lego Tsiba, ya re go yena: “Dilo ka moka tšeo e bego e le tša Saulo le ba lapa la gagwe ke di nea setlogolo sa mong wa gago. 10 Wena le barwa ba gago le bahlanka ba gago le mo lemele tšhemo, le bune dijo tšeo ke moka le di fe ba lapa la setlogolo sa mong wa gago gore ba di je. Eupša Mefiboshethe e lego setlogolo sa mong wa gago, o tla dula a eja tafoleng ya ka.”
Tsiba o be a na le barwa ba 15 le bahlanka ba 20. 11 Ke moka Tsiba a re go kgoši: “Nna mohlanka wa gago ke tla dira dilo ka moka tšeo wena kgoši mong wa ka o ntaetšego gore ke di dire.” Ka gona Mefiboshethe a ja tafoleng ya Dafida bjalo ka yo mongwe wa barwa ba kgoši. 12 Mefiboshethe o be a na le morwa yo monyenyane yoo leina la gagwe e bego e le Mikha. Ka gona batho ka moka bao ba bego ba dula ntlong ya Tsiba e ile ya ba bahlanka ba Mefiboshethe. 13 Mefiboshethe o be a dula Jerusalema ka gobane ka mehla o be a jela tafoleng ya kgoši, le gona o be a golofetše maoto.