Daniele

5 Kgoši Belshatsara o ile a direla banna ba maemo bao a ba kgethilego ba 1 000 (sekete) monyanya o mogolo gomme a nwa beine pele ga bona. 2 Eitše ge Belshatsara a tagilwe, a laela gore go tlišwe dibjana tša gauta le tša silifera tšeo Nebukadinetsara tatagwe a di tšerego tempeleng ya kua Jerusalema, e le gore yena le banna ba maemo bao a ba kgethilego, basadi ba gagwe ba direthe le basadi ba gagwe ba bangwe ba nwe ka tšona. 3 Ke moka ba napa ba tliša dibjana tšeo tša gauta tšeo di tšerwego ka sekgethweng sa ntlo ya Modimo kua Jerusalema. Ke moka kgoši, banna ba maemo bao e ba kgethilego, basadi ba yona ba direthe le basadi ba yona ba bangwe ba nwa ka tšona. 4 Ba ile ba nwa beine, ba ba ba reta medimo ya gauta le ya silifera, ya koporo, ya tšhipi, ya kota le ya leswika.

5 Ka yona nako yeo, go ile gwa tšwelela menwana ya seatla sa motho gomme ya thoma go ngwala lebotong leo le poleiseterilwego la mošate wa kgoši pele ga sehlomelalebone gomme kgoši e be e kgona go bona ka morago ga seatla seo se bego se ngwala. 6 Ke moka mmala wa sefahlego sa kgoši wa fetoga,* gomme ya tšhošwa ke tšeo e di naganago, matheka a yona a kgwelakgwehla gomme dikhuru tša yona tša thoma go thulana.

7 Kgoši ya goeletša ka lentšu la godimo ya laela gore go tlišwe boramalea, Bakaladea le batho ba go tseba thuto ya dinaledi. Ke moka kgoši ya re go banna ba bohlale ba Babilona: “Motho yo a ka balago mongwalo wo gomme a mpotša gore o ra goreng, o tla apešwa seaparo se se phepolo, a ba a apešwa le pheta ya gauta molaleng gomme a ba wa boraro ka maemo mmušong.”

8 Ke moka banna ka moka ba bohlale ba kgoši ba tla go yona, eupša ga go le o tee wa bona yoo a ilego a kgona go balela kgoši mongwalo woo goba go e hlalosetša gore o ra goreng. 9 Ka gona Kgoši Belshatsara o be a tšhogile kudu e bile mmala wa sefahlego sa gagwe o fetogile gomme banna ba maemo bao a ba kgethilego ba be ba gakanegile.

10 Ge mohumagadi* a ekwa mantšu a kgoši le a banna ba maemo bao e ba kgethilego, o ile a tsena ka holong yeo monyanya o bego o swaretšwe ka go yona. Ke moka a re: “Wena kgoši mong wa ka, anke o phele go ya go ile. Anke o se ke wa tšhošwa ke dilo tšeo o di naganago goba wa dumelela mmala wa sefahlego sa gago o fetoga. 11 Go na le monna yo mongwe mo mmušong wa gago e bile o na le moya wa medimo e mekgethwa. Nakong ya ge tatago a be a sa phela, o ile a hwetšwa a na le tsebo, temogo le bohlale bja go swana le bja medimo. Kgoši Nebukadinetsara tatago o ile a mo kgetha gore e be yo mogolo go baperisita bao ba dirago dilo tša maleatlana, boramalea, Bakaladea le batho bao ba tsebago thuto ya dinaledi. Wena kgoši, tatago ke yena a mo kgethilego. 12 Ka gobane Daniele yoo kgoši e mo reeletšego leina ya re ke Belteshatsara, o be a na le moya woo o sa tlwaelegago le tsebo le temogo, e bile a kgona go hlatholla ditoro, a kgona go hlalosa dika le diema e bile a kgona go rarolla mathata ao a bonagalago a sa rarollege. Bjale, anke Daniele a bitšwe gomme yena o tla go hlathollela gore mongwalo wo o ra goreng.”

