Psalme
Opelelang Jehofa kopelo e mpsha,
Mo tumišeng ka phuthegong ya bao ba botegago.
2 Anke Isiraele e thabe ka gobane Modimo yo a e dirilego ke yo Mogolo,
Anke bana ba Tsione ba thabele Kgoši ya bona.
3 Anke ba bine gomme ba tumiše leina la gagwe,
Ba be ba mo opelele dikoša tša go mo tumiša ba letša moropa le harepa.
4 Gobane Jehofa o kgahlwa ke batho ba gagwe.
O phološa ba boleta.
5 Anke batho bao ba mmotegelago ba thabe ka gobane Modimo o dira gore ba hlomphege,
Anke ba goelele ba thabile ba le mepeteng ya bona.
6 Anke ba opele dikoša tša go tumiša Modimo
Ba swere ditšhoša ka matsogong a bona,
7 Gore ba itefeletše go ditšhaba
Gomme ba otle batho ba ditšhaba,
8 Le gore ba tleme dikgoši tša bona ka diketane,
Ba tleme le baetapele ba bona ka diketane,
9 Gore ba ahlolwe go ya kamoo go boletšwego gore ba tla ahlolwa ka gona.
Batho ba gagwe bao ba botegago ba tla ba le tokelo ya go dira se.
Tumišang Jah!*