Puku ya Bobedi ya Dikoronika
12 Gateetee ge bogoši bja Rehoboama bo se na go tia ebile a le matla, o ile a se sa latela molao wa Jehofa gomme Baisiraele le bona ka moka ba mo ekiša. 2 Ka ngwaga wa bohlano wa ge Kgoši Rehoboama a buša, Kgoši Shishaka wa Egepeta o ile a tla a hlasela Jerusalema, ka gobane Baisiraele ka moka ba be ba senyeditše Jehofa. 3 O ile a tla le dikariki tša ntwa tše 1 200 (sekete le makgolo a mabedi), banamedi ba dipere ba 60 000 (dikete tše masometshela) le mašole a mantšhi ao a tlilego le ona go tšwa Egepeta, e lego a Balibia, Basuki le Baethopia. 4 O ile a thopa metse yeo e šireleditšwego ya Juda gomme mafelelong a fihla Jerusalema.
5 Moporofeta Shemaya o ile a tla go Rehoboama le baetapele ba Juda bao ba bego ba kgobokane Jerusalema ka baka la Shishaka, a re go bona: “Jehofa o re: ‘Lena le ntlogetše gomme le nna ke le tlogetše gore Shishaka a le fenye.’” 6 Ke moka baetapele ba Isiraele le kgoši ba ikokobetša ba re: “Jehofa o lokile.” 7 Ge Jehofa a bona gore kgoši le baetapele ba ikokobeditše, Jehofa a re go Shemaya: “Ba ikokobeditše. Nka se ba fediše, ebile e se kgale ke tlo ba phološa. Nka se ba galefele ebile nka se tlogele Shishaka a senya Jerusalema. 8 Eupša e tlo ba bahlanka ba gagwe, e le gore ba tle ba tsebe phapano magareng ga go hlankela nna le go hlankela dikgoši tša dinaga tše dingwe.”
9 Ka gona Kgoši Shishaka wa Egepeta o ile a ya go lwa le Jerusalema. O ile a tšea mahumo ao a bego a le ntlong ya Jehofa le ao a bego a le ntlong ya kgoši. A tšea dilo ka moka, a ba a tšea le dikotse tša gauta tšeo Solomone a bego a di dirile. 10 Ka gona Kgoši Rehoboama o ile a dira dikotse tša koporo legatong la tšela di ilego tša tšewa ke Kgoši Shishaka, a di fa balaodi ba baleti bao ba bego ba leta mojakong wa ntlo ya kgoši gore ba di hlokomele. 11 Nako le nako ge kgoši e eya ntlong ya Jehofa, baleti ba be ba tšea dikotse tšeo gomme ba sepela le yona, ke moka ka morago ba di bušetša lefelong leo ba letago ba le go lona. 12 Ka ge kgoši e ile ya ikokobetša, Jehofa o ile a se sa e galefela ebile a se sa fediša Baisiraele. Le gona go ile gwa hwetšwa dilo tše dibotse tšeo batho ba Juda ba bego ba di dira.
13 Bogoši bja Rehoboama bo ile bja ba matla kudu Jerusalema gomme a tšwela pele a buša. Rehoboama o bile kgoši a na le mengwaga e 41, gomme o bušitše mengwaga e 17 a le Jerusalema, e lego motse woo Jehofa a bego a o kgethile gare ga meloko ka moka ya Isiraele gore a bee leina la gagwe go wona. Leina la mmago Rehoboama e be e le Naema wa Moamoni. 14 Eupša o ile a dira dilo tše mpe, ka gobane o be a se a ikemišetša go tsoma Jehofa ka pelo ya gagwe ka moka.
15 Ditaba tša Rehoboama ka moka, go tloga mathomong go fihla mafelelong, di ngwadilwe gare ga mantšu a moporofeta Shemaya le a Ido yo a bego a kgona go bona dipono ebile a ngwadilwe go ya ka tatelano ya meloko. Le gona Rehoboama le Jeroboama ba be ba dula ba elwa. 16 Mafelelong Rehoboama o ile a hlokofala go no swana le borakgolokhukhu ba gagwe, gomme a bolokelwa Motseng wa Dafida ke moka morwa wa gagwe Abija a ba kgoši legatong la gagwe.