13 Ka gona, Daniele o ile a tlišwa pele ga kgoši. Ke moka kgoši ya botšiša Daniele ya re: “Na ke wena Daniele, yo mongwe wa mathopša a Juda ao tate yoo e bego e le kgoši a ilego a a tliša mo a etšwa Juda? 14 Ke kwele gore o na le moya wa medimo le gore o na le tsebo, temogo le bohlale bjo bo sa tlwaelegago. 15 Bjale go ile gwa tlišwa banna ba bohlale le boramalea pele ga ka gore ba tle ba bale mongwalo wo le go ntlhathollela wona, eupša ba palelwa ke go mpotša gore o ra goreng. 16 Eupša ke kwele gore wena o kgona go hlatholla dilo le gore o kgona go rarolla mathata a go se rarollege. Bjale ge e ba o ka kgona go bala mongwalo wo gomme wa mpotša gore o ra goreng, o tla apešwa seaparo se se phepolo, wa ba wa apešwa le pheta ya gauta molaleng gomme wa ba wa boraro ka maemo mmušong.”

17 Ke moka Daniele a araba kgoši a re: “Dimpho tša gago ke a di leboga, e bile o ka tšea meputso yeo o nyakago go mpha yona wa e fa ba bangwe. Eupša wena kgoši, ke tla go balela mongwalo wo, ka ba ka go botša gore o ra goreng. 18 Wena kgoši mong wa ka, Modimo yo Godimodimo o neile Nebukadinetsara tatago mmušo le maemo a godimo, tlhompho le seriti. 19 Ka baka la maemo a godimo ao a bego a mo file ona, batho ba ditšhaba ka moka le ba maleme ka moka, ba be ba thothomela pele ga gagwe ka ge ba be ba mmoifa. O be a bolaya motho yo mongwe le yo mongwe yo a nyakago go mmolaya, goba a tlogela motho yo mongwe le yo mongwe yo a nyakago gore a phele. O be a godiša yo mongwe le yo mongwe yo a nyakago go mo godiša goba a kokobetša yo mongwe le yo mongwe yo a nyakago go mo kokobetša. 20 Eupša ge a be a thoma go ikgogomoša le go thatafiša hlogo, moo a ilego a dira dilo tšeo a bego a sa swanela go di dira, o ile a fološwa setulong sa gagwe sa bogoši gomme a se sa ba le seriti. 21 O ile a rakwa bathong, gomme pelo ya gagwe ya dirwa gore e be bjalo ka ya phoofolo ya naga, a ba a dula le ditonki tša naga. O ile a fula bjang go swana le dipoo, mmele wa gagwe wa kolobišwa ke phoka ya magodimong go fihlela a tseba gore Modimo yo Godimodimo ke Mmuši wa mebušo ya batho, le gona mmušo woo o o nea yoo a nyakago go mo nea wona.

22 “Eupša wena Belshatsara morwa wa gagwe, ga se wa ikokobetša le ge o be o tseba dilo tše ka moka. 23 Go e na le moo, o ile wa itira eka ke wena yo mogolo go feta Modimo wa magodimong gomme wa laela gore o tlišetšwe dibjana tša ntlong ya gagwe. Ke moka wena le banna ba maemo bao o ba kgethilego, basadi ba gago ba direthe, le basadi ba gago ba bangwe la nwa beine ka tšona, la ba la reta medimo ya gauta le ya silifera, ya koporo, ya tšhipi, ya kota le ya leswika, e lego medimo yeo e sa bonego selo, e sa kwego selo e bile e sa tsebe selo. Eupša ga se wa tagafatša Modimo yoo a laolago bophelo bja gago le dilo ka moka tšeo o di dirago. 24 Ka gona Modimo o rometše seatla gomme a dira gore se ngwale mongwalo wo. 25 Wo ke mongwalo wo o bego o ngwadilwe: MENE, MENE, TEKEL le PHARSIN.

26 “Ye ke tlhathollo ya mantšu ao: MENE, e ra gore Modimo o baletše matšatši a mmušo wa gago gomme o o fedišitše.

27 “TEKEL, e ra gore Modimo o go kadile gomme a hwetša o le bohwefo kudu.

28 “PERES, e ra gore Modimo o arogantše mmušo wa gago gomme a o fa Bamede le Baperesia.”

29 Ke moka Belshatsara a laela gore Daniele a apešwe seaparo se se phepolo le pheta ya gauta molaleng wa gagwe, gomme gwa tsebatšwa gore e tla ba wa boraro ka maemo mmušong.

30 Bošegong bjona bjoo, Kgoši Belshatsara wa Mokaladea o ile a bolawa. 31 Ke moka Dario wa Momede a tšea mmušo, o be a na le mengwaga e ka bago e 62.