Genesi

17 Ge Aborama a na le mengwaga e 99, Jehofa a iponagatša go yena a re: “Ke nna Modimo Ramatlaohle. Sepela ditseleng tša ka gomme go se ke gwa ba le selo seo se solegago ka wena. 2 Ke tla dira kgwerano ya ka le wena, gore o be le bana ba bantši kudukudu.”

3 Ge Aborama a ekwa mantšu ao, a khunama a inamiša sefahlego gomme Modimo a tšwela pele a re go yena: 4 “Tseba gore ke dirile kgwerano le wena gomme o tla ba tatago ditšhaba tše dintši. 5 Leina la gago e ka se sa ba Aborama, eupša e tla ba Aborahama, ka gobane ke tla dira gore o be tatago ditšhaba tše dintši. 6 Ke tla dira gore o be le bana ba bantši kudukudu, ka ba ka dira gore ditšhaba tše dintši di tšwe go wena, gomme ba bangwe ba bana ba gago e tla ba dikgoši.

7 “Ke tla phetha kgwerano yeo ke e dirilego le wena le bana ba gago melokong ya bona ka moka. Kgwerano yeo e tla ba ya go ya go ile, e le gore ke bontšhe gore ke nna Modimo wa gago le Modimo wa bana ba gago. 8 Naga yeo o dulago go yona yeo e sego ya geno, e lego naga ka moka ya Kanana, ke tla e nea wena le bana ba gago gore e be ya lena go ya go ile gomme nna ke tla ba Modimo wa bona.”

9 Modimo a tšwela pele a re go Aborahama: “Wena o boloke kgwerano ya ka, le bana ba gago ba e boloke melokong ya bona ka moka. 10 Kgwerano yeo ke e dirilego le lena le bana ba lena yeo le swanetšego go e boloka ke ye: Yo mongwe le yo mongwe wa lena yo motona a bolle. 11 Le bolotšwe, gomme seo e be leswao la kgwerano yeo ke e dirilego le lena. 12 Melokong ya lena ka moka le bolotše mošemane yo mongwe le yo mongwe ge a na le matšatši a seswai. Le bolotše le ge e le mang yo motona yo a belegelwago ka lapeng la lena le motho le ge e le ofe yo e sego ngwana wa ka lapeng eupša a rekilwe ka tšhelete go batho bao e sego ba setšhaba sa gabo lena. 13 Mošemane yo mongwe le yo mongwe yo a belegelwago ntlong ya gago le monna yo mongwe le yo mongwe yo a rekilwego ka tšhelete o swanetše go bolotšwa. Ye ke kgwerano ya ka yeo e tlago go ba leswao mebeleng ya lena go ya go ile. 14 Motho le ge e le ofe yo motona yo a ka se bollego o swanetše go bolawa. O robile kgwerano ya ka.”

15 Ke moka Modimo a re go Aborahama: “Sarai mosadi wa gago o se sa hlwa o mmitša Sarai, ka gobane go tloga gona bjale leina la gagwe e tla ba Sara. 16 Ke tla mo šegofatša gomme ka dira gore a go belegele morwa. Ke tla mo šegofatša gomme ditšhaba le dikgoši tša meraforafo di tla tšwa go yena.” 17 Ge a re’alo Aborahama a khunama a inamiša sefahlego, gomme a thoma go sega ke moka a ipotšiša ka pelong a re: “Na monna wa mengwaga e 100 a ka kgona go ba le ngwana, le gona na Sara mosadi wa mengwaga e 90 a ka kgona go belega?”

18 Bjale Aborahama a re go Modimo wa nnete: “Go tla ba kaone ge o ka šegofatša Ishimaele.” 19 Ke moka Modimo o ile a re: “Ruri ke go botša gore Sara mosadi wa gago o tla go belegela morwa, gomme o mo nee leina la Isaka. Kgwerano yeo ke e dirilego le wena, ke tla e phetha le go Isaka le go bana ba gagwe go ya go ile. 20 Eupša ge e le mabapi le kgopelo ya gago ka Ishimaele ke go kwele. Ke tla mo šegofatša ka dira gore a be le bana ba bantši. O tlo ba le barwa ba 12 bao e tlago go ba dikgošana gomme ke tla mo dira setšhaba se segolo. 21 Eupša ke tla dira kgwerano ya ka le Isaka, yoo a tlago go belegwa ke Sara ngwageng o tlago ka yona nako ye.”

22 Ge Modimo a feditše go bolela le Aborahama o ile a mo tlogela. 23 Aborahama a tšea Ishimaele morwa wa gagwe le banna ka moka bao ba belegetšwego ntlong ya gagwe, a tšea le yo mongwe le yo mongwe yo a rekilwego ka tšhelete, le yo mongwe le yo mongwe yo motona go ba lapa la gagwe, gomme a ya go ba bolotša ka lona letšatši leo, go etša ge Modimo a boletše le yena. 24 Aborahama o be a na le mengwaga e 99 ge a bolotšwa. 25 Ishimaele morwa wa gagwe yena o be a na le mengwaga e 13 ge a bolotšwa. 26 Ka lona letšatši leo Aborahama o ile a bolotšwa, gomme gwa bolotšwa le Ishimaele morwa wa gagwe. 27 Le gona o ile a bolotšwa le banna ka moka ba lapeng la gagwe, e lego yo mongwe le yo mongwe yo a belegetšwego lapeng la gagwe le yo mongwe le yo mongwe yo a rekilwego ka tšhelete go motho yo e sego wa setšhaba sa gabo.